Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA BORARO

Morero wa Modimo ka Batho ke Ofe?

Morero wa Modimo ka Batho ke Ofe?

1. Morero wa Modimo ka batho ke ofe?

MODIMO o na le morero o mobotse ka batho. O bopile monna wa pele le mosadi, e lego Adama le Efa, gore ba dule serapeng se sebotse. Morero wa gagwe e be e le gore ba be le bana, ba dire lefase ka moka gore e be paradeise le go hlokomela diphoofolo.Genesi 1:28; 2:8, 9, 15; bala Tlhaloso 6.

2. (a) Re tseba bjang gore Modimo o tla phetha seo a se rerilego? (b) Beibele e re’ng ka go phela ka mo go sa felego?

2 Na o nagana gore ka letšatši le lengwe re tla dula paradeiseng? Jehofa o re botša ka morero wa gagwe gore: “Ke o hlamile, e bile ke tla o phetha.” (Jesaya 46:9-11; 55:11) Ee, o tla dira seo a se rerilego, gomme ga go na seo se tlago go mo thibela. Jehofa o bolela gore o be a na le morero ka lefase ge a le bopa. Ga ‘se a le bopela lefeela.’ (Jesaya 45:18) O nyaka gore batho ba dule lefaseng ka moka. Ke batho ba mohuta ofe bao Modimo a nyakago gore ba dule mo lefaseng, gona o nyaka gore ba dule nako e kaaka’ng? Beibele e re: “Baloki [goba, bao ba kwago] bona e tla ba beng ba lefase, ba tla dula mo go lona ka mo go sa felego.”Psalme 37:29; Kutollo 21:3, 4.

3. Ka ge batho ba babja le go hwa, o ka ipotšiša’ng?

3 Eupša lehono batho ba a babja le go hwa. Mafelong a mantši, ba a lwa le go bolayana. Ruri se ga se seo Modimo a se rerilego. Ka gona, go diregile’ng gona ka baka la’ng? Ke Beibele feela e ka re hlalosetšago.

 LENABA LA MODIMO

4, 5. (a) Ke mang a ilego a bolela le Efa a diriša noga serapeng sa Edene? (b) Go tla bjang gore motho yo a botegago a fetoge lehodu?

4 Beibele e re botša gore Modimo o na le lenaba leo le “bitšwago Diabolo le Sathane.” Sathane o ile a diriša noga go bolela le Efa serapeng sa Edene. (Kutollo 12:9; Genesi 3:1) O ile a dira gore go bonagale eka noga e be e bolela.—Bala Tlhaloso 7.

5 Ka gona, na Modimo o bopile Sathane Diabolo? Aowa! Morongwa yo a bego a le legodimong ge Modimo a be a lokišeletša Adama le Efa lefase o ile a fetoga a ba Diabolo. (Jobo 38:4, 7) Seo se kgonegile bjang? Ka mohlala, go tla bjang gore motho yo a botegago a fetoge lehodu? Ga a belegwe e le lehodu, eupša o kganyoga, goba o nyaka, selo seo e sego sa gagwe. O dulela go nagana ka sona, gomme kganyogo ya gagwe e fošagetšego e ba matla. Ke moka, ge a hwetša sebaka, o utswa selo seo. O iphetošitše lehodu.Bala Jakobo 1:13-15; bala Tlhaloso 8.

6. Go tlile bjang gore morongwa yo a itšego a fetoge lenaba la Modimo?

6 Se ke seo se ilego sa diragalela morongwa yoo. Ka morago ga gore Jehofa a bope Adama le Efa, o ile a ba botša gore ba be le bana gomme ba “tlale lefase.” (Genesi 1:27, 28) Morongwa yoo a ka ba a ile a nagana gore, ‘Batho bao ka moka ba ka rapela nna go e na le gore ba rapele Jehofa!’ Ge a be a dutše a nagana kudu ka taba ye, go kganyoga seo e lego sa Jehofa go ile gwa gola. Morongwa yoo o be a nyaka gore batho ba mo rapele. Ka gona o ile a botša Efa maaka gomme a mo timetša. (Bala Genesi 3:1-5.) Ka go dira seo, o ile a fetoga Sathane Diabolo, lenaba la Modimo.

