Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ke Eng Seo ge e le Gabotse Beibele e se Rutago?

 KGAOLO YA SESWAI

Mmušo wa Modimo ke Eng?

Mmušo wa Modimo ke Eng?
  • Ke’ng seo Beibele e re botšago sona mabapi le Mmušo wa Modimo?

  • Ke’ng seo Mmušo wa Modimo o tlago go se dira?

  • Mmušo o tla dira neng gore thato ya Modimo e dirwe lefaseng?

1. Ke thapelo efe e tsebegago yeo e tlago go hlahlobja ga bjale?

BATHO ba dimilione lefaseng ka bophara ba tseba thapelo yeo ba bantši ba e bitšago Tatawešo goba Thapelo ya Morena. Dipolelwana tše tše pedi di šupa go thapelo e tsebegago yeo e filwego e le mohlala ke Jesu Kriste ka boyena. Ke thapelo e kwagalago kudu, gomme go ela hloko dikgopelo tša yona tše tharo tša mathomo go tla go thuša gore o ithute mo go oketšegilego ka seo ge e le gabotse Beibele e se rutago.

2. Ke dilo dife tše tharo tšeo Jesu a rutilego barutiwa ba gagwe gore ba di rapelele?

2 Mathomong a thapelo ye ya mohlala, Jesu o ile a laela batheetši ba gagwe gore: “Ka gona, le swanetše go rapela ka tsela ye: ‘Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.’” (Mateo 6:9-13) Bohlokwa bja dikgopelo tše tše tharo ke bofe?

3. Ke’ng seo re swanetšego go se tseba mabapi le Mmušo wa Modimo?

3 Re šetše re ithutile mo gontši ka leina la Modimo e lego Jehofa. E bile re šetše re ahla-ahlile thato ya Modimo go fihla bokgoleng bjo itšego—seo a se dirilego le seo a sa tlogo se direla batho. Lega go bjalo, Jesu o be a šupa go eng ge a be a re botša gore re rapele re re: “Mmušo wa gago a o tle”? Mmušo wa Modimo ke’ng? Go tla ga wona go tla tagafatša bjang leina  la Modimo goba go le kgethagatša? Le gona go tla ga Mmušo go tswalana bjang le go dira thato ya Modimo?

SEO MMUŠO WA MODIMO E LEGO SONA

4. Mmušo wa Modimo ke’ng, gomme Kgoši ya wona ke mang?

4 Mmušo wa Modimo ke mmušo wo o hlomilwego ke Jehofa Modimo e bile o e-na le Kgoši e kgethilwego ke Modimo. Kgoši ya Mmušo wa Modimo ke mang? Ke Jesu Kriste. Jesu ka ge e le Kgoši, ke yo mogolo go feta babuši ka moka ba lefase e bile o bitšwa gore ke “Kgoši ya bao ba bušago e le dikgoši le Morena wa bao ba bušago e le marena.” (1 Timotheo 6:15) O na le matla a go dira botse bjo bogolo go feta mmuši le ge e ka ba ofe yo e lego motho, gaešita le mmuši yo a ba phalago ka moka.

5. Mmušo wa Modimo o tla buša o le kae, gomme o tla buša kae?

5 Mmušo wa Modimo o tla buša o le kae? Go ba gona, Jesu o kae? O tla gopola gore o ithutile gore o ile a bolaelwa koteng ya tlhokofatšo gomme ka morago a tsošwa. Kapejana ka morago ga moo, o ile a rotogela legodimong. (Ditiro 2:33) Ka gona ge, moo ke mo Mmušo wa Modimo o lego gona—legodimong. Ke ka baka leo Beibele e o bitšago “mmušo . . . wa legodimong.” (2 Timotheo 4:18) Le ge Mmušo wa Modimo o le legodimong, o tla buša godimo ga lefase.—Kutollo 11:15.

6, 7. Ke’ng seo se dirago gore Jesu e be Kgoši e di phalago ka moka?

6 Ke’ng seo se dirago gore Jesu e be Kgoši e di phalago ka moka? Lebaka le lengwe ke gore a ka se hwe le ka mohla. Ge e bapetša Jesu le dikgoši tša batho, Beibele e mmitša “yena a nnoši yo a sa hwego, yo a dulago seetšeng se se sa batamelegego.” (1 Timotheo 6:16) Se se bolela gore dilo tše dibotse tšeo Jesu a di dirago di tla swarelela. Le gona o tla dira dilo tše dikgolo le tše dibotse.

