Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Ke Eng Seo ge e le Gabotse Beibele e se Rutago?

 KGAOLO YA LESOME-SENYANE

Dula Leratong la Modimo

Dula Leratong la Modimo
  • Go rata Modimo go bolela’ng?

  • Re ka dula bjang leratong la Modimo?

  • Jehofa o tla putsa bjang bao ba dulago leratong la gagwe?

Na o ka dira Jehofa setšhabelo sa gago mehleng ye ya khuduego?

1, 2. Re ka hwetša kae botšhabelo bjo bo šireletšegilego lehono?

INAGANE o sepela ka thoko ga tsela letšatšing leo go nago le madimo. Leratadima e ba le leso kudu. Magadima a thoma go gadima le go duma, gomme pula e tšhologa wa go baka mafula. O a kitima gomme ka go gakanega o nyaka mo o ka tšhabelago gona. Ge o lebelela ka thoko ga tsela o bona mo o ka tšhabelago gona. Ke lefelo le le tiilego, le omilego gotee le leo le gogelago. O be o tla tšeela godimo gakaakang lefelo leo la tšhireletšo!

2 Re phela mehleng ya khuduego. Maemo a lefase a mpefala le go feta pele. Eupša go na le seširelo se se bolokegilego, botšhabelo bjoo bo ka re dirago gore re dule re šireletšegile kgobalong ya sa ruri. Ke lefelo lefe la polokego? Ela hloko seo Beibele e se rutago: “Ke bolêla le Morêna ke re: O ’thšabêlô sa-ka, ’me O sebô sa-ka; O Modimo wa-ka yo ke mmotilexo.”—Psalme 91:2.

3. Re ka dira bjang Jehofa setšhabelo sa rena?

3 Akanya ka seo! Jehofa, Mmopi le Mmuši wa legohle e ka ba setšhabelo sa rena se se šireletšago. A ka re boloka re šireletšegile, ka gobane  o matla kudu go feta motho le ge e le ofe goba selo le ge e le sefe seo se ka re gobatšago. Gaešita le ge re ka gobatšwa, Jehofa a ka kgona go dirolla mafelelo ka moka a mabe. Re ka dira bjang Jehofa setšhabelo sa rena? Re swanetše go mmota. Go feta moo, Lentšu la Modimo le re kgothaletša gore: “Itoteng leratong la Modimo.” (Juda 21) Ee, re swanetše go dula leratong la Modimo gomme re godiše tlemo e lerato le Tatago rena wa legodimong. Ka baka leo re ka kgodišega ka mo go feletšego gore ke setšhabelo sa rena. Eupša re ka e bopa bjang tlemo e bjalo?

LEMOGA GOMME O ARABELE LERATONG LA MODIMO

4, 5. Ke ditsela dife tše dingwe tšeo Jehofa a bontšhitšego ka tšona gore o a re rata?

4 E le gore re dule leratong la Modimo, re swanetše go kwešiša kamoo Jehofa a ilego a bontšha lerato la gagwe go rena. Nagana ka dithuto tše dingwe tša Beibele tšeo o ithutilego tšona ka thušo ya puku ye. E le Mmopi, Jehofa o re neile lefase gore e be legae la rena le le kgahlišago. O le tladitše ka dijo le meetse ka boati, ditšweletšwa tša tlhago, diphoofolo tše di kgahlišago le ponagalo e botse. Ka ge e le Mongwadi wa Beibele, Modimo o re utolletše leina la gagwe le dika tša gagwe. Go oketša moo, Lentšu la gagwe le utolla gore o rometše Morwa wa gagwe yo a rategago e lego Jesu lefaseng, a mo dumelela gore a tlaišege gomme a re hwele. (Johane 3:16) Ka gona mpho yeo e bolela’ng go rena? E re nea kholofelo ya bokamoso bjo bo kgahlišago.

5 Kholofelo ya rena ya bokamoso gape e ithekgile ka selo se sengwe seo Modimo a se dirilego. Jehofa o hlomile mmušo wa legodimong e lego Mmušo wa Mesia. Kgaufsinyane o tla fediša tlaišego ka moka gomme wa dira lefase gore e be paradeise. E fo nagana! Re ka phela moo ka khutšo le lethabo ka mo go sa felego. (Psalme 37:29) Ga bjale Modimo o re neile tlhahlo ya kamoo re ka phelago ka tsela e kaone e ka kgonegago gona bjale. E bile o re neile mpho ya thapelo, e lego tsela e dulago e bulegile ya go boledišana le yena. Tše ke ditsela tše mmalwa feela tšeo Jehofa a bontšhitšego gore o rata batho ka kakaretšo gotee le wena.

