Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Beibele e re Ruta Eng?

 KGAOLO YA BOŠUPA

Bahu ba tlo Tsoga!

Bahu ba tlo Tsoga!

1-3. Ka moka ga rena re bagolegwa ba eng, gona Jehofa o tlo re lokolla bjang?

NAGANA o be o ahloletšwe bophelo ka moka kgolegong ka molato wo o sego wa o dira. Ga go na gore o tsoge o lokolotšwe. Go bonagala go fedile ka wena, e bile go se na seo o ka se dirago. Eupša ge o šetše o se na kholofelo, o kwa ba re go na le motho yo mongwe yo a nago le matla a go go lokolla kgolegong yeo e bile o holofeditše gore o tla go thuša! O be o tla ikwa bjang?

2 Ka moka ga rena re bagolegwa ba lehu. Ga go na seo re ka se dirago go tšhabela lehu. Eupša Jehofa o na le matla a go re lokolla lehung. Le gona o re holofeditše gore o tlo ‘fediša lehu, e lego lenaba la mafelelo.’1 Bakorinthe 15:26.

3 Nagana kamoo o tlago go thaba ka gona ge o tseba gore ga o sa tlo hwa! Eupša Jehofa ga a tlo fediša lehu feela. O tlo tsoša le bao ba šetšego ba hwile. Nagana gore se se tla bolela eng go wena. Jehofa o holofetša gore “bao ba hwilego” ba tlo boela ba phela. (Jesaya 26:19) Beibele e bitša tiragalo yeo gore ke tsogo.

GE MOTHO YO O MO RATAGO A HWILE

4. (a) Ke’ng seo se ka re homotšago ge setho sa lapa goba mogwera wa rena a hwile? (b) Ba bangwe ba bagwera ba Jesu ba bagolo e be e le bomang?

4 Ge setho sa lapa goba mogwera wa rena a hwile, re kwa bohloko kudu. Re ikwa re fedile matla. Ga go na seo re ka se dirago go tsoša motho yoo. Eupša Beibele e re  homotša kudu. (Bala 2 Bakorinthe 1:3, 4.) Anke re ahlaahleng mehlala e mengwe yeo e bontšhago gore Jehofa le Jesu ba tloga ba nyaka go tsoša bahu. Ge Jesu a be a le mo lefaseng, o be a tlwaetše go etela Latsaro le dikgaetšedi tša gagwe e lego Mareta le Maria. Ka moka ga bona e be e le bagwera ba bagolo ba Jesu. Beibele e re: “Jesu o be a rata Mareta le ngwanabo le Latsaro.” Ke moka ka letšatši le lengwe Latsaro o ile a hwa.Johane 11:3-5.

5, 6. (a) Jesu o ile a dira’ng ge a be a bona ba gabo Latsaro le bagwera ba gagwe ba lla? (b) Ke ka baka la’ng go tseba kamoo Jesu a ilego a ikwa ka gona ka lehu go re homotša?

5 Jesu o ile a yo homotša Mareta le Maria. Ge Mareta a ekwa gore Jesu o etla, o ile a tšwela ka ntle ga motse go yo mo gahlanetša. O ile a thaba kudu go bona Jesu, eupša a re go yena: “Morena, ge nkabe o be o le mo, kgaetšedi ya ka nkabe a se a hwa.” Mareta o be a nagana gore Jesu o tletše lefeela. Ka morago ga moo, Jesu o ile a bona ngwanabo Mareta e lego Maria a lla. Ge a bona kamoo ba nyamilego ka gona, o ile a kwa bohloko kudu gomme a thoma go lla. (Johane 11:21, 33, 35) O be a kwele bohloko bjo bogolo bjoo re bo kwago ge re hwetšwe ke motho yo re mo ratago.

6 Go tseba gore Jesu le yena o kwa bohloko ge re hwetšwe go a re homotša. Le gona Jesu o swana le Tatagwe. (Johane 14:9) Jehofa o na le matla a go fedišetša lehu sa ruri, gomme kgauswinyane o tlo dira sona seo.

