Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ke Eng Seo ge e le Gabotse Beibele e se Rutago?

 MAMETLETŠO

Selalelo sa Morena—Tiragalo Yeo e Hlomphago Modimo

Selalelo sa Morena—Tiragalo Yeo e Hlomphago Modimo

BAKRISTE ba laelwa gore ba bine Segopotšo sa lehu la Kriste. Monyanya wo gape o bitšwa “selalelo sa Morena.” (1 Ba-Korinthe 11:20) Ke’ng seo se lego bohlokwa gakaakaa ka wona? O swanetše go binwa neng le gona bjang?

Jesu Kriste o hlomile monyanya wo bošegong bja Paseka ya ba-Juda ka 33 C.E. Paseka e be e le monyanya woo o bego o swarwa gatee ka ngwaga, ka letšatši la bo-14 la kgwedi ya ba-Juda ya Nisani. Go bala letšatši-kgwedi leo, go bonagala ba-Juda ba be ba letela go dula ga ngwedi mo go diregago go ya mafelelong a March goba mathomong a April. Le ke letšatši leo go lona go nago le mo e nyakilego go ba diiri tše 12 tša mosegare le diiri tše 12 tša bošego. Ngwedi wa mathomo o mofsa woo o lemogwago wo o tšwelelago go ya mafelelong a March goba mathomong a April o be o swaya go thoma ga Nisani. Paseka e be e e-ba gona matšatši a 14 ka morago ga moo, ge letšatši le sobetše.

Jesu o ile a bina Paseka le baapostola  ba gagwe, a raka Judase Iskariote gomme ka morago a hloma Selalelo sa Morena. Selalelo se se tšeetše Paseka ya ba-Juda legato gomme ka baka leo se swanetše go binwa gatee feela ka ngwaga.

Ebangedi ya Mateo e bega gore: “Jesu a tšea senkgwa gomme ka morago ga go kgopela tšhegofatšo, a se ngwathaganya a se nea barutiwa, a re: ‘Tšeang le je. Se se bolela mmele wa-ka.’ Gape a tšea le senwelo gomme ka morago ga ge a lebogile, a ba nea sona a re: ‘Nwang go sona ka moka ga lena; gobane se se bolela “madi a-ka a kgwerano,” ao a tlago go tšhollelwa ba bantši bakeng sa tebalelo ya dibe.’”—Mateo 26:26-28.

Ba bangwe ba dumela gore Jesu o fetošitše senkgwa gore e be mmele wa gagwe wa kgonthe le beine gore e be madi a gagwe. Lega go le bjalo, mmele wa Jesu wa nama o be o sa feletše ge a be a nea senkgwa se. Na baapostola ba Jesu ba be ba e-ja e le ka kgonthe nama ya gagwe ya kgonthe gomme ba e-nwa madi a gagwe? Aowa, ka gobane seo e be e tla ba bokgema le go tshela molao wa Modimo. (Genesi 9:3, 4; Lefitiko 17:10) Go ya ka Luka 22:20, Jesu o itše: “Senwelo se se bolela kgwerano e mpsha ka baka la madi a-ka ao a tlago go tšhollelwa lena.” Na senwelo seo se ile sa ba “kgwerano e mpsha” e le ka kgonthe? Seo se be se ka se kgonege, ka ge kgwerano e le tumelelano e sego sedirišwa seo se swaregago.

Ka gona, bobedi senkgwa le beine ke diswantšhetšo feela. Senkgwa se swantšhetša mmele o phethagetšego wa Kriste. Jesu o dirišitše senkgwa seo se šetšego go tšwa dijong tša Paseka. Senkgwa se be se dirilwe ka ntle le komelo le ge e le efe. (Ekisodo 12:8) Gantši Beibele e diriša komelo e le seka sa sebe goba kgobogo. Ka gona senkgwa se emela mmele o phethagetšego woo Jesu a o dirilego sehlabelo. O be o se na sebe.—Mateo 16:11, 12; 1 Ba-Korinthe 5:6, 7; 1 Petro 2:22; 1 Johane 2:1, 2.

Beine e khwibidu e emela madi a Jesu. Madi ao a dira gore kgwerano e mpsha e šome. Jesu o boletše gore madi a gagwe a tšholotšwe “bakeng sa tebalelo ya dibe.” Ka gona batho ba ka ba ba hlwekilego mahlong a Modimo e bile ba ka kgona go tsena kgweranong e mpsha le Jehofa. (Ba-Hebere 9:14; 10:16, 17) Kgwerano ye, goba tumelelano, e dira gore go kgonege bakeng sa gore Bakriste ba botegago ba 144 000 ba ye legodimong. Moo ba tla hlankela e le dikgoši le baperisita bakeng sa go šegofatša batho ka moka.—Genesi 22:18; Jeremia 31:31-33; 1 Petro 2:9; Kutollo 5:9, 10; 14:1-3.

Ke bomang bao ba swanetšego go ja diswantšhetšo tše tša  Segopotšo? Ka mo go kwagalago, ke feela bao ba lego kgweranong e mpsha—e lego bao ba nago le kholofelo ya go ya legodimong—bao ba swanetšego go ja senkgwa le go nwa beine. Moya o mokgethwa wa Modimo o kgodiša ba bjalo gore ba kgethetšwe go ba dikgoši tša legodimong. (Ba-Roma 8:16) E bile ba kgweranong ya Mmušo le Jesu.—Luka 22:29.

Go thwe’ng ka bao ba nago le kholofelo ya go phela ka mo go sa felego Paradeiseng mo lefaseng? Ba kwa taelo ya Jesu gomme ba ba gona Selalelong sa Morena, eupša ba tla e le babogedi ba hlomphago, e sego batšea-karolo. Dihlatse tša Jehofa di bina Selalelo sa Morena gatee ka ngwaga ka morago ga ge letšatši le sobetše ka Nisani 14. Gaešita le ge e le ba dikete tše sego kae feela lefaseng ka bophara bao ba ipolelago gore ba na le kholofelo ya legodimong, monyanya wo ke o bohlokwa go Bakriste ka moka. Ke tiragalo yeo go yona bohle ba ka naganišišago ka lerato le legolo la Jehofa Modimo le Jesu Kriste.—Johane 3:16.