7 Ela hloko boporofeta bjo bja Beibele mabapi le Jesu: “Môya wa Morêna ó tlo dula mo xo yêna, e lexo môya wa bohlale, le wa thlaloxanyô, môya wa keletšo le wa matla, môya wa tsebô le wa xo šia Morêna. Xo šia Morêna xo tlo mo kxahla; a ka  se ahlole ka mo mahlô ’axwe a bônaxo; a ka se ripe taba ka mo ’tsêbê tš’axwe di kwilexo. Ó tlo ahlolêla babôtlana ka xo se hlaole motho, bahlaki ó tlo ba êmêla ka xo loka.” (Jesaya 11:2-4) Mantšu ao a bontšha gore Jesu o be a tla ba Kgoši ya go loka le e kwelago bohloko e bušago batho mo lefaseng. Na o tla rata go ba le mmuši yo a swanago le yoo?

8. Ke bomang bao ba tlago go buša le Jesu?

8 Therešo e nngwe mabapi le Mmušo wa Modimo ke ye: Jesu a ka se buše a le tee. O tla ba le babuši-gotee le yena. Ka mohlala, moapostola Paulo o boditše Timotheo gore: “Ge e ba re tšwela pele re kgotlelela, re bile re tla buša gotee re le dikgoši.” (2 Timotheo 2:12) Ee, Paulo, Timotheo le ba bangwe ba botegago bao ba kgethilwego ke Modimo ba tla buša gotee le Jesu Mmušong wa legodimo. Ke ba bakae bao ba tlago go ba le tokelo yeo?

9. Ke ba bakae bao ba tlago go buša le Jesu, gomme Modimo o thomile neng go ba kgetha?

9 Ka ge go bontšhitšwe go Kgaolo 7 ya puku ye, moapostola Johane o ile a bontšhwa pono yeo a ilego a bona “Kwana [Jesu Kriste] e eme Thabeng ya Tsione [boemong bja gagwe bja letago bja legodimong] e na le ba dikete tše lekgolo-masome-nne-nne ba ngwadilwego leina la yona le leina la Tatago yona diphatleng.” Ke bomang bao ba 144 000? Johane ka boyena o re botša gore: “Ba ke bao ba latelago Kwana kae le kae mo e yago gona. Ba ba rekilwe gare ga batho ba le bjalo ka dithakangwaga go Modimo le go Kwana.” (Kutollo 14:1, 4) Ee, ke balatedi ba botegago ba Jesu Kriste bao ba kgethilwego ka mo go kgethegilego gore ba buše legodimong gotee le yena. Ka morago ga gore ba tsošwe lehung go ya bophelong bja legodimong, “ba tla buša e le dikgoši godimo ga lefase” gotee le Jesu. (Kutollo 5:10) Ga e sa le go tloga mehleng ya baapostola, Modimo o be a dutše a kgetha Bakriste ba botegago e le gore ba tlaleletše palo ya 144 000.

10. Ke ka baka la’ng e le thulaganyo e lerato gore Jesu le ba 144 000 ba buše batho?

10 Go rulaganya gore Jesu le ba 144 000 ba buše batho ke  selo se lerato kudu. Le lengwe la mabaka ke gore Jesu o tseba gore go ba motho ke eng e bile o tseba le go tlaišega. Paulo o ile a bolela gore Jesu “ga se yo a ka se kego a re kwela bohloko bofokoding bja rena, eupša ke yo a lekilwego ka ditsela tšohle go swana le rena, eupša a se na sebe.” (Ba-Hebere 4:15; 5:8) Babuši-gotee le yena le bona ba ile ba tlaišega gomme ba ba ba kgotlelela bjalo ka batho. Go oketša moo, ba ile ba lwantšha go se phethagale gomme ba lebeletšana le mehuta ka moka ya malwetši. Ruri ba tla kwešiša mathata ao batho ba lebeletšanago le ona!

KE’NG SEO MMUŠO WA MODIMO O TLAGO GO SE DIRA?