7. (a) Ke ka baka la’ng Adama le Efa ba ile ba hwa? (b) Ke ka baka la’ng re tšofala le go hwa?

7 Adama le Efa ba ile ba se kwe Modimo gomme ba ja seenywa seo a bego a ba boditše gore ba se ke ba se ja. (Genesi  2:17; 3:6) Ba ile ba direla Jehofa sebe, gomme ge nako e dutše e eya ba hwa, bjalo ka ge Jehofa a be a boletše. (Genesi 3:17-19) Bana ba Adama le Efa e be e le badiradibe, ka gona ba ile ba hwa. (Bala Baroma 5:12.) Go re thuša go kwešiša gore ke ka baka la eng bana ba Adama le Efa le bona e be e le badiradibe, ela hloko mohlala wo. Anke o nagane o paka lofo ya borotho ka paneng yeo e potegilego. Borotho bjoo bo tla tšwa bo potegile go swana le yona pane yeo. Ka morago ga gore Adama a se kwe Modimo, o ile a fetoga modiradibe. Ka ge re le bana ba Adama, ka moka ga rena re badiradibe, goba ka mantšu a mangwe re potegile go swana le yena. Le gona ka ge ka moka ga rena re le badiradibe, re a tšofala le go hwa.Baroma 3:23; bala Tlhaloso 9.

8, 9. (a) Sathane o be a nyaka gore Adama le Efa ba dumele eng? (b) Ke ka baka la’ng Jehofa a se a ka a bolaya marabele le semeetseng?

8 Sathane o ile a thoma go rabela go Jehofa ge a be a dira gore Adama le Efa ba se ke ba kwa Modimo. O be a nyaka gore Adama le Efa ba dumele gore Jehofa ke moaketši, mmuši yo kgopo yo a bego a sa nyake dilo tšeo di tlago go ba hola. Sathane o be a re batho ga ba hloke Modimo gore a ba botše seo ba swanetšego go se dira le gore Adama le Efa ba swanetše go itirela phetho ya se se nepagetšego le se se fošagetšego. Ka gona, Jehofa o be a tla dira’ng? A ka ba a ile a bolaya marabele ao gomme a fediša borabele. Eupša na seo se be se tla hlatsela gore Sathane o bolela maaka? Aowa, go be go ka se be bjalo.

9 Ka go re’alo, Jehofa ga se a ka a bolaya marabele ao le semeetseng. Go e na le moo, o ile a nea batho nako ya gore ba ipuše. Se se be se tla dira gore go be molaleng gore Sathane o bolela maaka le gore Jehofa o tseba seo se tlago go hola batho. Re tla ithuta ka mo go oketšegilego ka taba ye go Kgaolo 11. Eupša o nagana’ng ka phetho ya  Adama le Efa? Na go be go nepagetše gore ba dumele Sathane gomme ba se kwe Modimo? Selo se sengwe le se sengwe seo Adama le Efa ba bego ba na le sona ba be ba se neilwe ke Jehofa. O be a ba neile bophelo bjo bo phethagetšego, legae le lebotse le mošomo wo ba bego ba o thabela. Eupša Sathane o be a se a ka a ba direla selo se sebotse. Ge e ba o be o le moo, nkabe o ile wa dira’ng?

10. Yo mongwe le yo mongwe wa rena o swanetše go itirela kgetho efe ya bohlokwa?

 10 Lehono, yo mongwe le yo mongwe wa rena o swanetše go itirela kgetho, le gona bophelo bja rena bo ithekgile ka kgetho yeo. Re ka kgetha go kwa Jehofa e le Mmuši wa rena gomme ra thuša go hlatsela gore Sathane o bolela maaka. Goba re ka kgetha Sathane gore e be mmuši wa rena. (Psalme 73:28; bala Diema 27:11.) Ke batho ba sego kae lefaseng bao ba kwago Modimo. Ge e le gabotse, ga se mmuši wa lefase. Eupša ge e ba Modimo e se mmuši wa lefase le, gona ke mang a bušago lefase?

KE MANG YO A BUŠAGO LEFASE?

Ge e ba mebušo ya lefase ka moka e be e se ya Sathane, na o be a ka re o tla e nea Jesu?

