Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA SENYANE

Na Bofelo bja Lefase bo Kgauswi?

Na Bofelo bja Lefase bo Kgauswi?

1. Re ka ithuta kae ka bokamoso?

NA O kile wa re o bogetše ditaba gomme wa ipotšiša gore: ‘Na ge nako e dutše e eya dilo di tla mpefala go feta mo?’ Go na le masetlapelo a magolo le bošoro bjo bontši kudu moo batho ba bangwe ba dumelago gore bofelo bja lefase bo swanetše go ba bo le kgauswi. Na seo ke therešo? Na go na le kamoo re ka tsebago seo se tlago go direga nakong e tlago? Ee. Gaešita le ge batho ba ka se kgone go bolela e sa le pele seo se tlago go direga, Jehofa Modimo o a kgona. O diriša Beibele go re botša ka bokamoso bja rena le seo se tlago go direga lefaseng nakong e tlago.Jesaya 46:10; Jakobo 4:14.

2, 3. Barutiwa ba Jesu ba be ba nyaka go tseba’ng, gona Jesu o ile a ba araba bjang?

2 Beibele ge e bolela ka bofelo bja lefase, ga e re gore go tla fedišwa polanete ye ya rena, eupša e ra gore go tla fedišwa bobe. Jesu o rutile batho gore Mmušo wa Modimo o tla buša lefase ka moka. (Luka 4:43) Barutiwa ba gagwe ba be ba nyaka go tseba gore Mmušo wa Modimo o tlo tla neng. Ka gona ba ile ba mmotšiša gore: “Dilo tše di tla direga neng, le gona pontšho ya go ba gona ga gago le ya bofelo bja tshepedišo ya dilo e tla ba eng?” (Mateo 24:3) Jesu ga se a ka a ba nea letšatši la go lebanya, eupša o ile a ba botša dilo tšeo di bego di tla direga pejana ga bofelo bja lefase le. Dilo tšeo Jesu a di boletšego, di a direga gona bjale.

3 Kgaolong ye, re tlo ahlaahla bohlatse bjo bo bontšhago gore bofelo bja lefase bo kgauswi. Sa pele, re swanetše  go ithuta ka ntwa yeo e bilego gona legodimong e le gore re tle re kwešiše gore ke ka baka la eng maemo e le a mabe ka tsela ye mo lefaseng.

NTWA LEGODIMONG

4, 5. (a) Go ile gwa direga’ng legodimong ka morago ga gore Jesu e be Kgoši? (b) Go ya ka Kutollo 12:12, go be go tla direga’ng ka morago ga gore Sathane a lahlelwe mo lefaseng?

4 Go Kgaolo 8 re ithutile gore Jesu e bile Kgoši legodimong ka 1914. (Daniele 7:13, 14) Puku ya Kutollo e re botša seo se diragetšego. E re: “Ntwa ya tsoga legodimong. Mikaele [ke gore, Jesu] le barongwa ba gagwe ba lwa le drakone [Sathane] gomme drakone le barongwa ba yona ba lwa.” * Sathane le batemona ba gagwe ba ile ba fenywa ntweng yeo gomme ba lahlelwa mo lefaseng. Nagana kamoo barongwa ba ilego ba thaba ka gona! Eupša go be go tla direga’ng ka batho ba mo lefaseng? Beibele e re ba be ba tla welwa ke mathata. Ka baka la’ng? Ka gobane Diabolo o galefile kudu, “ka ge a tseba gore o na le nako e kopana.”Kutollo 12:7, 9, 12.

5 Diabolo o baka mathata a mantši kamoo a ka kgonago ka gona mo lefaseng. O galefile kudu ka gobane o šaletšwe ke nako e kopana pele Modimo a mo fediša. Anke re ahlaahleng seo Jesu a itšego se tlo direga mehleng ya bofelo.—Bala Tlhaloso 24.

MEHLA YA BOFELO

6, 7. Re ka re’ng ka ntwa le tlala lehono?