11. Ke’ng seo Jesu a ilego a botša barutiwa ba gagwe gore ba se rapelele mabapi le thato ya Modimo?

11 Ge Jesu a be a bolela gore barutiwa ba gagwe ba swanetše go rapelela Mmušo wa Modimo gore o tle, o ile a bolela gape le gore ba swanetše go rapelela thato ya Modimo gore e dirwe “mo lefaseng.” Modimo o legodimong, ka gona thato ya gagwe e be e dutše e dirwa ka mehla gona moo ke barongwa ba botegago. Lega go le bjalo, go Kgaolo 3 ya puku ye, re ithutile gore morongwa yo mobe o ile a tlogela go dira thato ya Modimo gomme a dira gore Adama le Efa ba dire sebe. Go Kgaolo 10, re tla ithuta mo go oketšegilego ka seo Beibele e se rutago mabapi le morongwa yoo yo kgopo, yoo re mo tsebago e le Sathane Diabolo. Sathane le dibopiwa tša moya tša barongwa tšeo di kgethilego go mo latela—tšeo di bitšwago batemona—ba ile ba dumelelwa gore ba dule kua legodimong lebakanyana. Ka baka leo, ga se bohle legodimong bao ba bego ba dira thato ya Modimo ka nako yeo. Seo se be se tla fetoga ge Mmušo wa Modimo o be o thoma go buša. Kgoši e mpsha e beilwego sedulong sa bogoši, Jesu Kriste, o be a tla lwa le Sathane.—Kutollo 12:7-9.

12. Ke ditiragalo dife tše pedi tša bohlokwa tšeo di hlaloswago go Kutollo 12:10?

12 Mantšu a latelago a boporofeta a hlalosa seo se bego se  tla direga: “Ka kwa lentšu le le hlabošago legodimong le re: ‘Bjale go tlile phološo le matla le mmušo wa Modimo wa rena le matla a Kriste wa gagwe, gobane mmegi wa bana babo rena [Sathane] yo a ba begago pele ga Modimo mosegare le bošego o lahletšwe tlase!’” (Kutollo 12:10) Na o etše hloko ditiragalo tše pedi tša bohlokwa kudu tšeo di hlaloswago temaneng yeo ya Beibele? Ya mathomo, Mmušo wa Modimo wo kgoši ya wona e lego Jesu Kriste o thoma go buša. Ya bobedi, Sathane o ntšhwa legodimong o lahlelwa lefaseng.

13. Mafelelo a go rakwa ga Sathane legodimong e bile afe?

13 Mafelelo a ditiragalo tšeo tše pedi e bile afe? Ge e le mabapi le seo se ilego sa direga legodimong, re bala gore: “Thabang lena magodimo le bao le dulago go ona!” (Kutollo 12:12) Ee, barongwa ba botegago bao ba lego legodimong ba a thaba ka gobane ka ge bjale Sathane le batemona ba gagwe ba rakilwe, yo mongwe le yo mongwe kua legodimong o botegela Jehofa Modimo. Go na le khutšo le kwano tše di feletšego le tše di sa felego gona moo. Thato ya Modimo e a dirwa legodimong.

Go rakwa ga Sathane le batemona ba gagwe legodimong go tlišitše madimabe lefaseng. Mathata a bjalo a tla fela kgaufsinyane

14. Ke’ng seo se diregilego e le ka baka la gore Sathane o lahletšwe lefaseng?

14 Lega go le bjalo, go thwe’ng ka lefase? Beibele e re: “Go madimabe lefase le lewatle, gobane Diabolo o theogetše go lena a galefile kudu, ka ge a tseba gore o na le nako e kopana.” (Kutollo 12:12) Sathane o befetšwe ka baka la go rakwa ga gagwe legodimong le gore o šaletšwe ke nako e nyenyane. Ka baka la go befelwa ga gagwe o baka manyami goba “madimabe” lefaseng. Re tla ithuta mo go oketšegilego mabapi le “madimabe” ao kgaolong e latelago. Re dutše re gopola gore o lahletšwe lefaseng, re ka botšiša gore, Mmušo wa Modimo o ka dira bjang gore thato ya Modimo e dirwe mono lefaseng?

