Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ke Bomang Bao ba Dirago Thato ya Jehofa Lehono?

 THUTO 19

Mohlanka yo a Botegago le wa Temogo ke Mang?

Mohlanka yo a Botegago le wa Temogo ke Mang?

Ka moka ga rena re holwa ke dijo tša rena tša moya

Pejana ga lehu la gagwe, Jesu o ile a boledišana ka sephiring le ba bane ba barutiwa ba gagwe—Petro, Jakobo, Johane le Andrea. Ge Jesu a be a bolela e sa le pele ka leswao la go ba gona ga gagwe mehleng ya bofelo, o ile a rotoša potšišo ye e bohlokwa: “Ke mang yo ruri e lego mohlanka yo a botegago le wa temogo, yo Mong wa gagwe a mmeilego gore a hlokomele ba ntlo ya gagwe, gore a ba nee dijo tša bona ka nako e swanetšego?” (Mateo 24:3, 45; Mareka 13:3, 4) Jesu o be a kgonthišetša barutiwa ba gagwe gore bjalo ka “Mong” wa bona, o be a tla kgetha bao ba bego ba tla dula ba nea balatedi ba gagwe dijo tša moya mehleng ya bofelo. Ke mang yo e bego e tla ba mohlanka?

Ke sehlopha se senyenyane sa balatedi ba Jesu bao ba tloditšwego. “Mohlanka” yo go bolelwago ka yena ke Sehlopha se Bušago sa Dihlatse tša Jehofa. O nea barapedigotee le yena ba Jehofa dijo tša moya ka nako e swanetšego. Re ithekgile ka mohlanka yo yo a botegago gore a tšwele pele a re nea “tekanyo ya dijo tša [rena] ka nako e swanetšego.”—Luka 12:42.

O hlokomela tša ka ntlong ya Modimo. (1 Timotheo 3:15) Jesu o neile mohlanka yo boikarabelo bjo bogolo bja go hlokomela modiro wa karolo ya lefaseng ya mokgatlo wa Jehofa—go hlokomela dithoto tša wona, go etelela pele modiro wa boboledi le go re ruta ka diphuthego tša rena. Ka gona, e le gore a re nee seo re se nyakago ge re se nyaka, “mohlanka yo a botegago le wa temogo” o aba dijo tša moya ka dikgatišo tšeo re di dirišago bodireding bja rena, gotee le ka mananeo a diboka tša rena le dikopano.

Mohlanka yo o botegela ditherešo tša Beibele gotee le thomo ya gagwe ya go bolela ditaba tše dibotse, gomme o na le temogo mabapi le kamoo a hlokomelago ka bohlale dikgahlego tša Kriste mo lefaseng. (Ditiro 10:42) Jehofa o šegofatša mošomo wa mohlanka yo ka go dira gore go be le kgolo le go dira gore a kgone go nea dijo tše dintši tša moya.—Jesaya 60:22; 65:13.

  • Ke mang yo a kgethilwego ke Jesu gore a fepe barutiwa ba gagwe moyeng?

  • Mohlanka o botega le go ba le temogo ka ditsela dife?

Ithute ka mo go oketšegilego

“Ke Mang yo Ruri e Lego Mohlanka yo a Botegago le wa Temogo?”

Sehlogo se se lokiša kwešišo ya rena ka mohlanka yo a botegago le wa temogo. Bona kamoo katlego ya rena ya moya e ithekgilego ka mokero wo.