6 Ntwa. Jesu o itše: “Setšhaba se tla tsogela setšhaba gomme mmušo wa tsogela mmušo.” (Mateo 24:7) Batho ba bantši ba bolailwe dintweng mo mehleng ya rena go feta nakong le ge e le efe historing. Pego e nngwe yeo e tšwago  Mokgatlong wa Worldwatch e bontšha gore ga e sa le go tloga ka 1914, dintwa di bolaile batho ba ka godimo ga ba dimilione tše 100. Batho bao ba fetago palo yeo gararo ba bolailwe dintweng mengwageng e 100 ya magareng ga 1900 le 2000 go feta bao ba bolailwego mengwageng e 1 900 e fetilego. Anke o nagane manyami le bohloko bjo bo kwelwego ke batho ba dimilione ka baka la ntwa!

7 Tlala. Jesu o itše: “Go tla ba le tlhaelelo ya dijo.” (Mateo 24:7) Gaešita le ge go tšweletšwa dijo tše dintši lehono go feta le ge e le neng pele, batho ba bantši ba bolawa ke tlala. Ka baka la’ng? Ka gobane ga ba na tšhelete e lekanego ya go reka dijo goba ga ba na naga yeo ba ka e lemago. Batho ba ka godimo ga bilione ba phela ka tšhelete e nyenyane kudu ka letšatši. Mokgatlo wa Lefase wa tša Maphelo o re ngwaga o mongwe le o mongwe go hwa bana ba dimilione ka gobane ga ba hwetše dijo tše di lekanego tša go ba fepa.

8, 9. Ke’ng seo se bontšhago gore dilo tšeo Jesu a di boletšego e sa le pele ka ditšhišinyego tša lefase le malwetši di a phethagala?

8 Ditšhišinyego tša lefase. Jesu  o porofetile gore: “Go tla ba le ditšhišinyego tše dikgolo tša lefase.” (Luka 21:11) Gona bjale go letetšwe gore ngwaga le ngwaga go be le ditšhišinyego tša lefase tše dintši le tše matla. Ga e sa le go tloga ka ngwaga wa 1900, batho ba ka godimo ga dimilione tše pedi ba bolailwe ke ditšhišinyego tša lefase. Le gona, gaešita le ge gona bjale thekinolotši e thušitše gore go bonwe ditšhišinyego tša lefase pele di ka direga, batho ba bantši ba sa dutše ba bolawa ke tšona ditšhišinyego tšeo tša lefase.

9 Malwetši. Jesu o boletše e sa le pele gore go tla ba le “malwetši.” Malwetši a kotsi a tla phatlalala kapejana gomme a bolaya batho ba bantši. (Luka 21:11) Gaešita le ge dingaka di ithutile go alafa malwetši a mantši, go sa dutše go na le malwetši ao a ka se alafegego. Ge e le gabotse, pego e nngwe e hlalosa gore ngwaga le ngwaga, batho ba dimilione ba bolawa ke malwetši a go swana le bolwetši bja mafahla, malaria le kholera. Go oketša moo, dingaka di hweditše malwetši a mangwe a 30 a mafsa, gomme a mangwe a ona ga a alafege.

 BOITSHWARO BJA BATHO BA MEHLENG YA BOFELO

10. Lengwalo la 2 Timotheo 3:1-5 le phethagala bjang lehono?

10 Lengwalo la 2 Timotheo 3:1-5, le re: “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona.” Moapostola Paulo o hlalositše kamoo batho ba bantši ba tlago go itshwara ka gona mehleng ya bofelo. O itše batho e tla ba

  • baithati

  • ba go rata tšhelete

  • ba go se kwe batswadi

  • ba go se botege

  • ba go se rate malapa a bona

  • ba se nago boitshwaro

  • ba bogale le ba go rata dintwa

  • ba go rata maipshino go feta Modimo

  • ba go itira eka ba rata Modimo eupša ba sa nyake go mokwa

11. Go ya ka Psalme 92:7, go tla direga’ng ka batho ba babe goba ba kgopo?

11 Na batho ba bantši ba itshwara ka tsela ye moo o dulago gona? Batho ba bantši lefaseng ka moka ba itshwara ka tsela ye. Eupša Modimo o kgauswi le go fetoša maemo a. O holofetša  gore: “Ge ba kgopo ba hloga go etša dimela, le ge bohle bao ba tlwaetšego go dira tšeo di gobatšago ba hloga, ke ka morero wa gore ba tle ba fedišetšwe sa ruri.”Psalme 92:7.

