Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ruta Bana ba Gago

 THUTO 1

Sephiri Seo re Thabelago go se Tseba

Sephiri Seo re Thabelago go se Tseba

Na go na le motho yo a kilego a go botša sephiri?— * Beibele e bolela ka sephiri se sengwe se segolo seo e se bitšago “sephiri se sekgethwa.” Ke se sekgethwa ka gobane se tšwa go Modimo. E bile se bitšwa sephiri ka gobane batho ba be ba sa se tsebe. Gaešita le barongwa ba be ba nyaka go se tseba. Na o ka rata go tseba sephiri seo?—

O nagana gore barongwa ba be ba nyaka go tseba eng?

Kgalekgale Modimo o ile a bopa monna wa pele le mosadi. Maina a bona e be e le Adama le Efa. Modimo o ile a ba nea legae le lebotse leo le bitšwago serapa sa Edene. Ge nkabe Adama le Efa ba ile ba kwa Modimo, bona le bana ba bona nkabe ba ile ba dira gore lefase ka moka e be paradeise ya go swana le serapa sa Edene. Le gona nkabe ba ile ba phela moo Paradeiseng ka mo go sa felego. Eupša na o sa gopola seo Adama le Efa ba ilego ba se dira?—

Adama le Efa ba ile ba se kwe Modimo, ke ka baka leo lehono re sa phelego paradeiseng. Eupša Modimo o ile a re o tlo dira gore lefase ka moka e be le lebotse gape, gomme batho ka moka ba tla phela go lona ka mo go sa felego ba thabile. O tla dira se bjang? Go tšere nako e telele gore batho ba tsebe gore o be a tla dira seo bjang. E be e le sephiri.

Ge Jesu a be a le mo lefaseng, o ile a ruta batho ditaba tše dintši ka sephiri seo. O ile a ba botša gore sephiri seo se be se le mabapi le Mmušo wa Modimo. Jesu o ile a botša batho gore ba rapelele gore Mmušo wo o tle. Mmušo wo o tla dira gore lefase e be paradeise e botse.

Na o thabela gore o tseba sephiri se?— O se ke wa lebala gore batho bao ba kwago Jehofa ke bona feela bao ba tlago go phela Paradeiseng. Beibele e re botša ditaba tše dintši tša mabapi le banna le basadi bao ba ilego ba kwa Jehofa. Na o ka rata go tseba ka bona?— Anke re ithute ka ba bangwe ba bona gomme re bone gore re ka ba ekiša bjang.

^ ser. 3 Dithutong tše ka moka, o tla bona leswao la go swana le le (—) ka morago ga dipotšišo tše dingwe. Ye ke nako ya gore o khutše gomme o dumelele ngwana wa gago gore a arabe.