6. O ka arabela bjang leratong leo Jehofa a go bontšhitšego lona?

 6 Potšišo ya bohlokwa kudu yeo o swanetšego go e ela hloko ke e rego: Ke tla arabela bjang leratong la Jehofa? Ba bantši ba tla re, “Ge e le gabotse le nna ke swanetše go rata Jehofa.” Na ke kamoo o ikwago ka gona? Jesu o boletše gore taelo ye ke e kgolo kudu go di feta ka moka: “O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.” (Mateo 22:37) Ruri o na le mabaka a mantši a gore o rate Jehofa Modimo. Eupša na go ikwa feela gore o na le lerato le bjalo ke sohle seo se nyakegago gore o bontšhe gore o rata Jehofa ka pelo, moya le monagano ka moka?

7. Na go ikwa feela gore o rata Modimo ke sohle seo se nyakegago go bontšha gore o a mo rata? Hlalosa.

7 Bjalo ka ge go bontšhitšwe ka Beibeleng, go rata Modimo ke mo go fetago go fo ikwa gore o a mo rata. Ge e le gabotse, gaešita le ge maikwelo a go rata Jehofa e le a bohlokwa, maikwelo a bjalo ke feela mathomo a go mo rata e le ka kgonthe. Peu ya apola e bohlokwa bakeng sa go mediša moapola woo o tšweletšago dienywa. Lega go le bjalo, ge e ba o be o nyaka apola, na o be o tla kgotsofala ge e ba motho yo mongwe a be a ka fo go nea peu ya yona? Ga go bjalo le gatee! Ka mo go swanago, maikwelo a go rata Jehofa Modimo ke feela mathomo-mayo. Beibele e ruta gore: “Se ke seo lerato la Modimo le se bolelago, gore re boloke ditaelo tša gagwe; gomme ditaelo tša gagwe ga di boima.” (1 Johane 5:3) E le gore lerato la go rata Modimo e be la kgonthe, le swanetše go tšweletša dienywa tše dibotse. Le swanetše go bontšhwa ka ditiro.—Mateo 7:16-20.

8, 9. Re ka bontšha bjang gore re rata Modimo le go mo leboga?

8 Re bontšha gore re rata Modimo ge re ela hloko melao ya gagwe gomme re diriša melao ya gagwe ya motheo. Ga go thata kudu go dira bjalo. Go e na le gore e be e boima, melao ya Jehofa e diretšwe go re thuša go phela bophelo bjo bobotse, bja lethabo le bjo bo kgotsofatšago. (Jesaya 48:17, 18) Ka go phela  ka go dumelelana le tlhahlo ya Jehofa, re bontšha Tatago rena wa legodimong gore re leboga e le ka kgonthe dilo ka moka tšeo a re diretšego tšona. Ka manyami, ke ba sego kae feela lefaseng la lehono bao ba bontšhago tebogo e bjalo. Ga re nyake go ba ba sa lebogego go swana le batho ba bangwe bao ba phetšego nakong ya ge Jesu a be a le lefaseng. Jesu o ile a fodiša balephera ba lesome, eupša ke o tee feela yo a ilego a boa e le gore a mo leboge. (Luka 17:12-17) Ruri re tla nyaka go swana le o tee yo a ilego a leboga, e sego ba senyane bao ba ilego ba se leboge!

9 Ka gona, ke melao efe ya Jehofa yeo re swanetšego go e ela hloko? Re ahla-ahlile e mentši ya yona ka pukung ye, eupša anke re bušeletšeng e sego kae. Go ela hloko melao ya Modimo go tla re thuša gore re dule leratong la gagwe.

BATAMELA KGAUFSI KUDU LE JEHOFA

10. Hlalosa lebaka leo ka lona go lego bohlokwa gore re tšwele pele re hwetša tsebo ka Jehofa Modimo.

10 Go ithuta ka Jehofa ke mogato o bohlokwa kudu wa go batamela kgaufsi kudu le yena. Ke mogato wo o sa swanelago gore  o kgaotše. Ge e ba o be o le ka ntle bošegong bjo bo tonyago kudu gomme o oretše mollo, na o be o ka tlogela dikgabo di hwelela ke moka di time? Aowa. O be o tla tšwela pele o bešetša dikgong go dira gore mollo o dule o tuka kudu e bile o fiša. Bophelo bja gago ka noši bo ka ba bo le kotsing! Ka ge dikgong di tukiša mollo, le “xo tseba Modimo” go dira gore go rata ga rena Jehofa go matlafale.—Diema 2:1-5.