15. Thato ya Modimo ka lefase ke efe?

15 Gopola gore thato ya Modimo mabapi le lefase ke efe. O ithutile ka yona go Kgaolo 3. Kua Edene, Modimo o bontšhitše gore thato ya gagwe ke gore lefase le e be paradeise yeo e tletšego ka moloko wo o sa hwego le wo o lokilego wa batho.  Sathane o ile a dira gore Adama le Efa ba dire sebe, gomme seo se ile sa kgoma go phethagatšwa ga thato ya Modimo bakeng sa lefase, eupša ga se sa ka sa e fetoša. Morero wa Jehofa e sa le wa gore ‘baloki e be beng ba naga, ba dule mo go yona ka mehla le ka mehla.’ (Psalme 37:29) Le gona Mmušo wa Modimo o tla phethagatša seo. Ka tsela efe?

16, 17. Ke’ng seo Daniele 2:44 e re botšago sona mabapi le Mmušo wa Modimo?

16 Ela hloko boporofeta bjo bo hwetšwago go Daniele 2:44. Moo re bala gore: “Mehleng ya dikxoši tšeo, ké mo Modimo a tl’o xo tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.” Se se re botša’ng ka Mmušo wa Modimo?

17 Sa mathomo, se re botša gore Mmušo wa Modimo o be o tla hlongwa “mehleng ya dikxoši tšeo” goba nakong ya ge mebušo e mengwe e sa le gona. Sa bobedi, se re botša gore Mmušo o tla ba gona ka mo go sa felego. O ka se ke wa fenywa le go tšeelwa legato ke mmušo o mongwe. Sa boraro, re hwetša gore go tla ba le ntwa magareng ga Mmušo wa Modimo le mebušo ya lefase le. Mmušo wa Modimo o tla fenya. Mafelelong e tla ba wona mmušo o nnoši o bušago batho. Ka gona batho ba tla thabela pušo e kaone-kaone yeo ba sa kago ba e bona.

18. Leina la ntwa ya makgaola-kgang magareng ga Mmušo wa Modimo le mebušo ya lefase le ke lefe?

18 Beibele e na le mo gontši mo e go bolelago mabapi le ntwa yeo ya makgaola-kgang magareng ga Mmušo wa Modimo le mebušo ya lefase le. Ka mohlala, e ruta gore ge bofelo bo dutše bo batamela, meoya e kgopo e tla phatlalatša maaka bakeng sa go fora “dikgoši tša lefase ka moka.” Ka morero ofe? “Go di [dikgoši] rapela ntweng ya letšatši le legolo la Modimo Ra-matla-ohle.” Dikgoši tša lefase di tla kgobokeletšwa “lefelong le le bitšwago Haramagedone ka Seheberu.” (Kutollo 16:14, 16) Ka baka la seo se bolelwago ditemaneng tšeo  tše pedi, kgohlano ya makgaola-kgang magareng ga mebušo ya lefase le Mmušo wa Modimo e bitšwa ntwa ya Haramagedone.

19, 20. Ke’ng seo se thibelago gore thato ya Modimo e se ke ya dirwa lefaseng mo nakong ye?

19 Ke’ng seo Mmušo wa Modimo o tlago go se phethagatša ka go diriša Haramagedone? Nagana gape ka seo thato ya Modimo e lego sona mabapi le lefase. Jehofa Modimo o rerile gore lefase le tlale ka moloko o lokilego le o phethagetšego wa batho woo o mo hlankelago Paradeiseng. Ke’ng se se thibelago gore seo se direge mo nakong ye? Sa mathomo, re na le sebe, e bile re a babja le go hwa. Lega go le bjalo, re ithutile go Kgaolo 5 gore Jesu o re hwetše e le gore re kgone go phela ka mo go sa felego. Mohlomongwe o gopola mantšu ao a begilwego Ebangeding ya Johane, ao a rego: “Modimo o ratile lefase kudu mo a ilego a gafa Morwa wa gagwe yo a tswetšwego a nnoši gore yo mongwe le yo mongwe yo a dumelago go yena a se ke a fedišwa, eupša a be le bophelo bjo bo sa felego.”—Johane 3:16.

