Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ruta Bana ba Gago

 THUTO 12

Motlogolo wa Paulo o be a na le Sebete

Motlogolo wa Paulo o be a na le Sebete

Anke re ithute ka lesogana leo le ilego la phološa bophelo bja malome wa lona. Malome wa lesogana leo e be e le moapostola Paulo. Ga re tsebe leina la lesogana leo, eupša re tseba gore le ile la bontšha sebete kudu. Na o ka rata go kwa gore le ile la dira eng?—

Paulo o be a le kgolegong kua Jerusalema. O be a golegilwe ka baka la ge a be a bolela ka Jesu. Banna ba bangwe ba babe ba be ba hloile Paulo, ka gona ba ile ba kwana gore ba mmolaye. Ba ile ba re: ‘A re kgopeleng molaodi wa madira gore a laele madira a gagwe gore a tliše Paulo kgorong. Re tla mo lalela tseleng, ke moka ge a feta, re tla mmolaya!’

Motlogolo wa Paulo o ile a botša Paulo le molaodi wa madira gore banna ba itšego ba nyaka go bolaya Paulo

Motlogolo wa Paulo o ile a kwa ka taba yeo. O be a tla dira eng? O ile a ya kgolegong gomme a botša Paulo ka yona. Gateetee Paulo o ile a mmotša gore a ye go botša molaodi wa madira ka taba yeo. Na o nagana gore go be go le bonolo gore motlogolo wa Paulo a bolele le molaodi yoo wa madira?— Aowa, ka gobane molaodi wa madira e be e le motho wa maemo a godimo. Eupša motlogolo wa Paulo o be a na le sebete gomme o ile a bolela le molaodi yoo wa madira.

Molaodi wa madira o ile a tseba gabotse seo a tlago go se dira. O ile a bitša madira a e ka bago a 500 gore a šireletše Paulo! O ile a a botša gore a felegetše Paulo Kesarea bošegong bjoo. Na bophelo bja Paulo bo ile bja šireletšega?— Ee, banna bale ba babe ba ile ba se kgone go mo hlasela! Seo ba bego ba se kwanetše se ile sa pala.

O ka ithuta eng kanegelong ye?— O ka ithuta gore le wena o ka ba le sebete go swana le motlogolo wa Paulo. Re swanetše go ba le sebete ge re bolela le ba bangwe ka Jehofa. Na o tla ba le sebete gomme wa tšwela pele o bolela ka Jehofa?— Ge o ka dira bjalo, o ka phološa bophelo bja motho yo mongwe.