“LATSARO, TŠWAA!”

7, 8. Ke ka baka la’ng Mareta a be a sa nyake gore leswika le tlošwe mojakong wa lebitla la Latsaro, eupša Jesu o ile a dira’ng?

7 Ge Jesu a fihla lebitleng leo Latsaro a bego a bolokilwe go lona, mojako wa lona o be o tswaletšwe ka leswika le legolo. Jesu o ile a re: “Tlošang leswika le.” Eupša  Mareta o be a sa nyake ba le tloša. Latsaro o be a šetše a na le matšatši a mane a bolokilwe. (Johane 11:39) Mareta o be a sa tsebe seo Jesu a bego a le kgauswi le go se dira ka Latsaro.

Nagana kamoo ba gabo Latsaro le bagwera ba gagwe ba ilego ba thaba ka gona ge ba bona a tsošitšwe bahung!Johane 11:38-44

8 Jesu o ile a re go Latsaro: “Tšwaa!” Mareta le Maria ba ile ba se kgolwe mahlo a bona. Beibele e re: “Motho yo a bego a hwile a tšwa dinao tša gagwe le diatla tša gagwe di tateditšwe ka mašela.” (Johane 11:43, 44) Latsaro o be a tsošitšwe bahung! O ile a kopanywa gape le ba gabo le bagwera. Ba be ba kgona go mo swara, go mo kgwatha le go bolela le yena. Ruri wo e be e le mohlolo! Jesu o be a tsošitše Latsaro bahung.

“MOSETSANA, KE RE GO WENA: ‘TSOGA!’”

9, 10. (a) Ke mang a ilego a nea Jesu matla a go tsoša bahu? (b) Ke ka baka la’ng go bala ka batho bao ba kilego ba tsošwa bahung go re homotša?

9 Na Jesu o be a tsoša bahu ka matla a gagwe? Aowa. Pele ga ge a ka tsoša Latsaro, Jesu o ile a rapela Jehofa gomme Jehofa a mo nea matla a go tsoša Latsaro. (Bala Johane 11:41, 42.) Latsaro ga se yena feela a ilego a tsošwa bahung. Beibele e re botša gape ka ngwanenyana yo mongwe wa mengwaga e 12 yo a bego a babja o šoro. Tatagwe e lego Jairo, o be a nyaka yo a ka mo thušago, gomme a lopa Jesu gore a fodiše ngwana wa gagwe. E be e le ngwana a nnoši wa gagwe. Ge Jairo a sa bolela le Jesu, banna ba bangwe ba ile ba tla gomme ba re: “Morwedi wa gago o hwile! Ke ka baka la’ng o sa tshwenya Morutiši?” Eupša Jesu a re go Jairo: “O se ke wa boifa, wena bontšha tumelo feela gomme yena o tla phološwa.” Ke moka a ya le Jairo ntlong ya gagwe. Ge ba batametše ntlo ya Jairo, Jesu o ile a bona le go kwa batho ba lla. Ke  moka a re go bona: “Lesang go lla gobane ga se a hwa eupša o robetše.” Batswadi ba ngwanenyana yoo ba swanetše go ba ba ile ba ipotšiša gore Jesu o be a e ra go reng. Jesu o ile a botša batho ka moka gore ba tšwele ka ntle, a tšea batswadi ba ngwanenyana yoo gomme ba tsena ka moo a bego a le gona. A swara ngwanenyana yoo ka seatla gomme a re go yena: “Mosetsana, ke re go wena: ‘Tsoga!’” Nagana lethabo leo batswadi ba gagwe ba bilego le lona ge gateetee ngwana wa bona a tsoga gomme a thoma go sepela! Jesu o be a tsošitše morwedi wa bona bahung. (Mareka 5:22-24, 35-42; Luka 8:49-56) Go tloga letšatšing leo, ge ba bona morwedi wa bona ba be ba tla gopola seo Jehofa a ba diretšego sona a diriša Jesu. *

10 Batho bao Jesu a ilego a ba tsoša bahung ba ile ba hwa gape. Eupša seo re se balago ka batho bao se a re homotša ka gobane se re bontšha seo se tlago go direga nakong e tlago. Jehofa o nyaka go tsoša bahu, gomme o tlo dira bjalo.