11, 12. (a) Re ithuta’ng tabeng ya dilo tšeo Sathane a ilego a di holofetša Jesu? (b) Ke mangwalo afe ao a bontšhago gore Sathane o buša lefase le?

11 Jesu o be a tseba gore ke mang yoo ge e le gabotse a bušago lefase. Lebakeng le lengwe, Sathane o ile “a mmontšha mebušo ka moka ya lefase le letago la yona.” Ke moka Sathane a holofetša Jesu gore: “Dilo tše ka moka ke tla go nea tšona ge o ka wela fase [goba, wa inama] wa nthapela gatee.” (Mateo 4:8, 9; Luka 4:5, 6) Ipotšiše gore: ‘Ge e ba mebušo yeo e be e se ya Sathane, na o be a ka re o tla e nea Jesu?’ Aowa. Mebušo ka moka ke ya Sathane.

12 O ka ipotšiša gore: ‘Go tla bjang gore Sathane e be mmuši wa lefase? Na Jehofa Modimo Ramatlaohle ga se yena a hlodilego legohle?’ (Kutollo 4:11) Ee, ke yena, eupša Jesu o ile a bitša Sathane ka go lebanya gore ke “mmuši wa lefase le.” (Johane 12:31; 14:30; 16:11) Moapostola Paulo o ile a bitša Sathane Diabolo gore ke “modimo wa lefase le.” (2 Bakorinthe 4:3, 4) Le gona moapostola Johane o ngwadile gore “lefase ka moka le rapaletše matleng a yo kgopo.”1 Johane 5:19.

 LEFASE LA SATHANE LE TLA FEDIŠWA BJANG?

13. Ke ka baka la’ng re hloka lefase le lefsa?

13 Lefase le le ba kotsi le go feta. Re bona dintwa, go se botege, boikaketši le bošoro gohle. Batho ba ka se kgone go rarolla mathata a ka moka, le ge ba ka dira sohle seo ba ka se kgonago. Eupša kgauswinyane Modimo o tla fediša lefase le le lebe ka ntwa ya Haramagedone, gomme a tliša lefase le lefsa la go loka.Kutollo 16:14-16; bala Tlhaloso 10.

14. Modimo o kgethile mang gore e be Kgoši ya Mmušo wa Gagwe? Beibele e boletše’ng e sa le pele ka Jesu?

14 Jehofa o kgethile Jesu Kriste go ba Kgoši ya Mmušo wa Gagwe wa legodimong. Mengwaga e dikete e fetilego, Beibele e boletše e sa le pele gore Jesu o tla buša e le “Kgošana ya Khutšo” le gore mmušo wa gagwe o tla buša ka mo go sa felego. (Jesaya 9:6, 7) Jesu o rutile balatedi ba gagwe go rapelela mmušo wo ge a be a re: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Go Kgaolo 8, re tlo ithuta kamoo Mmušo wa Modimo o tlago go tšeela mebušo ya lefase legato. (Bala Daniele 2:44.) Ke moka Mmušo wa Modimo o tla fetoša lefase gore e be paradeise e botse.—Bala Tlhaloso 11.

LEFASE LE LEFSA LE KGAUSWI!

15. “Lefase le lefsa” ke eng?

15 Beibele e holofetša gore: “Go na le magodimo a mafsa le lefase le lefsa tše re di letetšego,” gomme “toko e tla aga go tšona.” (2 Petro 3:13; Jesaya 65:17) Ka dinako tše dingwe ge Beibele e bolela ka “lefase,” e bolela ka batho bao ba dulago mo lefaseng. (Genesi 11:1) Ka gona “lefase le lefsa” la go loka ke batho ka moka bao ba kwago Modimo le bao a ba šegofatšago.

16. Ke mpho efe e kgahlišago yeo Modimo a tlago go e nea bao ba tlago go phela lefaseng le lefsa, gomme re swanetše go dira’ng gore re e hwetše?

 16 Jesu o holofeditše gore bao ba tlago go phela lefaseng le lefsa la Modimo ba tla newa “bophelo bjo bo sa felego.” (Mareka 10:30) Re swanetše go dira’ng gore re hwetše mpho ye? Hle bala Johane 3:16 le 17:3 gore o hwetše karabo. Ga bjale anke re bone gore Beibele e re bophelo bo tla ba bjang lefaseng la Paradeise.