20 Bothata bjo bongwe ke gore batho ba bantši ba dira dilo tše mpe. Ba bolela maaka, go hlalefetša le go itshwara ka tsela e gobogilego. Ga ba nyake go dira thato ya Modimo. Batho bao ba dirago dilo tše mpe ba tla fedišwa nakong ya ntwa ya Modimo ya Haramagedone. (Psalme 37:10) Lebaka le lengwe gape leo thato ya Modimo e sa dirwego lefaseng ke gore mebušo ga e kgothaletše batho gore ba e dire. Mebušo e mentši e a fokola, ke e šoro goba e gobogilego. Beibele e bolela ka go lebanya gore: ‘Motho o buša motho gore a mo senye.’—Mmoledi 8:9.

21. Mmušo o tla dira bjang gore thato ya Modimo e dirwe mono lefaseng?

21 Ka morago ga Haramagedone, batho ba tla ba ka tlase ga mmušo o tee feela, Mmušo wa Modimo. Mmušo woo o tla dira thato ya Modimo wa ba wa tliša ditšhegofatšo tše di kgahlišago. Ka mohlala, o tla tloša Sathane le batemona ba gagwe. (Kutollo 20:1-3) Matla a sehlabelo sa Jesu a tla dirišwa  e le gore batho ba botegago ba se ke ba hlwa ba babja le go hwa. Go e na le moo, ka tlase ga pušo ya Mmušo ba tla kgona go phela ka mo go sa felego. (Kutollo 22:1-3) Lefase le tla fetošwa gore e be paradeise. Ka gona Mmušo o tla dira gore thato ya Modimo e dirwe lefaseng, e bile o tla kgethagatša leina la Modimo. Se se bolela’ng? Se bolela gore mafelelong ka tlase ga Mmušo wa Modimo yo mongwe le yo mongwe yo a phelago o tla godiša leina la Jehofa.

MMUŠO WA MODIMO O TLA TŠEA KGATO NENG?

22. Ke ka baka la’ng re tseba gore Mmušo wa Modimo ga se wa tla ge Jesu a be a le lefaseng goba kapejana ka morago ga ge a tsošitšwe?

22 Ge Jesu a be a botša balatedi ba gagwe gore ba rapele ka gore, “Mmušo wa gago a o tle,” go be go le molaleng gore Mmušo o be o se wa tšwa o e-tla ka nako yeo. Na o ile wa tla ge Jesu a be a rotogela legodimong? Aowa, ka gobane Petro gotee le Paulo ba ile ba bolela gore ka morago ga gore Jesu a tsošwe, boporofeta bjo bo lego go Psalme 110:1 bo ile bja phethagala ka yena ge bo re: “Morêna ó boditše Mong wa-ka a re: Dula ka letsoxong la-ka le letona, ke bê ke dirê manaba a xaxo boxatô bya ’naô tša xaxo.” (Ditiro 2:32-35; Ba-Hebere 10:12, 13) Go ile gwa ba le nako ya go leta.

Ka tlase ga pušo ya Mmušo, thato ya Modimo e tla dirwa lefaseng go swana le ge e dirwa legodimong

23. (a) Mmušo wa Modimo o thomile neng go buša? (b) Ke’ng seo se tlago go ahla-ahlwa kgaolong e latelago?

23 Go be go tla letwa ka nako e kaaka’ng? Lekgolong la bo-19 le la bo-20 la nywaga, barutwana ba kgonthe ba Beibele ba ile ba dula ba lemoga gore nako ya go leta e be e tla fela ka  1914. (Mabapi le letšatši-kgwedi le, bona Mametletšo, matlakala 215-18.) Ditiragalo tša lefase tšeo di thomilego ka 1914 di tiišetša gore kwešišo ye ya barutwana ba ba kgonthe ba Beibele e be e nepagetše. Go phethagala ga boporofeta bja Beibele go bontšha gore ka 1914, Kriste o bile Kgoši gomme Mmušo wa Modimo wa legodimong wa thoma go buša. Ka baka leo, re phela ‘nakong yeo e kopana’ ye e sa šaletšego Sathane. (Kutollo 12:12; Psalme 110:2) E bile re ka bolela ka kgodišego gore kgaufsinyane Mmušo wa Modimo o tla tšea kgato bakeng sa go dira gore thato ya Modimo e dirwe mo lefaseng. Na o hwetša tše e le ditaba tše di kgahlišago? Na o a dumela gore ke tša therešo? Kgaolo e latelago e tla go thuša gore o bone gore Beibele ge e le gabotse e ruta dilo tše.

Ithute ka mo go oketšegilego

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?