Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ke Eng Seo ge e le Gabotse Beibele e se Rutago?

 KGAOLO YA LESOME-HLANO

Borapedi Bjoo Modimo a bo Amogelago

Borapedi Bjoo Modimo a bo Amogelago
  • Na madumedi ka moka a thabiša Modimo?

  • Re ka hlaola bjang bodumedi bja therešo?

  • Barapedi ba Modimo ba therešo lefaseng lehono ke bomang?

1. Re tla holega bjang ge e ba re rapela Modimo ka tsela e swanetšego?

JEHOFA MODIMO o tshwenyega kudu ka rena gomme o nyaka gore re holwe ke tlhahlo ya gagwe e lerato. Ge e ba re mo rapela ka tsela e swanetšego, re tla ba ba thabilego e bile re tla phema mathata a mantši bophelong. Le gona re tla hwetša ditšhegofatšo tša gagwe le thušo ya gagwe. (Jesaya 48:17) Lega go le bjalo, go na le madumedi a makgolo ao a ipolelago gore a ruta therešo ka Modimo. Eupša a fapane kudu dithutong tša wona tša mabapi le gore Modimo ke mang le seo a se letetšego go rena.

2. Re ka ithuta bjang tsela e swanetšego ya go rapela Jehofa, gomme ke mohlala ofe woo o re thušago go kwešiša se?

2 O ka tseba bjang tsela e swanetšego ya go rapela Jehofa? Ga go nyakege gore o ithute gomme o bapiše dithuto tša madumedi a a mantši ka moka. Go nyakega feela gore o ithute seo ge e le gabotse Beibele e se rutago ka borapedi bja therešo. Ka mohlala: Dinageng tše dintši, go na le bothata bja tšhelete ya bofora. Ge e ba o be o filwe mošomo wa go tsoma tšhelete e bjalo ya bofora, na o be o tla dira bjang? Na o be o tla swara mohuta o mongwe le o mongwe wa tšhelete yeo ka hlogo? Aowa. E be e tla ba gabohlale gore o ithute ka tšhelete ya kgonthe. Ka morago ga go tseba kamoo tšhelete ya kgonthe e lego ka gona, o tla kgona go lemoga tšhelete ya bofora. Ka mo go swanago, ge re ithuta kamoo re  ka hlaolago bodumedi bja therešo, re tla kgona go lemoga madumedi ao e lego a maaka.

3. Go ya ka Jesu, ke’ng seo re swanetše go se dira e le gore re amogelwe ke Modimo?

3 Ke gabohlokwa gore re rapele Jehofa ka tsela yeo a e amogelago. Batho ba bantši ba dumela gore madumedi ka moka a thabiša Modimo, eupša Beibele ga e rute seo. E bile ga go a lekana go fo ipolela gore ke Mokriste. Jesu o ile a re: “Ga se yo mongwe le yo mongwe yo a rego go nna, ‘Morena, Morena,’ a tlago go tsena mmušong wa magodimo, eupša go tla tsena yo a dirago thato ya Tate yo a lego magodimong.” Ka gona, gore re amogelwe ke Modimo re swanetše go ithuta seo a se nyakago go rena gomme re se dire. Jesu o biditše bao ba sa dirego thato ya Modimo gore ke “badiri ba go hloka molao.” (Mateo 7:21-23) Go swana le tšhelete ya bofora, bodumedi bja maaka ga bo na mohola wa kgonthe. Se sebe le go feta ke gore bodumedi bjo bjalo ge e le gabotse bo a gobatša.

4. Mantšu a Jesu a bolela’ng ge e le mabapi le ditsela tše pedi, gomme e nngwe le e nngwe ya tšona e lebiša kae?

4 Jehofa o nea yo mongwe le yo mongwe lefaseng sebaka sa gore a hwetše bophelo bjo bo sa felego. Lega go le bjalo, gore re hwetše bophelo bjo bo sa felego Paradeiseng, re swanetše go rapela Modimo ka mo go swanetšego gomme gona bjale re phele ka tsela yeo a e amogelago. Ka manyami, ba bantši ba gana go dira bjalo. Ke ka baka leo Jesu a ilego a re: “Tsenang ka kgoro e tshesane; gobane tsela e išago tshenyegong e petleke e bile e phatlaletše, gomme bao ba tsenago ka yona ke ba bantši; anthe kgoro ke e tshesane gomme tsela e išago bophelong e pitlagane, le gona ke ba sego kae ba ba e hwetšago.” (Mateo 7:13, 14) Bodumedi bja therešo bo lebiša bophelong bjo bo sa felego. Bodumedi bja maaka bo lebiša tshenyegong. Jehofa ga a nyake gore motho le ge e ka ba ofe a fedišwe, gomme ke ka baka leo a neago batho kae le kae sebaka sa gore ba ithute ka yena. (2 Petro 3:9) Ka gona go molaleng gore tsela yeo re rapelago Modimo ka yona e bolela bophelo goba lehu go rena.