SEO RE ITHUTAGO SONA DIPEGONG TŠA MABAPI LE TSOGO

11. Mmoledi 9:5 e re botša’ng ka Latsaro ge a be a hwile?

11 Beibele e bolela ka mo go kwagalago gore “bahu ga ba tsebe selo le gatee.” Go be go le bjalo le ka Latsaro. (Mmoledi 9:5) Go etša ge Jesu a boletše, go be go le bjalo ka ge eka Latsaro o be a robetše. (Johane 11:11) Ge  Latsaro a be a le ka lebitleng, o be a sa tsebe “selo le gatee.”

12. Re tseba bjang gore Latsaro o ile a tsošwa bahung?

12 Ge Jesu a be a tsoša Latsaro bahung, batho ba bantši ba ile ba bona seo. Gaešita le manaba a Jesu a be a tseba gabotse gore o dirile mohlolo woo. Latsaro o be a phela, gomme se se ile sa bontšha gore ruri o tsošitšwe bahung. (Johane 11:47) Go oketša moo, batho ba bantši ba ile ba etela Latsaro, ka go re’alo ba thoma go dumela gore Jesu o romilwe ke Modimo. Manaba a Jesu a ile a se rate seo, ka gona a loga leano la go bolaya Jesu le Latsaro.Johane 11:53; 12:9-11.

13. Ke ka baka la’ng re kgodišegile gore Jehofa o tlo tsoša bahu?

13 Jesu o boletše gore “bohle bao ba lego mabitleng” a kgopotšo ba tlo tsošwa. (Johane 5:28) Se se bolela gore batho ka moka bao ba lego mogopolong wa Jehofa ba tlo boela ba phela. Eupša gore Jehofa a tle a tsoše motho yo a itšego, o swanetše go gopola selo se sengwe le se sengwe ka motho yoo. Na a ka kgona go dira seo? Nagana ka dinaledi tše dibilione tšeo Jehofa a di hlodilego. Beibele e re Jehofa o di tseba ka moka ga tšona ka maina. (Bala Jesaya 40:26.) Ge e ba Jehofa a kgona go gopola leina la naledi e nngwe le e nngwe, ga go pelaelo gore a ka kgona go gopola selo se sengwe le se sengwe ka batho bao a tlago go ba tsoša bahung. Sa bohlokwa kudu ke gore Jehofa ke yena a bopilego dilo ka moka, ka gona re a tseba gore o na le matla a go tsoša bahu.

14, 15. Mantšu a Jobo a re ruta’ng ka tsogo?

14 Monna yo a botegago e lego Jobo o be a dumela gore bahu ba tlo tsoga. O ile a botšiša gore: ‘Ge e ba motho a ka hwa, na a ka buša a phela?’ Ke moka a re go Jehofa: “O tla bitša, gomme nna ke tla go araba. O tla hlologela  modiro wa diatla tša gago.” Ee, Jobo o be a tseba gore Jehofa o lebeletše pele nakong ya ge a tlo tsoša bahu.Jobo 14:13-15.

15 O ikwa bjang ka taba ya gore bahu ba tlo tsoga? Mohlomongwe o ka ba o ipotšiša gore: ‘Go thwe’ng ka ba gešo le bagwera ba ka bao ba hwilego, na le bona ba tlo tsošwa?’ Go re homotša kudu go tseba gore Jehofa o fela pelo ya go tlo tsoša bahu. Anke re kweng gore Beibele e re bao ba tlago go tsošwa ba tlo phela kae le gore go tlo tsošwa bomang.