Go swana le mollo, lerato la gago la go rata Jehofa le nyaka go bešeletšwa e le gore le dule le tuka

11. Thuto ya Jesu e bile le mafelelo afe go balatedi ba gagwe?

11 Jesu o be a nyaka gore balatedi ba gagwe ba boloke lerato la go rata Jehofa le la go rata Lentšu la Gagwe le bohlokwa la therešo le phela e bile le tuka kudu. Ka morago ga tsogo ya gagwe, Jesu o ile a ruta ba babedi ba barutiwa ba gagwe ka diporofeto tše dingwe ka Mangwalong a Sehebere tšeo di phethagetšego ka yena. Mafelelo e bile afe? Ka morago ba ile ba re: “Na dipelo tša rena di be di sa fse ge a be a bolela le rena tseleng, ge a be a re bulela Mangwalo ka mo go feletšego?”—Luka 24:32.

12, 13. (a) Gare ga batho ba bantši lehono, go diregile’ng ka lerato la go rata Modimo le la go rata Beibele? (b) Re ka thibela bjang lerato la rena gore le se fole?

12 Ge o be o thoma go ithuta seo ge e le gabotse Beibele e se rutago, na o ile wa lemoga gore pelo ya gago e be e thomile go tlala ka lethabo, phišego le lerato la go rata Modimo? Ga go pelaelo gore o ile wa dira bjalo. Ba bantši ba ile ba ikwa ka mo go swanago. Tlhohlo ga bjale ke go boloka lerato leo le le tseneletšego le phela le go dira gore le gole. Ga re nyake go latela mokgwa wa lefase la lehono. Jesu o ile a bolela e sa le pele gore: “Lerato la ba bantši le tla fola.” (Mateo 24:12) O ka thibela bjang lerato la gago la go rata Jehofa gotee le ditherešo tša Beibele gore le se fole?

13 Dula o monya tsebo ya go tseba Jehofa Modimo le Jesu Kriste. (Johane 17:3) Naganišiša goba o nagane ka mo go tseneletšego ka seo o ithutago sona Lentšung la Modimo gomme o ipotšiše gore: ‘Se se nthuta’ng ka Jehofa Modimo? Ke lebaka lefe le lengwe leo le nneago lona gore ke mo rate ka pelo, monagano le moya wa-ka ka moka?’ (1 Timotheo 4:15) Go naganišiša mo go bjalo go tla boloka lerato la gago la go rata Jehofa le tuka.

14. Thapelo e ka re thuša bjang go boloka lerato la rena la go rata Jehofa le phela?

 14 Tsela e nngwe ya go boloka lerato la gago la go rata Jehofa le tuka ke ka go rapela ka mehla. (1 Ba-Thesalonika 5:17) Go Kgaolo 17 ya puku ye, re ithutile gore thapelo ke mpho e bohlokwa e tšwago go Modimo. Go swana le ge ditswalano tša batho di gola ge go e-na le poledišano e bulegilego le ya ka mehla, tswalano ya rena le Jehofa le yona e dula e le borutho e bile e phela ge re mo rapela ka mehla. Ke gabohlokwa gore dithapelo tša rena di se ke tša fetoga tša setlwaedi—mantšu feela a tlwaelegilego ao re a bušeletšago kudu ao a se nago maikwelo a kgonthe goba a se nago seo a se bolelago. Re swanetše go bolela le Jehofa go swana le ge ngwana a bolela le tate yo a rategago. Ke therešo gore re swanetše go bolela ka tlhompho, eupša ka bolokologi, ka potego le ka go tšwa pelong. (Psalme 62:8) Ee, thuto ya Beibele ya motho ka noši le thapelo e tšwago pelong ke dilo tše bohlokwa tša borapedi bja rena gomme di re thuša go dula leratong la Modimo.

HWETŠA LETHABO BORAPEDING BJA GAGO

15, 16. Ke ka baka la’ng re ka lebelela ka mo go swanetšego modiro wa go bolela ka Mmušo e le tokelo le lehumo?

15 Thuto ya Beibele ya motho ka noši le thapelo ke ditiro tša borapedi tšeo re ka di dirago ka sephiring. Lega go le bjalo, ga bjale anke re eleng hloko tsela ya borapedi yeo re e dirago phatlalatša: go bolela le ba bangwe ka ditumelo tša rena. Na o šetše o boletše le ba bangwe ka ditherešo tše itšego tša Beibele? Ge e ba go le bjalo, o thabetše tokelo e kgahlišago. (Luka 1:74) Ge re botša ba bangwe ditherešo tšeo re ithutilego tšona ka Jehofa Modimo, re dira kabelo e bohlokwa kudu yeo e filwego Bakriste ka moka ba therešo—e lego ya go bolela ditaba tše dibotse tša Mmušo wa Modimo.—Mateo 24:14; 28:19, 20.

