Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Beibele e re Ruta Eng?

 KGAOLO YA LESOMENNE

Lapa la Gago le ka Thaba

Lapa la Gago le ka Thaba

1, 2. Jehofa o nyaka gore malapa a phele bjang?

JEHOFA MODIMO o nyadišitše banyalani ba mathomo. Beibele e re o ile a bopa mosadi wa pele gomme “a mo tliša go monna.” Adama o ile a thaba kudu moo a ilego a re: “Mafelelong yo ke yena lerapo la marapo a ka le nama ya nama ya ka.” (Genesi 2:22, 23) Se se re ruta gore Jehofa o nyaka gore banyalani ba thabe.

2 Ka maswabi, batho ba bantši ga se ba ka ba thaba ka malapeng a bona. Lega go le bjalo, Beibele e na le melao e mentši ya motheo yeo e tla thušago bohle ka lapeng gore ba dire gore lapa la bona le atlege le go thabiša.Luka 11:28.

SEO MODIMO A LETETŠEGO GORE BANNA BA SE DIRE

3, 4. (a) Monna o swanetše go swara mosadi wa gagwe bjang? (b) Ke ka baka la’ng go le bohlokwa gore monna le mosadi ba lebalelane?

3 Beibele e re monna wa kgonthe o swanetše go swara mosadi wa gagwe ka lerato le ka tlhompho. Hle bala Baefeso 5:25-29. Monna ka mehla o swanetše go swara mosadi wa gagwe ka lerato. Le gona o tla šireletša mosadi wa gagwe, a mo hlokomela gomme a se mo dire selo le ge e le sefe seo se tla mo gobatšago.

4 Eupša monna o swanetše go dira’ng ge mosadi wa gagwe a dira diphošo? Beibele e botša banna gore: “Tšwelang pele le rata basadi ba lena gomme le se ke la ba galefela o šoro.” (Bakolose 3:19) Lena banna, le se ke la lebala gore le lena le dira diphošo. Ka gona ge e ba le nyaka gore Modimo a le lebalele diphošo tša lena, le swanetše go  lebalela basadi ba lena. (Mateo 6:12, 14, 15) Ge monna le mosadi ba lebalelana ka bolokologi, seo se tla dira gore ba thabe lenyalong la bona.

5. Ke ka baka la’ng monna a swanetše go swara mosadi wa gagwe gabotse?

5 Jehofa o letetše gore monna a sware mosadi wa gagwe gabotse. Monna o swanetše go tshwenyega kudu ka dinyakwa tša mosadi wa gagwe tša nama le tša maikwelo. Ye ke taba e bohlokwa kudu. Ge e ba monna a sa sware mosadi wa gagwe gabotse, Jehofa a ka kgetha go se theetše dithapelo tša gagwe. (1 Petro 3:7) Jehofa o lebelela motho yo mongwe le yo mongwe a le bohlokwa go yena ge e ba a mo rata. Ga a lebelele banna ba le bohlokwa kudu go phala basadi.

6. Taba ya gore monna le mosadi ke “nama e tee” e ra go re’ng?

6 Jesu o hlalositše gore monna le mosadi “ga e sa hlwa e le ba babedi, eupša ke nama e tee.” (Mateo 19:6) Ba a botegelana gomme ba ka se tsoge ba radiane. (Diema 5:15-21; Baheberu 13:4) Monna le mosadi ga se ba swanela go timana thobalano. (1 Bakorinthe 7:3-5) Monna ga se a swanela go lebala gore “ga go na motho yo a kilego a hloya mmele wa gagwe; eupša o a o fepa le go o babalela.” Ka gona, monna o swanetše go rata mosadi wa gagwe le go mo hlokomela. Go feta dilo ka moka, mosadi o nyaka gore monna wa gagwe a mo sware ka botho le ka lerato.Baefeso 5:29.

SEO MODIMO A LETETŠEGO GORE BASADI BA SE DIRE

7. Ke ka baka la’ng ka lapeng go swanetše go ba le hlogo?

7 Lapa le lengwe le le lengwe le swanetše go ba le hlogo, e lego motho yo a tla le hlahlago gore le šome mmogo. Lengwalo la 1 Bakorinthe 11:3 le re: “Hlogo ya monna yo mongwe le yo mongwe ke Kriste; hlogo ya mosadi yona ke monna; hlogo ya Kriste yona ke Modimo.”