‘BA TLA KWA LENTŠU LA GAGWE’

16. Batho bao ba tlago go tsošwa bahung ba tlo thabela bophelo bja mohuta ofe?

16 Nakong e fetilego, batho bao ba ilego ba tsošwa bahung ba ile ba kopanywa gape le ba gabo bona le bagwera gona mo lefaseng. Seo se tlo direga le nakong e tlago, eupša ka nako yeo go tlo kgahliša le go feta. Ka baka la’ng? Ka gobane bao ba tlago go tsošwa mo lefaseng ba tlo ba le sebaka sa go phela ka mo go sa felego gomme ba se hlwe ba ehwa. E bile ba tlo thabela bophelo bjo bo fapanego le bjo re bo phelago lehono. Go tla ba go se na dintwa, bosenyi le malwetši.

17. Ke bomang bao ba tlago go tsošwa bahung?

17 Ke bomang bao ba tlago go tsošwa bahung? Jesu o itše ‘bohle bao ba lego mabitleng ba tlo kwa lentšu la gagwe gomme ba tšwa.’ (Johane 5:28, 29) Le gona Kutollo 20:13 e re botša gore: “Lewatle la ntšha bahu ba lego go lona, lehu le Bodulabahu tša ntšha bahu ba lego go tšona.” Ee, batho ba dibilione ba tlo tsošwa bahung. Moapostola Paulo le yena o boletše gore batho “ba lokilego gotee le ba sa lokago” ba tlo tsošwa. (Bala Ditiro 24:15.) Seo se ra go re’ng?

Paradeiseng, bahu ba tlo tsošwa gomme ba kopanywa gape le ba gabo bona le bagwera

18. Batho “ba lokilego” bao ba tlago go tsošwa ke bomang?

 18 Ge go bolelwa ka batho “ba lokilego,” go akaretšwa le bahlanka ba Jehofa ba botegago bao ba phetšego mehleng ya pele ga ge Jesu a ka tla lefaseng. Batho ba go swana le Noa, Aborahama, Sara, Moshe, Ruthe le Esitere ba tlo tsošwa gomme ba phela gona mo lefaseng. O ka bala ka ba bangwe ba banna bao le basadi lengwalong la  Baheberu kgaolo 11. Go thwe’ng ka bahlanka ba Jehofa ba botegago bao ba hwago lehono? Le bona ke batho “ba lokilego,” ka baka leo ba tlo tsošwa.

19. Batho “ba sa lokago” ke bomang? Jehofa o tlo ba nea sebaka sefe?

19 Batho “ba sa lokago” ke batho ba dibilione bao ba hwilego ba sa tsebe selo ka Jehofa. Le ge ba hwile, Jehofa ga se a ba lebala. O tlo ba tsoša, gomme a ba nea sebaka sa go ithuta ka yena le go mo hlankela.

20. Ke ka baka la’ng go ka se tsošwe batho ka moka?

20 Na se se bolela gore batho ka moka bao ba hwilego ba tlo tsošwa? Aowa. Jesu o boletše gore ba bangwe ba ka se tsošwe. (Luka 12:5) Ke mang a tlago go kgetha gore go tsošwa bomang? Jehofa ke yena Moahlodi yo mogolo, eupša o neile le Jesu matla a “gore e be moahlodi wa ba ba phelago le ba ba hwilego.” (Ditiro 10:42) Motho le ge e le ofe yo a ahlotšwego gore ke yo mobe gomme a sa nyake go sokologa a ka se tsošwe.—Bala Tlhaloso 19.

BAO BA TLAGO GO TSOŠETŠWA LEGODIMONG

21, 22. (a) Go tsošetšwa legodimong go bolela’ng? (b) Ke mang motho wa mathomo yo a ilego a tšošetšwa go yo phela legodimong?

21 Beibele e re botša le ka batho ba bangwe bao ba tlago go phela legodimong. Ge motho a tsošetšwa go yo phela legodimong, ga a tsošwe a na le mmele wa go swana le wa rena. O tsošetšwa go yo phela legodimong e le sebopiwa sa moya.