 KAMOO O KA HLAOLAGO BODUMEDI BJA THEREŠO

5. Re ka lemoga bjang bao ba lego bodumeding bja therešo?

5 ‘Tsela e išago bophelong’ e ka hwetšwa bjang? Jesu o boletše gore bodumedi bja therešo bo tla bonagala maphelong a batho bao ba bo latelago. O ile a re: “Le tla ba tseba ka dienywa tša bona. . . . Sehlare se sengwe le se sengwe se sebotse se enywa dienywa tše dibotse.” (Mateo 7:16, 17) Ka mantšu a mangwe, bao ba lego bodumeding bja therešo ba tla lemogwa ka ditumelo tša bona le boitshwaro bja bona. Gaešita le ge ba sa phethagala e bile ba dira diphošo, barapedi ba therešo e le sehlopha ba tsoma go dira thato ya Modimo. Anke re eleng hloko dilo tše tshelelago tšeo di hlaolago bao ba lego bodumeding bja therešo.

6, 7. Bahlanka ba Modimo ba lebelela bjang Beibele, gomme Jesu o beile bjang mohlala tabeng ye?

6 Bahlanka ba Modimo ba thea dithuto tša bona Beibeleng. Beibele ka boyona e re: “Lengwalo ka moka le buduletšwe ke Modimo gomme le hola ka go ruta, go kgalemela, go lokiša dilo, go laya ka toko, gore motho wa Modimo a swanelege ka botlalo, a hlangwe ka mo go feletšego bakeng sa modiro o mongwe le o mongwe o mobotse.” (2 Timotheo 3:16, 17) Moapostola Paulo o ile a ngwalela Bakriste-gotee le yena gore: “Eitše ge le amogela lentšu la Modimo, leo le le kwelego go tšwa go rena, la le amogela, e sego e le lentšu la batho, eupša kamoo ruri le lego ka gona, e le lentšu la Modimo.” (1 Ba-Thesalonika 2:13) Ka gona, ditumelo le mekgwa ya bodumedi bja therešo ga se tša thewa diponong goba ditšong tša batho. Di theilwe Lentšung la Modimo le le buduletšwego, e lego Beibele.

7 Jesu Kriste o beile mohlala o swanetšego ka go thea dithuto tša gagwe Lentšung la Modimo. Ge a rapela Tatagwe wa legodimong, o ile a re: “Lentšu la gago ke therešo.” (Johane 17:17) Jesu o be a dumela Lentšu la Modimo gomme se sengwe le se sengwe seo a bego a se ruta se be se dumelelana le Mangwalo. Jesu o ile a bolela gantši gore: “Go ngwadilwe gwa thwe.” (Mateo 4:4, 7, 10) Ke moka ka morago Jesu o be a tsopola lengwalo. Ka mo go swanago, batho ba Modimo lehono ga ba rute dikgopolo  tša bona. Ba dumela gore Beibele ke Lentšu la Modimo, e bile ba thea dithuto tša bona ka go tia go seo le se bolelago.

8. Go rapela Jehofa go akaretša’ng?

8 Bao ba lego bodumeding bja therešo ba rapela Jehofa a nnoši e bile ba tsebatša leina la gagwe. Jesu o ile a tsebatša gore: “Ke Jehofa Modimo wa gago yo o swanetšego go mo rapela, gomme ke yena a nnoši yo o swanetšego go mo direla tirelo e kgethwa.” (Mateo 4:10) Ka gona, bahlanka ba Modimo ga ba rapele motho le ge e ka ba ofe ge e se Jehofa. Borapedi bjo bo akaretša go tsebiša batho gore leina la Modimo wa therešo ke mang le gore yena ke motho wa mohuta mang. Psalme 68:4 e re: “Leina la xaxwe ké Jehofa. Pele xa xaxwe Le xobê mexobô.” Jesu o beile mohlala wa go thuša ba bangwe gore ba tsebe Modimo, ka ge a ile a bolela thapelong gore: “Ke utolotše leina la gago bathong bao o nneilego bona go tšwa lefaseng.” (Johane 17:6) Ka mo go swanago, barapedi ba therešo lehono ba ruta ba bangwe ka leina la Modimo, merero ya gagwe le dika tša gagwe.