8. Mosadi a ka bontšha bjang gore o hlompha monna wa gagwe ka mo go tseneletšego?

 8 Monna yo mongwe le yo mongwe ka lapeng o dira diphošo. Eupša ge mosadi a thekga diphetho tša monna wa gagwe e bile a dirišana le yena gabotse, lapa ka moka le a holega. (1 Petro 3:1-6) Beibele e re: “Mosadi o swanetše go ba le tlhompho e tseneletšego go monna wa gagwe.” (Baefeso 5:33) Eupša go thwe’ng ge e ba mosadi a se bodumeding botee le monna wa gagwe? Le gona moo o swanetše go hlompha monna wa gagwe ka mo go tseneletšego. Beibele e re: “Lena basadi ikokobeletšeng banna ba lena, e le gore ge e ba go na le bao ba sa kwego Lentšu la Modimo, ba tle ba ruiwe ka boitshwaro bja basadi ba bona ka ntle le gore go bolelwe lentšu, ka baka la ge ba bile dihlatse tše di bonego ka mahlo tša boitshwaro bja lena bjo bo sekilego gotee le tlhompho e tseneletšego.” (1 Petro 3:1, 2) Mohlala o mobotse wa mosadi o ka thuša monna wa gagwe go kwešiša ditumelo tša mosadi wa gagwe le go di hlompha.

9. (a) Mosadi o swanetše go dira’ng ge e ba a thulana ka dikgopolo le monna wa gagwe? (b) Tito 2:4, 5 e swere keletšo efe bakeng sa basadi bao ba nyetšwego?

 9 Mosadi a ka dira’ng ge e ba a thulana ka dikgopolo le monna wa gagwe? O swanetše go botša monna wa gagwe ka tlhompho kamoo a ikwago ka gona. Ka mohlala, Sara o kile a bolela selo se sengwe seo Aborahama a ilego a se kwane le sona, eupša Jehofa a botša Aborahama gore: “Theetša lentšu la mosadi wa gago.” (Genesi 21:9-12) Ga se ka mehla moo phetho ya monna wa Mokriste e tla thulanago le seo Beibele e se bolelago, ka gona mosadi wa gagwe o swanetše go mo thekga. (Ditiro 5:29; Baefeso 5:24) Mosadisadi o tla hlokomela lapa gabotse. (Bala Tito 2:4, 5.) Ge bana ba gagwe le monna wa gagwe ba bona gore o šoma ka thata go ba hlokomela, ba tla mo rata kudu le go mo hlompha.Diema 31:10, 28.

Sara o beetše basadi mohlala ofe o mobotse?

10. Beibele e re’ng ka go arogana le go hlala?

10 Ka dinako tše dingwe banyalani ba kitimela go arogana goba go hlalana. Eupša Beibele e re “mosadi a se ke a arogana le monna wa gagwe” le “monna a se ke a tlogela mosadi wa gagwe.” (1 Bakorinthe 7:10, 11) Go na le mabaka a itšego a go kwagala ao a dumelelago banyalani go arogana, eupša phetho yeo ga se papadi. Go thwe’ng ka go hlala? Beibele e bontšha gore lebaka letee feela la go hlala ke ge yo mongwe wa banyalani a bile le thobalano le motho yo mongwe.Mateo 19:9.

SEO MODIMO A LETETŠEGO GORE BATSWADI BA SE DIRE

11. Ke’ng seo bana ba se hlokago go feta selo le ge e le sefe?

11 Lena batswadi, fetšang nako e ntši kamoo le ka kgonago ka gona le na le bana ba lena. Bana ba lena ba a le hloka, e bile go feta selo le ge e le sefe, ba nyaka gore le ba rute ka Jehofa.Doiteronomio 6:4-9.

Jesu o beetše motho yo mongwe le yo mongwe ka lapeng mohlala o mobotse

12. Batswadi ba swanetše go dira’ng go šireletša bana ba bona?

 12 Lefase le leo le laolwago ke Sathane e ba le lebe le go feta, e bile go na le batho ba bangwe bao ba ratago go gobatša bana ba rena, gaešita le go ba goboša ka tša thobalano. Batswadi ba bangwe ba tšhaba go bolela le bana ba bona ka ditaba tše. Eupša batswadi ba swanetše go lemoša bana ba bona ka batho bao gomme ba ba rute ditsela tša go ba kgole le bona. Batswadi, šireletšang bana ba lena. *1 Petro 5:8.