16 Moapostola Paulo o ile a lebelela bodiredi bja gagwe e le selo se bohlokwa, a bo bitša lehumo. (2 Ba-Korinthe 4:7) Go bolela le batho ka Jehofa Modimo le merero ya gagwe ke modiro o phalago yohle woo o ka o dirago. Ke tirelo e direlwago Mong wa rena yo go se nago yo a swanago le yena, e bile e tliša  mehola e kaone kudu e ka kgonegago. Ka go tšea karolo modirong wo, o thuša batho ba dipelo tše botegago gore ba batamele kgaufsi le Tatago rena wa legodimong le gore ba thome go sepela tseleng e išago bophelong bjo bo sa felego! Ke modiro ofe woo o ka kgotsofatšago go phala woo? Go feta moo, go nea bohlatse  ka Jehofa le Lentšu la gagwe go oketša tumelo ya gago e bile go matlafatša lerato la gago la go mo rata. Le gona Jehofa o tšeela maiteko a gago godimo. (Ba-Hebere 6:10) Go dula o swaregile modirong wo go go thuša gore o dule leratong la Modimo.—1 Ba-Korinthe 15:58.

17. Ke ka baka la’ng bodiredi bja Bokriste e le bjo bo akgofilego lehono?

17 Go bohlokwa go gopola gore modiro wa go bolela ka Mmušo o akgofile. Beibele e re: “Bolela lentšu, e-ba go lona ka go phegelela.” (2 Timotheo 4:2) Ke ka baka la’ng go dira se go akgofile gakaakaa lehono? Lentšu la Modimo le re botša gore: “Le kxaufsi, ’tšatši le lexolo la Morêna! Le kxaufsi! Le tla ka lebelô le lexolo!” (Tsefanya 1:14) Ee, nako e tla ka lebelo yeo ka yona Jehofa a tlago go fediša tshepedišo ye ka moka ya dilo. Batho ba swanetše gore ba lemošwe! Ba swanetše go tseba gore bjale ke nako ya go kgetha Jehofa e le Mmuši wa bona. Bofelo bo “ka se diêxe.”—Habakuku 2:3.

18. Ke ka baka la’ng re swanetše go rapela Jehofa phatlalatša ka go kopanela le Bakriste ba bangwe ba therešo?

18 Jehofa o nyaka gore re mo rapele phatlalatša ka go kopanela le Bakriste ba bangwe ba therešo. Ke ka baka leo Lentšu la gagwe le rego: “A re naganelaneng gore re hlohleletšaneng leratong le medirong e mebotse, re sa tlogele go bokana ga rena gotee, go etša ge ba bangwe ba tlwaetše go dira bjalo, eupša re kgothatšana, kudu-kudu ka ge le bona letšatši le batamela.” (Ba-Hebere 10:24, 25) Ge re bokana le badumedi-gotee le rena dibokeng tša Bokriste, re ba le sebaka se se kgahlišago sa go tumiša le go rapela Modimo wa rena yo a rategago. Le gona re a agana le go kgothatšana.

19. Re ka dira bjang gore re matlafatše ditlemo tša lerato ka phuthegong ya Bokriste?

19 Ge re kopanela le barapedi ba bangwe ba Jehofa, re matlafatša ditlemo tša lerato le bogwera ka gare ga phuthego. Go bohlokwa gore re lebelele tše dibotse go yo mongwe le yo mongwe wa rena, ka ge Jehofa a lebelela tše dibotse go rena. O se ke wa letela phethego go badumedi-gotee le wena. Gopola gore ka moka ba boemong bjo bo sa swanego bja kgolo ya moya, le gore yo mongwe le yo mongwe wa rena o dira diphošo.  (Ba-Kolose 3:13) Tsoma go aga bogwera bja kgaufsi le bao ba ratago Jehofa ka mo go tseneletšego, gomme o tla ikhwetša o gola moyeng. Ee, go rapela Jehofa o e-na le bana beno le dikgaetšedi ba moya go tla go thuša gore o dule leratong la Modimo. Jehofa o putsa bjang bao ba mo rapelago ka potego gomme ka go rialo ba dula leratong la gagwe?