9, 10. Bakriste ba therešo ba bontšhana lerato ka ditsela dife?

9 Batho ba Modimo ba bontšhana lerato la kgonthe le le le se nago boithati. Jesu o boletše gore: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Bakriste ba pele ba be ba ratana ka tsela e bjalo. Lerato leo le theilwego melaong ya motheo ya Beibele le fenya mapheko a morafo, a tša leago le a botšhaba gomme le kopanya batho tlemong e sa kgaogego ya borwarre bja therešo. (Ba-Kolose 3:14) Ditho tša madumedi a maaka ga di na borwarre bjo bo bjalo bjo lerato. Re tseba bjang seo? Di a bolayana ka baka la diphapano tša botšhaba goba tša morafo. Bakriste ba therešo ga ba tšee dibetša e le gore ba bolaye bana babo bona ba Bakriste goba motho le ge e le ofe. Beibele e re: “Bana ba Modimo le bana ba Diabolo ba bonagala ka taba ye: Yo mongwe le yo mongwe yo a sa tšwelego pele a dira go loka ga a tšwe go Modimo, gomme go bjalo le ka yo a sa ratego ngwanabo. . . . Re swanetše go ratana; e sego go swana le Kaine yo a tšwelego go yo kgopo gomme a bolaya ngwanabo.”—1 Johane 3:10-12; 4:20, 21.

10 Ee, lerato la kgonthe le bolela se se fetago go se bolaye  ba bangwe. Bakriste ba therešo ba diriša nako ya bona, matla le dilo tša bona ka ntle le boithati bakeng sa go thušana le go kgothatšana. (Ba-Hebere 10:24, 25) Ba a thušana dinakong tša tlalelo, e bile ba dirišana le ba bangwe ka go botega. Ge e le gabotse, ba diriša keletšo ya Beibele maphelong a bona ya gore ba ‘direle bohle botse.’—Ba-Galatia 6:10.

11. Ke ka baka la’ng go le bohlokwa go amogela Jesu Kriste e le tsela ya Modimo ya go phološa?

11 Bakriste ba therešo ba amogela Jesu Kriste e le tsela ya Modimo ya go phološa. Beibele e re: “Ga go phološo go motho le ge e le ofe yo mongwe, gobane ga go leina le lengwe ka tlase ga legodimo leo le neilwego batho leo ka lona re tlago go phološwa.” (Ditiro 4:12) Ka ge re bone go Kgaolo 5, Jesu o neetše ka bophelo bja gagwe e le topollo bakeng sa batho ba kwago. (Mateo 20:28) Go oketša moo, Jesu ke Kgoši e kgethilwego ya Modimo Mmušong wa legodimong woo o tlago go buša lefase ka moka. Le gona Modimo o nyaka gore re kwe Jesu gomme re diriše dithuto tša gagwe ge e ba re nyaka bophelo bjo bo sa felego. Ke ka baka leo Beibele e bolelago gore: “Yo a dumelago go Morwa o na le bophelo bjo bo sa felego; yo a sa kwego Morwa a ka se ke a bona bophelo.”—Johane 3:36.

