Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ke Eng Seo ge e le Gabotse Beibele e se Rutago?

 MAMETLETŠO

Leina la Modimo—Go Dirišwa ga Lona le Seo le se Bolelago

Leina la Modimo—Go Dirišwa ga Lona le Seo le se Bolelago

KOPING ya gago ya Beibele, Psalme 83:18 e fetoletšwe bjang? New World Translation of the Holy Scriptures e fetoletše temana ye ka gore: “E le gore batho ba tsebe gore wena, yoo leina la gagwe e lego Jehofa, wena o nnoši o yo a Phagamego Kudu godimo ga lefase ka moka.” Diphetolelo tše dingwe tše dintši tša Beibele di fetolela mantšu a ka yona tsela ye. Lega go le bjalo, diphetolelo tše dintši ga di diriše leina Jehofa, di bea direto tše bjalo ka “Morena” goba “Wa ka mo go sa felego” legatong la lona. Ke’ng yeo e swanetšego go dirišwa temaneng ye? Na ke sereto goba leina Jehofa?

Leina la Modimo ka ditlhaka tša sehebere

Temana ye e bolela ka leina. Sehebereng sa mathomo seo karolo e kgolo ya Beibele e bego e ngwadilwe ka sona, go tšwelela leina la gagwe la moswana-noši leo le mo hlaolago. Le peletwa e le יהוה (YHWH) ka ditlhaka tša Sehebere. Ka Sepedi phetolelo e tlwaelegilego ya leina leo ke “Jehofa.” Na leina leo le tšwelela temaneng e tee feela ya Beibele? Aowa. Le tšwelela mongwalong wa mathomo wa Mangwalo a Sehebere ka makga a ka bago a 7 000!

Leina la Modimo le bohlokwa gakaaka’ng? Ela hloko thapelo ya mohlala yeo e filwego ke Jesu Kriste. E thoma ka tsela ye: “Tatago rena wa magodimong, leina la gago a le kgethagatšwe.” (Mateo 6:9) Ka morago, Jesu o ile a rapela Modimo ka gore: “Tate tagafatša leina la gago.” Ge a araba, Modimo o ile a bolela a le legodimong a re: “Ke le tagafaditše gomme ke tla buša ke le tagafatša.” (Johane 12:28) Go molaleng gore leina la Modimo ke la bohlokwa kudu le go feta. Ka gona, ke ka baka la’ng bafetoledi ba bangwe ba tlogetše leina le diphetolelong tša bona tša Beibele gomme ba bea direto legatong la lona?

Go bonagala go e-na le mabaka a mabedi a motheo. La mathomo, ba bantši ba bolela gore leina leo ga se la swanela go dirišwa ka gobane tsela ya mathomong ya go le bitša ga e tsebje lehono. Sehebere sa bogologolo se be se ngwalwa ntle le ditumanoši. Ka gona, ga go le o tee lehono yo a ka bolelago ka go nepa kamoo batho ba mehleng ya Beibele ba bego ba bitša YHWH ka gona. Lega go le bjalo, na se se swanetše go re thibela go diriša leina la Modimo? Mehleng  ya Beibele, leina Jesu go ka direga gore le be le bitšwa Yeshua goba mohlomongwe Yehoshua—ga go le yo tee yo a ka kgonthišetšago seo. Lega go le bjalo, batho lefaseng ka moka lehono ba diriša dibopego tše di sa swanego tša leina Jesu, ba le bitša ka tsela e tlwaelegilego ka leleme labo bona. Ga ba dika-dike go diriša leina leo e le feela ka gobane ba sa tsebe tsela yeo le bego le bitšwa ka yona lekgolong la pele la nywaga. Ka mo go swanago, ge e ba o be o tla ya nageng e šele, mohlomongwe o ka hwetša e le gore leina la gago ka noši le bitšwa ka tsela e fapanego kudu ka leleme le lengwe. Ka baka leo, go se kgonthišege mabapi le tsela ya bogologolo ya go bitša leina la Modimo ga se lebaka leo le ka dirago gore le se ke la dirišwa.

Lebaka la bobedi leo gantši le newago mabapi le go se diriše leina la Modimo ka Beibeleng le akaretša setšo sa kgale sa ba-Juda. Ba bantši ba bona ba dumela gore leina la Modimo ga se la swanela go bitšwa. Tumelo ye go bonagala e theilwe go dirišweng gampe ga molao wa Beibele wo o rego: “O se ké wa bolêla leina la Morêna [Jehofa, NW] Modimo wa xaxo ka lefêla; ka xobane e a bolêlaxo leina la xaxwe ka lefêla, Morêna a ka se kê a mo lesa à sa ôtlwe.”—Ekisodo 20:7.