22 Jesu e bile motho wa mathomo wa go tsošwa bahung ka tsela yeo. (Johane 3:13) Matšatši a mararo ka morago ga gore Jesu a bolawe, Jehofa o ile a mo tsoša bahung. (Psalme 16:10; Ditiro 13:34, 35) Jesu ga se a tsošwa a na le mmele wa go swana le wa rena. Moapostola Petro o hlalositše gore Jesu “o ile a bolawa nameng, eupša a phedišwa moyeng.” (1 Petro 3:18) Jesu o ile a  tsošwa bahung e le sebopiwa se matla kudu sa moya! (1 Bakorinthe 15:3-6) Eupša Beibele e re go na le ba bangwe bao le bona ba tlago go tsošwa ka tsela yeo.

23, 24. Batho bao e lego “mohlatswana” bao Jesu a boletšego ka bona ke bomang, gona ke ba bakae ka palo?

23 Pejana ga lehu la gagwe, Jesu o ile a botša barutiwa ba gagwe ba botegago gore: “Ke a tloga ke ya go le lokišetša lefelo.” (Johane 14:2) Se se ra gore ba bangwe ba balatedi ba gagwe ba tlo tsošwa bahung gomme ba yo phela le yena legodimong. Ke ba bakae ka palo? Jesu o boletše gore e ka se be ba bantši, o itše ke “mohlatswana.” (Luka 12:32) Moapostola Johane o boletše palo ya bona ge a be a bona Jesu ‘a eme Thabeng ya Tsione ya legodimong a na le ba dikete tše lekgolo-masomenne-nne (144 000).’Kutollo 14:1.

24 Bakriste ba ba 144 000 ba be ba tlo tsošetšwa neng legodimong? Beibele e re botša gore seo se be se tlo direga ge Kriste a šetše a thomile go buša legodimong. (1 Bakorinthe 15:23) Re phela nakong yeo gona bjale, gomme ditho tše dintši tša Bakriste ba ba 144 000 di šetše di tsošeditšwe legodimong. Ge ditho tšeo di sa lego mo lefaseng di ehwa, di tsošetšwa legodimong gateetee. Lega go le bjalo, batho ba bangwe ka moka ba tlo tsošwa nakong e tlago gore ba phele Paradeiseng gona mo lefaseng.

25. Re tlo ithuta ka’ng kgaolong e latelago?

25 Kgauswinyane, Jehofa o tlo lokolla batho ka moka lehung, gomme a fedišetša lehu sa ruri! (Bala Jesaya 25:8.) Eupša bao ba yago legodimong ba yo dira’ng moo? Beibele e re botša gore ba yo buša le Jesu Mmušong wa Modimo. Re tlo ithuta ka Mmušo woo kgaolong e latelago.

^ par. 9 Go na le dipego tše dingwe tša ka Beibeleng tšeo di re botšago ka batho ba bagolo le ba banyenyane bao ba kilego ba tsošwa bahung, banna le basadi gotee le bao e bego e le Baisiraele le bao e bego e se Baisiraele. O ka bala ka tšona go 1 Dikgoši 17:17-24; 2 Dikgoši 4:32-37; 13:20, 21; Mateo 28:5-7; Luka 7:11-17; 8:40-56; Ditiro 9:36-42; 20:7-12.

Ithute ka mo go oketšegilego

Go Direga Eng ka Morago ga Lehu?

Ka Beibeleng go na le dipego tša batho ba seswai bao ba ilego ba boela ba phela. Ba itše’ng mabapi le bophelo bja ka morago ga lehu?

Itokišeletše Gona Bjale go tlo Phela Lefaseng le Lefsa

Go na le dilo tše dintši tšeo batho ba Modimo ba swanago ka tšona le batho bao ba itokišeletšago go hudugela nageng e nngwe.