DITABA TŠE DIBOTSE MEHLENG YA BOFELO

12, 13. Jehofa o re rutile’ng mehleng ye ya bofelo?

12 Beibele e boletše e sa le pele gore mehleng ya bofelo, lefase le tla tlala ka bohloko le tlaišego. Le gona Beibele e re go tla direga dilo tše dibotse.

“Ditaba tše tše dibotse tša Mmušo di tla bolelwa lefaseng ka moka.”Mateo 24:14

13 Go kwešiša Beibele. Moporofeta Daniele o ngwadile mabapi le mehla ya bofelo gore: “Tsebo ya therešo e tla ata.” (Daniele 12:4) Modimo o be a tla nea batho ba gagwe bokgoni bja go kwešiša Beibele ka mo go kwagalago kudu go feta pele. Jehofa o dirile se kudukudu ga e sa le go tloga ka 1914. Ka mohlala, o re rutile bohlokwa bja leina la gagwe le morero wa gagwe ka lefase gotee le therešo ka sehlabelo sa topollo, le seo se diregago ge re ehwa gotee le ka tsogo. Re ithutile gore ke Mmušo wa Modimo feela wo o ka rarollago mathata a rena ka moka. Le gona re ithutile kamoo re ka hwetšago lethabo le kamoo re ka phelago ka tsela e kgahlišago Modimo. Eupša bahlanka ba Modimo ba dira’ng ka seo ba ithutilego sona? Boporofeta bjo bongwe bo re nea karabo.—Bala Tlhaloso 21 le 25.

14. Ditaba tše dibotse tša Mmušo di bolelwa kae, gona di bolelwa ke bomang?

14 Modiro wa go bolela ditaba tše dibotse lefaseng ka moka. Ge Jesu a be a bolela ka mehla ya bofelo o itše: “Ditaba tše tše dibotse tša Mmušo di tla bolelwa lefaseng ka moka.” (Mateo 24:3, 14) Ditaba tše dibotse tša Mmušo di bolelwa dinageng tša ka godimo ga tše 230 ka maleme a ka godimo ga a 700. Ee, lefaseng ka moka, Dihlatse tša Jehofa tše di tšwago “ditšhabeng tšohle [le] melokong yohle” di thuša batho go kwešiša gore Mmušo wa Modimo ke eng le  seo o tlago go se direla batho. (Kutollo 7:9) Le gona di dira se mahala. Le ge di hloilwe le go tlaišwa ke batho ba bantši, ga go na seo se ka dirago gore di tlogele go bolela ditaba tše dibotse, bjalo ka ge Jesu a porofetile.Luka 21:17.

O TLA DIRA ENG?

15. (a) Na o a dumela gore re phela mehleng ya bofelo, gona ka baka la’ng? (b) Go tlo direga’ng ka batho bao ba kwago Jehofa le ka bao ba sa mo kwego?

15 Na o a dumela gore re phela mehleng ya bofelo? Diporofeto tše dintši tša Beibele tša mabapi le mehla ya bofelo di a phethagala. Kgauswinyane Jehofa o tla laela gore modiro wa go bolela ditaba tše dibotse o se sa dirwa gomme “bofelo” bo tla tla. (Mateo 24:14) Bofelo ke’ng? Ke ntwa ya Haramagedone, ge Modimo a tlo fediša bobe ka moka. Jehofa o tla diriša Jesu le barongwa ba gagwe ba matla go fediša motho le ge e le ofe yo a sa nyakego go kwa Yena le Morwa wa gagwe. (2 Bathesalonika 1:6-9) Ka morago ga moo, Sathane le batemona ba gagwe ba ka se sa aroša batho. Le gona bohle bao ba nyakago go kwa Modimo le go amogela Mmušo wa gagwe ba tla bona kholofetšo e nngwe le e nngwe ya Modimo e phethagala.Kutollo 20:1-3; 21:3-5.

