Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ke Eng Seo ge e le Gabotse Beibele e se Rutago?

 KGAOLO YA BOŠUPA

Kholofelo ya Kgonthe Bakeng sa Baratiwa ba Gago ba ba Hwilego

Kholofelo ya Kgonthe Bakeng sa Baratiwa ba Gago ba ba Hwilego
  • Re tseba bjang gore tsogo e tla direga e le ka kgonthe?

  • Jehofa o ikwa bjang ka go tsoša bahu?

  • Ke bomang bao ba tlago go tsošwa?

1-3. Ke lenaba lefe leo le re hlomarago ka moka ga rena, gomme ke ka baka la’ng go ela hloko seo Beibele e se rutago go tla re tlišetšago kimollo e itšego?

NAGANA o tšhabela lenaba le šoro. Le na le matla e bile le go šia ka lebelo. O a tseba gore ga le na kgaugelo ka gobane o le bone le bolaya ba bangwe ba bagwera ba gago. Go sa šetšwe gore o leka gakaakang go le šia, le dutše le batamela. Go bonagala go se na kholofelo. Lega go le bjalo, mohlakodiši o tšwelela gatee-tee. Ke yo matla kudu go feta lenaba la gago e bile o holofetša go go thuša. Seo se go dira gore o ikwe o imologile gakaakang!

2 Ka kgopolo e itšego, o hlomerwe ke lenaba le le bjalo. Ka moka ga rena le a re hlomara. Ka ge re ithutile kgaolong e fetilego, Beibele e bitša lehu gore ke lenaba. Ga go le o tee wa rena yo a ka le tšhabelago goba a lwa le lona. Ba bantši ba rena re bone lenaba le le bolaya batho bao re ba ratago. Eupša Jehofa ke yo matla kudu go feta lehu. Ke Mohlakodiši yo lerato yo a šetšego a bontšhitše gore a ka fenya lenaba le. Le gona o holofetša go fedišetša lenaba le e lego lehu, sa ruri. Beibele e ruta gore: “Lehu le tla fedišwa e le lenaba la mafelelo.” (1 Ba-Korinthe 15:26) Tšeo ke ditaba tše dibotse!

3 Anke re eleng hloko ka bokopana kamoo lenaba le e lego lehu le re kgomago ka gona ge le hlasela. Go dira se go tla re  thuša gore re kwešiše se sengwe seo se tlago go re thabiša. Lebaka ke gore Jehofa o holofetša gore bahu ba tla phela gape. (Jesaya 26:19) Ba tla bušetšwa bophelong. Seo ke kholofelo ya tsogo.

GE YO O MO RATAGO A E-HWA

4. (a) Ke ka baka la’ng karabelo ya Jesu lehung la moratiwa e re ruta ka maikwelo a Jehofa? (b) Jesu o ile a hlagolela bogwera bofe bjo bo kgethegilego?

4 Na o lahlegetšwe ke yo o mo ratago lehung? Bohloko, manyami le maikwelo a go ikwa o se na mohola a ka bonagala a sa kgotlelelege. Dinakong tše bjalo, re swanetše go ya Lentšung la Modimo bakeng sa go hwetša khomotšo. (2 Ba-Korinthe 1:3, 4) Beibele e re thuša gore re kwešiše kamoo Jehofa le Jesu ba ikwago ka gona ka lehu. Jesu, yo a ilego a bonagatša Tatagwe ka mo go phethagetšego, o be a tseba bohloko bja go lahlegelwa ke motho lehung. (Johane 14:9) Ge a be a le Jerusalema, Jesu o be a fela a etela Latsaro le dikgaetšedi tša gagwe e lego Maria le Mareta bao ba bego ba dula toropong ya kgaufsi yeo e bitšwago Bethania. E ile ya ba bagwera ba go ntšhana sa inong. Beibele e re: “Jesu o be a rata Mareta le ngwanabo le Latsaro.” (Johane 11:5) Lega go le bjalo, ka ge re ithutile kgaolong e fetilego, Latsaro o ile a hwa.

5, 6. (a) Jesu o ile a arabela bjang ge a be a e-na le ba lapa labo Latsaro le bagwera bao ba bego ba lla? (b) Ke ka baka la’ng go nyama ga Jesu go re kgothatša?

