Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 Kgaolo Ya Bobedi

Beibele ke Puku e Tšwago go Modimo

Beibele ke Puku e Tšwago go Modimo

1, 2. Ke ka baka la’ng Beibele e le mpho e kgahlišago kudu e tšwago go Modimo?

O IKWA bjang ge mogwera wa gago a go nea mpho o sa letela? O hlaganela go e bula, e bile o thabela gore mogwera wa gago o ile a nagana ka wena. O a mo leboga.

2 Beibele ke mpho e tšwago go Modimo. E re botša ditaba tšeo go se nago moo re ka di hwetšago gona. Ka mohlala, e re botša gore Modimo o bopile magodimo, lefase le monna wa pele le mosadi. E re nea melao ya motheo yeo e ka re thušago ge re na le mathata. Ka Beibeleng, re ithuta kamoo Modimo a tlago go phethagatša morero wa gagwe wa go dira gore lefase le kgahliše. Beibele ke mpho e kgahlišago kudu!

3. O tla lemoga’ng ge o dutše o ithuta Beibele?

3 Ge o dutše o ithuta Beibele, o tla lemoga gore Modimo o nyaka gore o be mogwera wa gagwe. Ge o dutše o ithuta ka yena, segwera sa lena se tla gola.

4. Ke’ng seo se go kgahlago ka Beibele?

4 Beibele e fetoletšwe ka maleme a e ka bago a 2 600, gomme go gatišitšwe dikopi tše dibilione. Batho ba dibilione lefaseng ba ka kgona go bala Beibele ka segagabo bona. Le gona beke e nngwe le e nngwe, batho ba ka godimo ga milione ba hwetša Beibele! Ee, ga go na puku e nngwe yeo e swanago le Beibele.

5. Ke ka baka la’ng re ka re Beibele e “buduletšwe ke Modimo”?

5 Beibele e “buduletšwe ke Modimo.” (Bala 2 Timotheo 3:16.) Eupša batho ba bangwe ba ka botšiša gore:  ‘Ka ge Beibele e ngwadilwe ke batho, go tla bjang gore go thwe e tšwa go Modimo?’ Beibele e araba ka gore: “Batho ba boletše se se tšwago go Modimo ge ba be ba šušumetšwa [goba, ba hlahlwa] ke moya o mokgethwa.” (2 Petro 1:21) Taba ye e swana le rakgwebo yo a botšago mongwaledi wa gagwe gore a ngwale lengwalo. Mongwadi wa lengwalo leo ke mang? Ke rakgwebo, e sego mongwaledi wa gagwe. Ka mo go swanago, Mongwadi wa Beibele ke Modimo, e sego batho bao a ba dirišitšego gore ba e ngwale. Modimo o ile a ba hlahla gore ba ngwale dikgopolo tša gagwe. Ruri Beibele ke “lentšu la Modimo.”1 Bathesalonika 2:13; bala Tlhaloso 2.

Phetolelo ya Lefase le Lefsa ya Mangwalo a Makgethwa e hwetšagala ka maleme a mantši

 BEIBELE E NEPAGETŠE

6, 7. Ke ka baka la’ng re ka re Beibele e a dumelelana?

6 Go tšere mengwaga ya ka godimo ga e 1 600 Beibele e ngwalwa. Bangwadi ba yona ba phetše dinakong tše di sa swanego. Ba bangwe ba be ba rutegile eupša ba bangwe ba se ba rutega. Ka mohlala, yo mongwe e be e le ngaka. Ba bangwe e be e le balemi, barei ba dihlapi, badiši, baporofeta, baahlodi le dikgoši. Gaešita le ge Beibele e ngwadilwe ke batho ba fapafapanego, dikarolo tša yona ka moka di a dumelelana. Dikgaolo tša yona ga di ganetšane. *

7 Dikgaolo tša mathomo tša Beibele di hlalosa kamoo mathata a lefase a thomilego ka gona, gomme dikgaolo tša mafelelo di re botša kamoo Modimo a tlago go rarolla mathata ao ka gona ka go dira gore lefase e be paradeise. Beibele e akaretša mengwaga e dikete ya histori ya batho gomme e bontšha gore ka mehla morero wa Modimo o a phethagala.

8. Nea mehlala yeo e bontšhago gore Beibele e nepagetše ditabeng tša thutamahlale.

8 Beibele e be e se ya ngwalelwa go re ruta thutamahlale goba gore e be puku yeo e ithutwago sekolong, eupša ka mehla seo e se bolelago ka thutamahlale se nepagetše. Se ke seo re ka se letelago ka puku yeo e tšwago go Modimo. Ka mohlala, puku ya Lefitiko e na le ditaelo tša Modimo tša kamoo Baisiraele ba bego ba ka thibela malwetši gore a se ke a phatlalala. Ditaelo tše di ngwadilwe kgale pele batho ba tseba kamoo dipaketheria le ditwatši di bakago malwetši ka gona. Le gona Beibele e ruta ka mo go nepagetšego gore lefase le fegilwe lefeeleng. (Jobo 26:7) Le gona ge batho ba bantši ba be ba dumela gore lefase ke  phaphathi, Beibele e boletše gore ke ntikodiko.Jesaya 40:22.