16. Ka ge bofelo bo le kgauswi kudu, o swanetše go dira’ng?

16 Kgauswinyane lefase le leo le bušwago ke Sathane le tla fedišwa. Ka gona go bohlokwa kudu gore re ipotšiše gore: ‘Ke swanetše go dira’ng?’ Jehofa o nyaka gore o ithute dilo tše dintši ka Beibeleng kamoo o ka kgonago ka gona. O swanetše go tšeela thuto ya gago godimo. (Johane 17:3) Dihlatse tša Jehofa di ba le diboka beke e nngwe le e nngwe go thuša batho go kwešiša Beibele. Dira sohle seo o ka se kgonago go ba gona dibokeng tšeo ka mehla. (Bala Baheberu 10:24, 25.) Ge o lemoga gore o swanetše  go dira diphetogo, o se ke wa tšhaba go di dira. Ge o dutše o dira diphetogo tšeo, tswalano ya gago le Jehofa e tla ba matla.Jakobo 4:8.

17. Ke ka baka la’ng batho ba bantši ba tla makala ge bofelo bo fihla?

17 Moapostola Paulo o hlalositše gore go fedišwa ga batho ba babe go tla tla ge batho ba bantši ba sa itebetše, ‘go swana le lehodu la bošego.’ (1 Bathesalonika 5:2) Jesu o porofetile gore batho ba bantši ba tla kgetha go hlokomologa bohlatse bja gore re phela mehleng ya bofelo. O itše: “Go etša feela kamoo mehla ya Noa e bego e le ka gona, le go ba gona ga Morwa wa motho [goba, mehla ya bofelo] go tla ba bjalo. Gobane go etša ge ba be ba le bjalo mehleng yeo ya pele ga Meetsefula, ba eja ba enwa, banna ba nyala le basadi ba nyalwa, go fihla letšatšing leo Noa a tsenego ka lona arekeng, ba se ele hloko go fihla Meetsefula a etla a ba gogola ka moka, le go ba gona ga Morwa wa motho go tla ba bjalo.”Mateo 24:37-39.

18. Jesu o re neile temošo efe?

18 Jesu o re lemošitše gore ga se ra swanela go šitišwa ke “bojagobe, go nwa kudu le dipelaelo tša bophelo.” O boletše gore bofelo bo tla tla kapejana, “go etša molaba.” Le gona o boletše gore bo “tla tlela bohle bao ba dulago lefaseng.” Ke moka a oketša ka gore: “Dulang le phakgame ka dinako tšohle le lopa [goba, le rapela ka go tšwa pelong] gore le atlege ka go phonyokga dilo tše ka moka tše di reretšwego go direga, le go ema pele ga Morwa wa motho.” (Luka 21:34-36) Ke ka baka la’ng go le bohlokwa kudu gore re theetše temošo ye ya Jesu? Ka gobane kgauswinyane lefase le lebe la Sathane le tlo fedišwa. Ke feela bao ba amogelwago ke Jehofa le Jesu ba tlago go phologa bofelo gomme ba phela ka mo go sa felego lefaseng le lefsa.Johane 3:16; 2 Petro 3:13.

^ par. 4 Mikaele ke leina le lengwe la Jesu Kriste. Gore o hwetše ditaba ka botlalo, hle bala Tlhaloso 23.

Ithute ka mo go oketšegilego

“Bofelo”—Bo Bolela Eng?

Na o be o tseba gore seo Beibele e se boelago ka “bofelo” ge e le gabotse ke ditaba tše dibotse?