17, 18. Re tseba bjang gore go tla ba le khutšo gohle mo lefaseng le gore re tla ikwa re šireletšegile?

17 Bobe, ntwa, bosenyi le bošoro di tla ba di fedišitšwe. Go tla ba go se sa na batho ba kgopo goba ba babe mo lefaseng. (Psalme 37:10, 11) Modimo o tla “fediša dintwa go fihla pheletšong ya lefase.” (Psalme 46:9; Jesaya 2:4) Lefase le le tla ba le tletše ka batho bao ba ratago Modimo le bao ba mo kwago. Go tla ba le khutšo ka mo go sa felego.Psalme 72:7.

18 Batho ba Jehofa ba tla ikwa ba šireletšegile. Mehleng ya ge Beibele e be e ngwalwa, ge Baisiraele ba be ba ekwa Modimo, ba be ba ikwa ba bolokegile ka gobane o be a ba šireletša. (Lefitiko 25:18, 19) Ge re le Paradeiseng, re ka se boife selo le ge e le sefe goba motho le ge e le ofe. Ka mehla re tla ikwa re šireletšegile!Bala Jesaya 32:18; Mika 4:4.

19. Ke ka baka la’ng re ka kgodišega gore go tla ba le dijo tše dintši lefaseng le lefsa la Modimo?

19 Go tlo ba le dijo tše dintši. Beibele e re: “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.” (Psalme 72:16) Jehofa “Modimo wa rena, o tla re šegofatša,” gomme “lefase lona le tla tšweletša dienywa tša lona.”—Psalme 67:6.

20. Re tseba bjang gore lefase e tla ba paradeise?

20 Lefase ka moka e tla ba paradeise. Batho ba tla ba le  dintlo tše dibotse le dirapa tše di kgahlišago. (Bala Jesaya 65:21-24; Kutollo 11:18.) Lefase ka moka e tla ba le lebotse go swana le serapa sa Edene. Jehofa o tla dula a re nea dilo ka moka tšeo re di hlokago. Beibele e mo hlalosa ka gore: “O bula seatla sa gago wa kgotsofatša kganyogo ya sephedi se sengwe le se sengwe.”Psalme 145:16.

21. Re tseba bjang gore go tla ba le khutšo magareng ga batho le diphoofolo?

21 Go tla ba le khutšo magareng ga batho le diphoofolo. Diphoofolo di ka se sa gobatša batho. Bana ba tla ikwa ba šireletšegile, gaešita le ge ba na le diphoofolo tšeo di lego kotsi lehono.Bala Jesaya 11:6-9; 65:25.

22. Jesu o tla direla batho bao ba babjago eng?

22 Ga go na yo a tla babjago. Ge Jesu a be a le mo lefaseng, o ile a fodiša batho ba bantši. (Mateo 9:35; Mareka 1:40-42; Johane 5:5-9) Eupša ka ge e le Kgoši ya Mmušo wa Modimo, o tla fodiša batho ka moka. Le ka mohla go ka se be le yo a rego: “Ke a babja.”Jesaya 33:24; 35:5, 6.

23. Modimo o tla dira’ng ka bao ba hwilego?

23 Bahu ba tla tsošwa. Modimo o holofetša gore o tla tsoša batho ba dimilione bao ba hwilego. “Go tla ba le tsogo ya ba lokilego gotee le ba sa lokago.”Bala Johane 5:28, 29; Ditiro 24:15.

24. O ikwa bjang ka go tlo phela Paradeiseng?

24 Ka moka ga rena re na le kgetho. Re ka kgetha go ithuta ka Jehofa gomme ra mo hlankela, goba re ka fo dira seo re se nyakago. Ge e ba re kgetha go hlankela Jehofa, re ka ba le bokamoso bjo bo kgahlišago. Ge monna yo a itšego a be a kgopela Jesu gore a mo gopole ge a hwile, Jesu o ile a mo holofetša gore: “O tla ba le nna Paradeiseng.” (Luka 23:43) Anke re ithuteng ka mo go oketšegilego ka Jesu Kriste le kamoo a tlago go phethagatša dikholofetšo tša Modimo tše di kgahlišago.