9. Go botega ga bangwadi ba Beibele go re thuša go kwešiša’ng?

9 Ka mehla Beibele e nepagetše ge e bolela ka histori. Eupša dipuku tše dintši tša histori ga di bolele therešo e feletšego ka gobane bangwadi ba tšona ba be ba sa botege. Ka mohlala, ga se ka mehla moo ba ilego ba ngwala ka dinako tša ge ditšhaba tša gabo bona di be di fenywa ntweng. Go e na le moo, bangwadi ba Beibele ba be ba botega ka gobane ba be ba ngwala therešo gaešita le ge Baisiraele ba fentšwe. Ba ngwadile le ka diphošo tša bona. Ka mohlala, ka pukung ya Numeri, Moshe o re botša gore o ile a dira phošo e kgolo le gore Modimo o ile a swanelwa ke go mo otla ka baka la phošo yeo. (Numeri 20:2-12) Go botega ga bangwadi ba Beibele go bontšha gore Beibele e tšwa go Modimo. Se se ra gore re ka bota Beibele.

PUKU YEO E NAGO LE KELETŠO E BOTSE

10. Ke ka baka la’ng keletšo ya Beibele e re tšwela mohola lehono?

10 Beibele e “buduletšwe ke Modimo gomme [e] hola ka go ruta, go kgala [le] go phošolla.” (2 Timotheo 3:16) Ee, keletšo ya Beibele e re tšwela mohola lehono. Jehofa o tseba kamoo re bopilwego ka gona, ka baka leo, o kwešiša kamoo re naganago le kamoo re ikwago ka gona. O re tseba go feta kamoo re itsebago ka gona gomme o nyaka gore re thabe. O tseba seo se tlago go re hola le seo se tlago go re gobatša.

11, 12. (a) Ke keletšo efe e botse yeo Jesu a e neilego go Mateo kgaolo 5 go ya go 7? (b) Ke selo sefe se sengwe seo re ka ithutago sona ka Beibeleng?

11 Go Mateo kgaolo 5 go ya go 7, re bala ka keletšo e botse kudu yeo Jesu a e neilego ya kamoo re ka thabago, kamoo re ka phedišanago le batho ba bangwe, kamoo re ka rapelago le kamoo re ka bago le pono e nepagetšego  ka tšhelete. Gaešita le ge a neile keletšo ye mengwaga e 2 000 e fetilego, e sa dutše e le matla le go ba le mohola lehono.

12 Ka Beibeleng, Jehofa o re ruta le melao ya motheo yeo e re thušago go phela bophelo bjo bokaone bja lapa, go šoma ka thata le go phedišana ka khutšo le batho ba bangwe. Melao ya motheo ya Beibele ka mehla e ka re thuša, go sa šetšwe gore re bomang, re dula kae goba gore re na le mathata afe.—Bala Jesaya 48:17; bala Tlhaloso 3.

O KA BOTA BOPOROFETA BJA BEIBELE

Mongwadi wa Beibele e lego Jesaya o boletše e sa le pele gore motse wa Babilona o tlo fenywa

13. Jesaya o be a boletše gore go tlo direga’ng ka motse wa Babilona?

13 Diporofeto tše dintši tša Beibele di šetše di phethagetše. Ka mohlala, Jesaya o ile a porofeta gore motse wa Babilona o be o tla fedišwa. (Jesaya 13:19) O hlalositše tlwaa kamoo motse woo o bego o tla fenywa ka gona. Motse woo o be o šireleditšwe ka dikgoro tše dikgolo le noka. Eupša Jesaya o boletše e sa le pele gore noka yeo e be e tla gopa gomme dikgoro tša yona tša tlogelwa di butšwe. Bao ba bego ba tlo o hlasela ba be ba tlo o thopa ntle le go lwa le wona. Jesaya o porofetile le gore monna yo a bitšwago Korese ke yena a bego a tlo fenya Babilona.Bala Jesaya 44:27–45:2; bala Tlhaloso 4.

14, 15. Boporofeta bja Jesaya bo ile bja phethagala bjang?

14 Mengwaga e 200 ka morago ga gore boporofeta bjoo bo ngwalwe, madira a ile a fihla a loketše go hlasela Babilona. Ke mang a bego a eteletše pele madira ao? E be e le Korese, kgoši ya Peresia, bjalo ka ge boporofeta bjoo bo be bo boletše. Eupša na madira a Korese a be a tla thopa Babilona ntle le go lwa le yona, go etša ge go boletšwe e sa le pele?