Molao wo o thibela go dirišwa gampe ga leina la Modimo. Eupša na o thibela go dirišwa ga leina la gagwe ka tsela ya tlhompho? Ga go bjalo le gatee. Bangwadi ba Beibele ya Sehebere (“Testamente ya Kgale”), ka moka e be e le batho ba botegago bao ba bego ba phela ka Molao woo Modimo a o neilego ba-Isiraele ba bogologolo. Lega go le bjalo, ba ile ba diriša leina la Modimo ka makga a mantši. Ka mohlala, ba ile ba le akaretša dipsalmeng tše dintši tšeo di bego di opelelwa godimo ke mašaba a barapedi. Jehofa Modimo o ile a ba a laela barapedi ba gagwe gore ba bitše leina la gagwe, gomme batho ba botegago ba ile ba dira seo. (Joele 2:32; Ditiro 2:21) Ka gona, Bakriste lehono ga ba dika-dike tabeng ya go diriša leina la Modimo ka tlhompho bjalo ka ge Jesu a dirile e le ka kgonthe.—Johane 17:26.

Bafetoledi ba Beibele ba dira phošo e kgolo ka go bea direto legatong la leina la Modimo. Ba dira gore Modimo a bonagale a le kgole e bile a se na dika tša motho, mola Beibele e kgothaletša batho gore ba hlagolele ‘tswalano ya kgaufsi-ufsi le Jehofa.’ (Psalme 25:14) Nagana ka mogwera wa gago wa kgaufsi kudu. Na o ka ba kgaufsi le yena bjang e le ka kgonthe ge e ba o se wa ka wa tseba leina la gagwe? Ka mo go swanago, ge batho ba sa tsebišwe ka leina la Modimo, Jehofa, ba ka ba kgaufsi bjang le yena e le ka kgonthe? Go feta moo, ge batho ba sa diriše leina la Modimo, gape ga ba be le tsebo mabapi le seo ge e le gabotse le se bolelago. Ke’ng seo leina la Modimo le se bolelago?

 Modimo ka boyena o hlaloseditše mohlanka wa gagwe yo a botegago Moše seo se bolelwago ke leina la gagwe. Ge Moše a be a botšiša ka leina la Modimo, Jehofa o ile a fetola ka gore: “Ke tla ipontšha ke le seo ke tla ipontšhago ke le sona.” (Ekisodo 3:14, NW) Phetolelo ya Rotherham e fetolela mantšu ao ka gore: “Ke Tla Ba se sengwe le se sengwe seo ke kgahlwago ke go ba sona.” Ka gona Jehofa a ka ba se sengwe le se sengwe seo se nyakegago e le gore a phethagatše merero ya gagwe.

Akanya o be o ka kgona go ba selo le ge e le sefe seo o bego o nyaka go ba sona. Ke’ng seo o bego o tla se direla bagwera ba gago? Ge e ba yo mongwe wa bona a be a ka babja o šoro, o be o ka kgona go ba ngaka e nago le bokgoni gomme wa mo fodiša. Ge e ba yo mongwe a be a ka lahlegelwa ke tšhelete, o be o ka ba mothuši yo a humilego gomme wa mo thuša. Lega go le bjalo, therešo ke gore ga o kgone go ba seo o nyakago go ba sona. Ka moka ga rena ga re kgone. Ge o dutše o ithuta Beibele, o tla makala go bona kamoo Jehofa a bago se sengwe le se sengwe seo se nyakegago e le gore a phethagatše dikholofetšo tša gagwe. Le gona o thabišwa ke go diriša matla a gagwe bakeng sa bao ba mo ratago. (2 Koronika 16:9) Dikarolo tše tše dibotse tša semelo sa Jehofa ga di lemogege go bao ba sa tsebego leina la gagwe.

Go molaleng gore leina Jehofa le swanetše go dirišwa ka Beibeleng. Go tseba seo le se bolelago le go le diriša ka bolokologi borapeding bja rena ke dithušo tše matla tša go batamela kgaufsi le Tatago rena wa legodimong, Jehofa. *

^ ser. 12 Bakeng sa tsebišo e oketšegilego ka leina la Modimo, seo le se bolelago le mabaka ao ka ona le swanetšego go dirišwa borapeding, bona poroutšha ya Leina la Modimo Leo le Tlago go ba Gona ka mo go sa Felego, yeo e gatišitšwego ke Dihlatse tša Jehofa.

 

Ithute ka mo go oketšegilego

Na Modimo o na le Leina?

Modimo o na le direto tše dintši tše swanago le Ramatlaohle, Mmopi gotee le Morena. Eupša leina la gagwe le dirišwa ka makga a fetago a 7 000 ka Beibeleng.