KATANELA ‘BOPHELO BJA KGONTHE’

20, 21. ‘Bophelo bja kgonthe’ ke’ng, gomme ke ka baka la’ng e le kholofelo e kgahlišago?

20 Jehofa o putsa bahlanka ba gagwe ba botegago ka bophelo, eupša bophelo bja mohuta ofe? Na o phela e le ka kgonthe ga bjale? Ba bantši ba rena re tla bolela gore karabo e molaleng. Ge e le gabotse, re a hema, re a ja e bile re a nwa. Re swanetše go ba re phela e le ka kgonthe. Le gona dinakong tša ge re thabile, re ka ba ra bolela gore, “Ke gona ge re phela e le ka kgonthe!” Lega go le bjalo, Beibele e bontšha ka tsela e kwagalago gore ga go motho yoo lehono a phelago e le ka kgonthe.

Jehofa o nyaka gore o thabele ‘bophelo bja kgonthe.’ Na o tla bo thabela?

21 Lentšu la Modimo le re kgothaletša gore re “swarelele ka go tia bophelong bja kgonthe.” (1 Timotheo 6:19) Mantšu ao a bontšha gore ‘bophelo bja kgonthe’ ke selo seo re holofelago go se hwetša nakong e tlago. Ee, ge re phethagetše, re tla be re phela ka kgopolo e tletšego ya lentšu bophelo, ka gobane re tla be re phela kamoo Modimo mathomong a bego a rerile gore re phele ka gona. Ge re tla be re phela lefaseng la paradeise re e-na le bophelo bjo bobotse, khutšo le lethabo ka mo go feletšego, mafelelong re tla thabela ‘bophelo bja kgonthe’—bophelo bjo bo sa felego. (1 Timotheo 6:12) Na yeo ga se kholofelo e kgahlišago?

22. Ke bjang o ka ‘swarelelago ka go tia bophelong bja kgonthe’?

22 Ke bjang re ka ‘swarelelago ka go tia bophelong bja kgonthe’? Tabeng yona yeo, Paulo o ile a kgothaletša Bakriste “gore ba dire botse” gomme “ba hume mediro e mebotse.” (1 Timotheo 6:18) Ka gona go molaleng gore go gontši go ithekgile tseleng yeo re dirišago ditherešo tšeo re ithutilego tšona Beibeleng. Eupša na Paulo o be a bolela gore re hwetša ‘bophelo bja kgonthe’ ka go dira mediro e mebotse? Aowa, ka gobane dikholofetšo tše bjalo di ithekgile e le ka kgonthe ka gore re hwetše  “botho bjo bo sa swanelago” bjo bo tšwago go Modimo. (Ba-Roma 5:15) Lega go le bjalo, Jehofa o thabela go putsa bao ba mo hlankelago ka go botega. O nyaka go go bona o phela ‘bophelo bja kgonthe.’ Bophelo bjo bo bjalo bja lethabo le bja khutšo bja ka mo go sa felego bo letše ka pele bakeng sa bao ba dulago leratong la Modimo.

23. Ke ka baka la’ng go le bohlokwa gore re dule leratong la Modimo?

23 Yo mongwe le yo mongwe wa rena o dira gabotse go ipotšiša gore, ‘Na ke rapela Modimo ka tsela yeo a e hlalositšego ka Beibeleng?’ Ge e ba letšatši le letšatši re kgonthišetša gore karabo ya rena ke ee, gona re tseleng e swanetšego. Re ka kgodišega gore Jehofa ke setšhabelo sa rena. O tla dula a bolokile batho ba gagwe ba botegago matšatšing ka moka a thata a mafelelo a tshepedišo ye ya kgale ya dilo. Jehofa gape o tla re phološetša tshepedišong e mphsa ya letago ya dilo yeo ga bjale e lego kgaufsi. Re tla thaba gakaakang go bona nako yeo! Le gona re tla thaba gakaakang gore re dirile diphetho tše di swanetšego mehleng ye ya bofelo! Ge e ba o dira diphetho tše bjalo gona bjale, o tla thabela ‘bophelo bja kgonthe,’ bophelo ka tsela yeo Jehofa Modimo a bego a rerile gore bo be ka yona, ka mehla le ka go sa felego!

Ithute ka mo go oketšegilego

Kgopela Thuto ya Mahala ya Beibele

Ke ka Baka la Eng o Swanetše go Ithuta Beibele?

Beibele e nea dikarabo tša dipotšišo tša bohlokwa go batho ba dimillione lefaseng ka bophara. Na o ka rata go ba yo mongwe wa bona?