15 Bošegong bja ge motse woo o hlaselwa, Bababilona  ba be ba dirile monyanya. Ba ile ba ikwa ba sa boife selo ka gobane ba be ba šireleditšwe ke merako e megolo le noka. Korese le madira a gagwe ba ile ba epa moedi ka ntle ga motse gore ba fokotše meetse a noka yeo. Meetse ao a ile a fokotšega ka mo go lekanego gore madira a Baperesia a kgone go tshela noka yeo. Eupša madira ao a be a tlo feta bjang merakong ya Babilona? Go etša ge boporofeta  bjoo bo boletše, dikgoro tša motse di ile tša tlogelwa di sa tswalelwa, ka gona madira ao a ile a thopa motse woo ntle le go lwa le Bababilona.

16. (a) Jesaya o porofetile eng ka bokamoso bja Babilona? (b) Re tseba bjang gore boporofeta bja Jesaya bo ile bja phethagala?

16 Jesaya o porofetile gore mafelelong ga go na motho yo a tla boelago a dula Babilona. O ngwadile gore: “E ka se sa dulwa le ka mohla, e bile e ka se be le baagi go iša melokong le melokong.” (Jesaya 13:20) Na seo se ile sa phethagala? Moo motse wa Babilona o bego o le gona, dikhilomithara tše e ka bago tše 80 ka borwa bja Baghdad, kua Iraq, ke mašope feela. Le lehono, ga go na motho yo a dulago moo. Jehofa o swietše Babilona “ka leswielo la phedišo.”Jesaya 14:22, 23. *

Mašope a Babilona

17. Ke ka baka la’ng re ka bota dikholofetšo ka moka tša Modimo?

17 Taba ya gore diporofeto tše dintši tša Beibele di šetše di phethagetše e ra gore re ka bota seo Beibele e se  bolelago ka bokamoso. Re ka kgodišega gore Jehofa o tla phethagatša kholofetšo ya gagwe ya go dira lefase paradeise. (Bala Numeri 23:19.) Ee, re na le kholofelo ya “bophelo bjo bo sa felego bjo Modimo yo a ka se kego a aketša a bo holofeditšego mehleng ya bogologolo.”Tito 1:2. *

BEIBELE E KA FETOŠA BOPHELO BJA GAGO

18. Paulo o hlalosa bjang “lentšu la Modimo”?

18 Re ithutile gore ga go na puku e nngwe yeo e swanago le Beibele. E a dumelelana, le gona ge e bolela ka ditaba tša thutamahlale goba tša histori, ka mehla e nepagetše. Le gona e re nea keletšo e botse e bile e na le diporofeto tše dintši tšeo di šetšego di phethagetše. Eupša ga go felele fao. Moapostola Paulo o ngwadile gore: “Lentšu la Modimo le a phela e bile ke le matla.” Seo se ra go re’ng?Bala Baheberu 4:12.

19, 20. (a) Beibele e ka go thuša bjang gore o itsebe gabotse? (b) O ka bontšha bjang gore o leboga mpho yeo e lego Beibele?

19 Beibele e ka fetoša bophelo bja gago. E ka go thuša gore o itsebe gabotse. E ka go thuša go kwešiša dikgopolo tša gago tša ka garegare le maikwelo a gago. Ka mohlala, re ka nagana gore re rata Modimo. Eupša go bontšha gore re a mo rata, re swanetše go diriša seo Beibele e se bolelago.

20 Ruri Beibele ke puku e tšwago go Modimo. O nyaka gore o e bale, o ithute yona le go e rata. Leboga mpho ye gomme o tšwele pele o ithuta yona. Ge o ka dira bjalo, o tla kwešiša morero wa Modimo ka batho. Sehlogong se se latelago, re tlo ithuta ka mo go oketšegilego ka morero wo.

^ par. 6 Batho ba bangwe ba re Beibele ga e dumelelane, eupša seo ga se therešo. Bala kgaolo 7 ka pukung ya Beibele—Na ke Lentšu la Modimo Goba la Motho? yeo e gatišitšwego ke Dihlatse tša Jehofa.

^ par. 16 Ge e ba o nyaka go ithuta ka mo go oketšegilego ka boporofeta bja Beibele, o ka bala matlakala 27-29 ka poroutšheng ya Puku ya Batho ka Moka, yeo e gatišitšwego ke Dihlatse tša Jehofa.

^ par. 17 Go fedišwa ga motse wa Babilona ke bjo bongwe bja diporofeto tše dintši tša Beibele tšeo di ilego tša phethagala. O ka hwetša ditaba tša mabapi le diporofeto tšeo di bolelago ka Jesu Kriste go Tlhaloso 5.

Ithute ka mo go oketšegilego

Na Beibele e Bolela Therešo?

Ge eba Beibele e ngwadilwe ke Modimo, e swanetše go ba puku ya moswananoši yeo e kilego ya ngwalwa.

Therešo ya Beibele e Ile ya Utollwa Lefsa Bjang?

Re ka tseba bjang gore re hweditše therešo yeo e lego ka Beibeleng?