13. Batswadi ba swanetše go ruta bana ba bona bjang?

 13 Batswadi ba na le boikarabelo bja go ruta bana ba bona mekgwa. O ka ruta bjang bana ba gago seo? Ke therešo gore o swanetše go tlwaetša bana ba gago, eupša ga se wa swanela go ba sehlogo ge o ba phošolla. (Jeremia 30:11) Ka gona o se ke wa laya bana ba gago o galefile. Ga o nyake gore mantšu a gago a be bjalo ka ge eka “o hlaba ka tšhoša” gomme wa ba kweša bohloko. (Diema 12:18) Ruta bana ba gago gore ke ka baka la eng ba swanetše go ba le tsebe.Baefeso 6:4; Baheberu 12:9-11; bala Tlhaloso 30.

SEO MODIMO A LETETŠEGO GORE BANA BA SE DIRE

14, 15. Ke ka baka la’ng bana ba swanetše go kwa batswadi?

14 Jesu o be a ekwa Tatagwe ka mehla, gaešita le dinakong tše thata. (Luka 22:42; Johane 8:28, 29) Le gona Jehofa o letetše gore bana ba kwe batswadi.Baefeso 6:1-3.

15 Lena bana, gaešita le ge le nagana gore go kwa batswadi ba lena go thata, gopolang gore ge le ba kwa, Jehofa le batswadi ba lena ba a thaba. *Diema 1:8; 6:20; 23:22-25.

Ke’ng seo se tla thušago bana gore ba se hlanogele Modimo ge ba lekega go dira dilo tše mpe?

16. (a) Sathane o diriša bomang go šušumeletša bana gore ba dire dilo tše mpe? (b) Ke ka baka la’ng go le bohlokwa gore o gwerane feela le batho bao ba ratago Jehofa?

16 Diabolo a ka diriša bagwera ba gago le bana ba bangwe go go fora gore o dire dilo tše mpe. O a tseba gore go thata kudu go gana. Ka mohlala, morwedi wa Jakobo e lego Dina o be a na le bagwera bao ba sa ratego Jehofa. Se se ile sa tsenya yena le lapa la gabo mathateng a magolo. (Genesi 34:1, 2) Ge e ba bagwera ba gago ba sa rate Jehofa, ba ka go šušumeletša go dira dilo tšeo Jehofa a di hloilego gomme wa tsena mathateng, wa nyamiša ba  geno le Modimo. (Diema 17:21, 25) Ke ka baka leo go lego bohlokwa kudu gore o gwerane feela le batho bao ba ratago Jehofa.1 Bakorinthe 15:33.

LAPA LA GAGO LE KA THABA

17. Yo mongwe le yo mongwe ka lapeng o na le boikarabelo bofe?

17 Ge bohle ka lapeng ba phela ka melao ya Modimo, ba phema mathata a mantši le mahloko. Ka gona ge e ba o le monna yo a nyetšego, rata mosadi wa gago gomme o mo sware ka lerato. Ge e ba o le mosadi yo a nyetšwego, hlompha monna wa gago le go mo kwa gomme o ekiše mohlala wa mosadi yo go boletšwego ka yena go Diema 31:10-31. Ge e ba o le motswadi, ruta bana ba gago go rata Modimo. (Diema 22:6) Ge e ba o le tate, hlahla lapa la gago “ka mokgwa o mobotse.” (1 Timotheo 3:4, 5; 5:8) Lena bana, kwang batswadi ba lena. (Bakolose 3:20) Gopolang gore yo mongwe le yo mongwe ka lapeng a ka dira diphošo, ka gona ikokobetšeng gomme le kgopelaneng tshwarelo. Ee, Beibele e na le tlhahlo ya Jehofa yeo e ka thušago yo mongwe le yo mongwe ka lapeng.

^ par. 12 O ka ithuta ka mo go oketšegilego mabapi le kamoo o ka šireletšago bana ba gago go kgaolo 32 ya puku ya Ithute go Morutiši yo Mogolo, yeo e gatišitšwego ke Dihlatse tša Jehofa.

^ par. 15 Ngwana ga se a swanela go theetša batswadi ge ba nyaka gore a dire selo seo se sa dumelelanego le molao wa Modimo.Ditiro 5:29.

Ithute ka mo go Oketšegilego

LAPA LA GAGO LE KA THABA

Kgopela Thušo ya Modimo Gore o be le Lenyalo le le Thabilego

Go diriša dipotšišo tše pedi tše bonolo go ka go thuša go kaonefatša lenyalo la gago.

LAPA LA GAGO LE KA THABA

Rapelang Jehofa le le Lapa

O ka thabela bjang borapedi bja lena bja lapa ka mo go oketšegilego?