5 Jesu o ile a ikwa bjang mabapi le go lahlegelwa ke mogwera wa gagwe? Pego e re botša gore Jesu o ile a tla go ba leloko la Latsaro le bagwera ge ba be ba lla ka baka la go lahlegelwa mo. Jesu o ile a kgomega kudu ge a ba bona. O ile “a tsetsela moyeng gomme a huduega.” Ke moka pego e re: “Jesu a ntšha megokgo.” (Johane 11:33, 35) Na go nyama ga Jesu go be go bolela gore o be a se na kholofelo? Le gatee. Ge e le gabotse, Jesu o be a tseba gore selo se sengwe se se kgahlišago se be se le kgaufsi le go direga. (Johane 11:3, 4) Lega go le bjalo, o ile a kwa bohloko le manyami tšeo di bakwago ke lehu.

6 Ka kgopolo e nngwe, go nyama ga Jesu go a re kgothatša.  Go re ruta gore Jesu le Tatagwe e lego Jehofa ba hloile lehu. Eupša Jehofa Modimo o kgona go lwa le go fenya lenaba leo! Anke re boneng seo Modimo a ilego a kgoniša Jesu gore a se dire.

“LATSARO, TŠWAA!”

7, 8. Ke ka baka la’ng taba ya Latsaro e ka ba e ile ya bonagala e sa holofetše go babogedi, eupša Jesu o ile a dira’ng?

7 Latsaro o be a bolokilwe ka leweng gomme Jesu o ile a kgopela gore lefsika leo le tswaletšego mojako wa lona le tlošwe. Mareta o ile a ganetša seo ka gobane mmele wa Latsaro o be o swanetše go ba o be o thomile go bola ka morago ga matšatši a mane. (Johane 11:39) Go ya ka pono ya motho, na go be go e-na le kholofelo?

Tsogo ya Latsaro e ile ya tliša lethabo le legolo. —Johane 11:38-44

8 Lefsika le ile la kgokološwa gomme Jesu a goelela ka gore: “Latsaro, tšwaa!” Go ile gwa direga’ng? “Motho yo a bego a hwile [o ile] a tšwa.” (Johane 11:43, 44) Na o ka akanya lethabo leo batho ba bilego le lona moo? Go sa šetšwe gore Latsaro e be e le ngwanabo bona, moloko, mogwera goba moagišani, ba be ba tseba gore o be a hwile. Lega go le bjalo, šo o gona—yena monna yo a ratwago—o eme gare ga bona gape. Seo se swanetše go ba se ile sa bonagala se sa kgonege le gatee. Ga go pelaelo gore ba bantši ba ile ba gokarela Latsaro ka lethabo. A phenyo e kgolo gakaakang ya go fenya lehu!

Eliya o ile a tsoša morwa wa mohlologadi.—1 Dikxoši 17:17-24

9, 10. (a) Jesu o ile a utolla bjang Mothopo wa matla a gagwe a go tsoša Latsaro? (b) Ke mehola efe e mengwe yeo re e hwetšago ka go bala dipego tša Beibele tša tsogo?

9 Jesu ga se a ka a ipolela gore o dirile mohlolo wo o makatšago ka matla a gagwe ka noši. Thapelong ya gagwe pejana ga ge a bitša Latsaro, o ile a bontšha gabotse gore Jehofa ke yena Mothopo wa tsogo. (Johane 11:41, 42) Ye ga se nako e nnoši yeo Jehofa a ilego a diriša matla a gagwe ka tsela ye. Tsogo ya Latsaro e fo ba o mongwe wa mehlolo e senyane ya mohuta wo yeo e begilwego ka Lentšung la Modimo. * Go bala  le go ithuta dipego tše go a thabiša. Di re ruta gore Modimo ga a bebe sefahlego, ka gore bao ba tsošitšwego ba akaretša ba banyenyane le ba bagolo, banna le basadi, ba-Isiraele le bao e sego ba-Isiraele. Le gona dipegong tše go hlaloswa ka lethabo le legolo gakaakang leo le ilego la ba gona! Ka mohlala, ge Jesu a tsošitše ngwanenyana yo monyenyane bahung, batswadi ba gagwe ba ile “ba thaba wa go se kgone go itshwara.” (Mareka 5:42) Ee, Jehofa o be a ba file lebaka la go thaba leo ba bego ba ka se ke ba le lebala le ka mohla.