12. Go se be karolo ya lefase go akaretša’ng?

12 Barapedi ba therešo ga se karolo ya lefase. Ge a be a sekišwa ke mmuši wa Roma e lego Pilato, Jesu o ile a re: “Mmušo wa-ka ga se karolo ya lefase le.” (Johane 18:36) Go sa šetšwe naga yeo ba dulago go yona, balatedi ba therešo ba Jesu ke balata ba Mmušo wa gagwe wa legodimong gomme ka baka leo ba kgomarela ka go tia go se tšee lehlakore ditabeng tša dipolitiki tša lefase. Ga ba tšee karolo dingangišanong tša lona. Lega go le bjalo, barapedi ba Jehofa ga ba tsena-tsenane le seo ba bangwe ba kgethago go se dira mabapi le go tsenela mokgatlo wa dipolitiki, go nyaka go boutelwa go tša dipolitiki goba gona go bouta. Le gona ka ge barapedi ba Modimo ba therešo ba sa tšee lehlakore dipolitiking, ba kwa molao. Ka baka la’ng? Ka gobane Lentšu la Modimo le ba laela gore ba “ikokobeletše” mmušo wa “balaodi ba bagolo.” (Ba-Roma 13:1) Ge go e-na le go thulana magareng  ga seo Modimo a se nyakago le seo tshepedišo ya dipolitiki e se nyakago, barapedi ba therešo ba latela mohlala wa baapostola bao ba ilego ba re: “Re swanetše go kwa Modimo e le mmuši go e na le batho.”—Ditiro 5:29; Mareka 12:17.

13. Balatedi ba therešo ba Jesu ba lebelela bjang Mmušo wa Modimo, gomme ke kgato efe yeo ba e tšeago ka baka leo?

13 Balatedi ba Jesu ba therešo ba ruta gore Mmušo wa Modimo ke kholofelo e nnoši ya batho. Jesu o ile a bolela e sa le pele  gore: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.” (Mateo 24:14) Go e na le go kgothaletša batho go ithekga ka babuši ba batho gore ba rarolle mathata a bona, balatedi ba therešo ba Jesu Kriste ba goeletša ka Mmušo wa Modimo wa legodimong e le kholofelo e nnoši ya batho. (Psalme 146:3) Jesu o re rutile gore re rapelele mmušo woo o phethagetšego ge a be a re: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:10) Lentšu la Modimo le boletše e sa le pele gore Mmušo wo wa legodimong “o tlo phšatla mebušô [yeo e lego gona ga bjale] e mengwê ka moka wa e fediša; xe e le wôna, o tlo êma xo ya xo ile.”—Daniele 2:44.

14. Ke sehlopha sefe sa bodumedi seo o dumelago gore se fihlelela dinyakwa tša borapedi bja therešo?

14 Motheong wa seo re sa tšwago go se ahla-ahla, ipotšiše gore: ‘Ke sehlopha sefe sa bodumedi seo se theago dithuto tša sona ka moka Beibeleng gomme sa tsebatša leina la Jehofa? Ke sehlopha sefe seo se bontšhago lerato ka tsela yeo Jehofa a nyakago, seo se bontšhago tumelo go Jesu, seo e sego karolo ya lefase e bile se goelela gore Mmušo wa Modimo ke wona kholofelo e nnoši ya kgonthe bakeng sa batho? Go dihlopha ka moka tša madumedi mo lefaseng, ke sefe seo se fihlelelago dinyakwa tše?’ Ditherešo di bontšha gabotse gore ke Dihlatse tša Jehofa.—Jesaya 43:10-12.

O TLA DIRA’NG?

15. Ke’ng seo Modimo a se nyakago go tlaleletša tabeng ya go dumela gore o gona?

15 Go fo dumela go Modimo ga gwa lekana e le gore re mo kgahliše. Ge e le gabotse, Beibele e bolela gore gaešita le batemona ba dumela gore Modimo o gona. (Jakobo 2:19) Lega go le bjalo, go molaleng gore ga ba dire thato ya Modimo e bile ga a ba amogele. Gore re amogelwe ke Modimo, ga go nyakege feela gore re dumele gore o gona eupša re swanetše go dira le thato ya gagwe. E bile re swanetše go ikaroganya le bodumedi bja maaka gomme re kgomarele borapedi bja therešo.

16. Ke’ng seo se swanetšego go dirwa ge e le mabapi le go tšea karolo bodumeding bja maaka?

 16 Moapostola Paulo o bontšhitše gore ga se ra swanela go tšea karolo borapeding bja maaka. O ngwadile gore: “‘Tšwang gare ga bona, le itlhaole,’ go bolela Jehofa, ‘le lese go kgwatha selo se se sa hlwekago’”; “‘gomme ke tla le amogela.’” (2 Ba-Korinthe 6:17; Jesaya 52:11) Ka gona Bakriste ba therešo ba phema selo le ge e le sefe seo se sepedišanago le borapedi bja maaka.

17, 18. “Babilona o Mogolo” ke’ng, gomme ke ka baka la’ng e le mo go akgofilego gore re ‘tšwe go yena’?