Moapostola Petro o ile a tsoša mosadi wa Mokriste e lego Doroka.—Ditiro 9:36-42

10 Ee, bao ba ilego ba tsošwa ke Jesu ba ile ba hwa gape mafelelong. Na se se bolela gore go ba tsoša go be go se na seo go se bolelago? Le gatee. Dipego tše tša Beibele di tiišetša ditherešo tše bohlokwa e bile di re nea kholofelo.

GO ITHUTA DIPEGONG TŠA TSOGO

11. Ke bjang pego ya go tsošwa ga Latsaro e thušago go tiiša therešo yeo e begilwego go Mmoledi 9:5?

11 Beibele e ruta gore “bahu ga ba tsebe selo.” Ga ba phele e bile ga ba phele ka tsela e nngwe e itšego lefelong le ge e ka ba lefe. Pego ya Latsaro e tiišetša se. Ge a be a tsošetšwa bophelong, na Latsaro o ile a kwiša ditsebe tša batho bose ka go ba hlalosetša ka legodimo? Goba na o ile a ba tšhoša ka dinonwane tše di tšhošago tša mabapi le hele e tukago? Aowa. Beibele ga e hlalose mantšu a bjalo e le a tšwago go Latsaro. Nakong ya matšatši a mane ge a be a hwile, o be a sa “tsebe selo.” (Mmoledi 9:5, PK) Latsaro o be a fo ba a robetše lehung.—Johane 11:11.

12. Ke ka baka la’ng re ka kgonthišega gore tsogo ya Latsaro e ile ya direga e le ka kgonthe?

12 Pego ya Latsaro gape e re ruta gore tsogo ke selo sa kgonthe, e sego nonwane feela. Jesu o tsošitše Latsaro ka pele ga lešaba la dihlatse tše di bonego ka mahlo. Gaešita le baetapele ba bodumedi, bao ba bego ba hloile Jesu, ga se ba ka ba gana mohlolo wo. Go e na le moo ba ile ba re: “Re tla dira’ng, gobane motho yo [Jesu] o dira dipontšho tše dintši?” (Johane 11: 47) Batho ba bantši ba ile ba ya ba bona monna yo a tsošitšwego. Ka baka leo, gaešita le ba bantši ba bona ba ile ba dumela Jesu. Ba ile ba bona ka Latsaro bohlatse bjo bo kwagalago bja gore Jesu o be a romilwe ke Modimo. Bohlatse bjo e be e le bjo matla mo e lego gore ba bangwe ba baetapele ba ba-Juda ba dipelo tše thata ba ile ba loga maano a go bolaya Jesu le Latsaro.—Johane 11:53; 12:9-11.

13. Ke motheo ofe woo re nago le wona wa go dumela gore Jehofa a ka tsoša bahu e le ka kgonthe?

13 Na ke mo go sa kwagalego go amogela tsogo e le therešo? Ga go bjalo, ka gobane Jesu o rutile gore ka letšatši le lengwe “bohle bao ba lego mabitleng” ba tla tsošwa. (Johane 5:28) Jehofa ke Mmopi wa bophelo ka moka. Na go swanetše go ba thata go dumela gore a ka bopa bophelo gape? Ee, go gontši go tla ithekga ka mogopolo wa Jehofa. Na a ka gopola baratiwa ba rena ba ba hwilego? Go na le dinaledi tše dintši tšeo di sa balegego tše di tletšego legohleng, lega go le bjalo Modimo o bitša e nngwe le e nngwe ka leina! (Jesaya 40:26) Ka gona Jehofa Modimo a ka gopola selo se sengwe le se sengwe ka baratiwa ba rena ba ba hwilego, e bile o ikemišeditše go ba bušetša bophelong.

14, 15. Jehofa o ikwa bjang ka go bušetša bahu bophelong, ka ge se se bontšhitšwe ke seo Jobo a se boletšego?

14 Lega go le bjalo, Jehofa o ikwa bjang ka go tsoša bahu? Beibele e ruta gore o fagahletše go tsoša bahu. Monna yo a botegago Jobo o botšišitše gore: “A fa motho a ka re go hwa, a buša a phela?” (PK) Jobo o be a bolela ka go leta lebitleng go fihlela ge nako e fihla ya gore Modimo a mo gopole. O ile a botša Jehofa gore: “Wa tlo mpitša ka Xo arabêla, Ò hloloxetšwe ’bopya sa diatla tša’xo.”—Jobo 14:13-15.

15 Nagana feela! Jehofa ge e le gabotse o hlologetše go bušetša bahu bophelong. Na ga go thabiše go tseba gore Jehofa o ikwa ka tsela yeo? Eupša go thwe’ng ka tsogo ye ya nakong e tlago? Ke bomang bao ba tlago go tsošwa, gomme ba tsošetšwa kae?

 “BOHLE BAO BA LEGO MABITLENG A KGOPOTŠO”

16. Bahu ba tla tsošetšwa gore ba phele maemong a mohuta ofe?

16 Dipego tša Beibele tša tsogo di re ruta mo gontši mabapi le tsogo ya nakong e tlago. Batho bao ba ilego ba bušetšwa bophelong gona mo lefaseng ba ile ba kopanywa gape le bao ba ba ratago. Tsogong ya nakong e tlago go tla direga se se swanago—eupša se tla direga gakaone kudu. Ka ge re ithutile go Kgaolo 3, morero wa Modimo ke gore lefase ka moka le dirwe paradeise. Ka gona bahu ba ka se ke ba tsošetšwa bophelong lefaseng leo le tletšego ntwa, bosenyi le bolwetši. Ba tla ba le sebaka sa go phela ka mo go sa felego lefaseng ba le maemong a khutšo le a lethabo.

17. Tsogo e tla direga ka tekanyo e kgolo gakaaka’ng?

17 Ke bomang bao ba tlago go tsošwa? Jesu o itše ‘bohle bao ba lego mabitleng a kgopotšo ba tla kwa lentšu la gagwe [la Jesu] gomme ba tšwa.’ (Johane 5:28, 29) Ka mo go swanago, Kutollo 20:13 e re: “Lewatle la ntšha bahu ba lego go lona, lehu le Hadese tša ntšha bahu ba lego go tšona.” “Hadese” e šupa go bodula-bahu. (Bona Mametletšo, matlakala 212-13) Lebitla le la kakaretšo le tla šala le se na selo. Batho ka moka ba dimilione tše dikete bao ba robetšego moo ba tla phela gape. Moapostola Paulo o itše: “Go tla ba le tsogo ya ba lokilego gotee le ba sa lokago.” (Ditiro 24:15) Seo se bolela’ng?

Paradeiseng bahu ba tla tsoga gomme ba kopane gape le bao ba ba ratago

18. Ke bomang bao ba akaretšwago gare ga “ba lokilego” bao ba tlago go tsošwa, gomme kholofelo ye e ka go kgoma bjang wena ka noši?

18 “Ba lokilego” ba akaretša batho ba bantši bao re balago ka bona ka Beibeleng bao ba phetšego pele Jesu a e-tla lefaseng. O ka nagana ka Noage, Aborahama, Sara, Moše, Ruthe, Esitere le ba bangwe ba bantši. Ba bangwe ba banna le basadi ba ba tumelo go bolelwa ka bona kgaolong ya bo-11 ya Ba-Hebere. Eupša “ba lokilego” gape ba akaretša bahlanka ba Jehofa bao ba hwago nakong ya rena. Ka baka la kholofelo ya tsogo, re ka lokologa poifong le ge e ka ba efe ya go hwa.—Ba-Hebere 2:15.

19. “Ba sa lokago” ke bomang, gomme ke sebaka sefe seo Jehofa a ba neago sona ka botho?

19 Go thwe’ng ka batho bao ba sa kago ba hlankela Jehofa  goba go mo kwa ka gobane ba se ba ka ba tseba ka yena le ka mohla? Dimilione tše tše dikete tša “ba sa lokago” di ka se lebalwe. Le tšona di tla tsošwa gomme tša fiwa nako ya gore di ithute ka Modimo wa therešo le go mo hlankela. Lebakeng la nywaga e sekete, bahu ba tla tsošwa gomme ba fiwe sebaka sa go kopana le batho ba botegago mo lefaseng bakeng sa go hlankela Jehofa. E tla ba nako e kgahlišago. Nako ye ke yeo Beibele e e bitšago gore ke Letšatši la Kahlolo. *

20. Gehenna ke’ng, gomme ke bomang bao ba yago fao?

20 Na se ka moka se bolela gore motho yo mongwe le yo mongwe yo a kilego a phela o tla tsošwa? Aowa. Beibele e bolela gore bahu ba bangwe ba “Gehenna.” (Luka 12:5) Gehenna e hweditše leina la yona lefelong la go lahlela ditlakala leo le bego le le ka ntle ga Jerusalema ya bogologolo. Ditopo le ditlakala di be di tšhungwa moo. Bahu bao mebele ya bona e bego e lahlelwa moo ba be ba lebelelwa ke ba-Juda e le bao ba sa swanelwago ke go bolokwa le go tsošwa. Ka gona Gehenna ke seswantšhetšo se se swanetšego sa tshenyego ya ka mo go sa felego. Gaešita le ge Jesu a tla ba le karolo go ahloleng ba ba phelago le ba ba hwilego, Jehofa ke yena Moahlodi wa mafelelo. (Ditiro 10:42) Le ka mohla a ka se tsoše bao a ba ahlolago e le ba babe e bile ba sa ikemišetša go fetoga.