17 Beibele e bontšha gore mehuta ka moka ya bodumedi bja maaka ke karolo ya “Babilona o Mogolo. * (Kutollo 17:5) Leina leo le re gopotša motse wa bogologolo wa Babilona, moo bodumedi bja maaka bo ilego bja thoma gona ka morago ga Meetse-fula a mehleng ya Noa. Dithuto tše dintši le mekgwa yeo ga bjale e tlwaelegilego bodumeding bja maaka e thomile kgale kua Babilona. Ka mohlala, ba-Babilona ba be ba rapela medimo ya boraro-botee. Lehono, thuto e kgolo ya madumedi a mantši ke Boraro-botee. Eupša Beibele e ruta ka mo go kwagalago gore go na le Modimo a nnoši feela wa therešo, Jehofa, le gore Jesu Kriste ke Morwa wa gagwe. (Johane 17:3) Ba-Babilona gape ba be ba dumela gore batho ba na le moya o sa hwego woo o phologago mmeleng ka morago ga lehu gomme o ka tlaišega lefelong la tlaišo. Lehono, go dumela go moya o sa hwego goba moya woo o ka tlaišegago mollong wa dihele go rutwa ke madumedi a mantši.

18 Ka ge borapedi bja Babilona ya bogologolo bo ile bja phatlalala le lefase, Babilona o Mogolo wa gona bjale a ka šupša ka mo go swanetšego e le mmušo wa lefase wa bodumedi bja maaka. Le gona Modimo o boletše e sa le pele gore mmušo wo wa bodumedi bja maaka o tla fedišwa ka ponyo ya leihlo. (Kutollo 18:8) Na o bona lebaka leo ka lona go lego bohlokwa gore o ikaroganye le karolo e nngwe le e nngwe ya Babilona o Mogolo?  Jehofa Modimo o nyaka gore ‘o tšwe go yena’ ka pela go sa dutše go sa na le nako.—Kutollo 18:4.

Ka go hlankela Jehofa o e-na le batho ba gagwe, o tla hwetša mo gontši kudu go feta moo o ka go lobago

19. Ke’ng seo o tlago go se hwetša ka go hlankela Jehofa?

19 Ka baka la phetho ya gago ya go tlogela go ikopanya le bodumedi bja maaka, ba bangwe ba ka kgetha go se sa gwerana le wena. Lega go le bjalo, ka go hlankela Jehofa o e-na le batho ba gagwe, o tla hwetša mo gontši kudu go feta moo o ka go lobago. Go swana le barutiwa ba pele ba Jesu bao ba tlogetšego dilo tše dingwe e le gore ba mo latele, mafelelong le wena o tla ba le bana beno gotee le dikgaetšedi ba moya. O tla ba karolo ya lapa le legolo la lefase ka bophara la dimilione tša Bakriste ba therešo bao ba go bontšhago lerato la kgonthe. E bile o tla ba le kholofelo e kgahlišago ya bophelo bjo bo sa felego “tshepedišong e tlago ya dilo.” (Mareka 10:28-30) Mohlomongwe ge nako e dutše e e-ya bao ba ilego ba go furalela ka baka la ditumelo tša gago ba tla hlahlobišiša seo Beibele e se rutago gomme ba ba barapedi ba Jehofa.

20. Ke tebelelo efe ya bokamoso yeo e lego gona bakeng sa bao ba lego bodumeding bja therešo?

20 Beibele e ruta gore Modimo kgaufsinyane o tla fediša tshepedišo ye e mpe ya dilo gomme e tla tšeelwa sebaka ke lefase le lefsa la go loka ka tlase ga pušo ya Mmušo wa gagwe. (2 Petro 3:9, 13) E tla ba lefase le le kgahlišago kudu gakaakang! Le gona lefaseng lona leo le lefsa la go loka, go tla ba le bodumedi bjo tee feela, mohuta o tee wa therešo wa borapedi. Na e ka se be gabohlale gore o gate megato e nyakegago ya gore o kopanele le barapedi ba therešo gona bjale?

^ ser. 17 Bakeng sa tsebišo e oketšegilego mabapi le lebaka leo ka lona Babilona o Mogolo e emelago mmušo wa lefase wa bodumedi bja maaka, bona Mametletšo, matlakala 219-20.