TSOGO YA GO TSOGELA LEGODIMONG

21, 22. (a) Go na le mohuta ofe o mongwe wa tsogo? (b) Ke mang wa mathomo-thomo wa go tsošetšwa bophelong bja moya?

21 Beibele e bile e bolela ka mohuta o mongwe gape wa tsogo, wa go phela legodimong bjalo ka sebopiwa sa moya. Mohlala o tee feela wa mohuta wo wa tsogo wo o begilwego ka Beibeleng ke wa Jesu Kriste.

22 Ka morago ga gore Jesu a bolawe e le motho, Jehofa ga se a ka a dumelela Morwa wa Gagwe yo a botegago gore a dule ka lebitleng. (Psalme 16:10; Ditiro 13:34, 35) Modimo o tsošitše Jesu, eupša e sego e le motho wa nama. Moapostola Petro o  hlalosa gore Kriste o ile “a bolawa nameng, eupša a phedišwa moyeng.” (1 Petro 3:18) Ruri wo e be e le mohlolo o mogolo. Jesu o ile a phela gape e le motho yo matla wa moya! (1 Ba-Korinthe 15:3-6) Jesu e bile yena wa mathomo-thomo wa go tsošwa ka tsela ye e kgahlišago. (Johane 3:13) Eupša e be e ka se be yena wa mafelelo.

23, 24. Ke bomang bao ba bopago “mohlatswana” wa Jesu, gomme e tla ba ba bakae?

23 A tseba gore kgaufsinyane o be a tla boela legodimong, Jesu o ile a botša balatedi ba gagwe ba botegago gore o tla ba “lokišetša lefelo” gona moo. (Johane 14:2) Jesu o ile a bolela ka bao ba yago legodimong gore ke “mohlatswana” wa gagwe. (Luka 12:32) Ke ba bakae bao ba tlago go ba sehlopheng se se senyenyane se se lekanyeditšwego sa Bakriste ba botegago? Go ya ka Kutollo 14:1, moapostola Johane o re: “Ka lebelela, gomme, bonang! Kwana e eme Thabeng ya Tsione e na le ba dikete tše lekgolo-masome-nne-nne ba ngwadilwego leina la yona le leina la Tatago yona diphatleng.”

24 Bakriste ba ba 144 000 go akaretša le baapostola ba Jesu ba botegago, ba tsošetšwa bophelong bja legodimong. Tsogo ya bona e direga neng? Moapostola Paulo o ngwadile gore e tla direga nakong ya go ba gona ga Kriste. (1 Ba-Korinthe 15:23) Ka ge o tla ithuta go Kgaolo 9, ga bjale re phela nakong yeo. Ka gona bao ba mmalwa ba šetšego ba ba 144 000 bao ba hwago nakong ya rena ba tsošetšwa bophelong bja legodimong ka ponyo ya leihlo. (1 Ba-Korinthe 15:51-55) Lega go le bjalo, bontši bja batho ka moka bo na le kholofelo ya go tsošetšwa bophelong bja Paradeise nakong e tlago mo lefaseng.

25. Ke’ng seo se tlago go ahla-ahlwa kgaolong e latelago?

25 Ee, Jehofa o tla fenya e le ka kgonthe lenaba la rena e lego lehu, e bile le tla tlošwa ka mo go sa felego! (Jesaya 25:8) Lega go le bjalo, o ka ipotšiša gore, ‘Ke’ng seo bao ba tlago go tsošetšwa legodimong ba yago go se dira moo?’ Ba tla bopa karolo ya pušo ya Mmušo o kgahlišago legodimong. Re tla ithuta mo go oketšegilego ka mmušo woo kgaolong e latelago.

^ ser. 19 Bakeng sa tsebišo mabapi le Letšatši la Kahlolo le motheo wa kahlolo, hle bona Mametletšo, matlakala 213-15.