Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Ruta Bana ba Gago

 THUTO 7

Na o Fela o Lewa ke Bodutu le go Boifa?

Na o Fela o Lewa ke Bodutu le go Boifa?

Lebelela mošemanyana yo a lego mo seswantšhong. Na ga a bonagale a lewa ke bodutu e bile a boifa? Na le wena o kile wa ikwa ka tsela yeo?— Motho yo mongwe le yo mongwe o fela a ikwa ka tsela yeo. Beibele e bolela ka bagwera ba Jehofa bao le bona ba ilego ba lewa ke bodutu le go boifa. Yo mongwe wa bona e be e le Eliya. Anke re ithute ka yena.

Isebele o be a nyaka go bolaya Eliya

Eliya o be a dula Isiraele kgalekgale, pele Jesu a ka belegwa. Ahaba e lego kgoši ya Isiraele, o be a sa rapele Modimo wa therešo e lego Jehofa. Ahaba le mosadi wa gagwe e lego Isebele ba be ba rapela modimo wa maaka yo a bitšwago Baali. Ka gona Baisiraele ba bantši le bona ba ile ba thoma go rapela Baali. Mohumagadi Isebele o be a na le pelo e mpe gomme o be a nyaka go bolaya batho ka moka bao ba bego ba rapela Jehofa, go akaretša le Eliya! Na o a tseba gore Eliya o ile a dira eng?—

 Eliya o ile a tšhaba! O ile a tšhabela lešokeng gomme a utama ka leweng. O nagana gore ke ka baka la eng a ile a dira seo?— Ee, o be a boifa. Eupša Eliya o be a se a swanela go boifa. Ka baka la eng? Ka gobane o be a tseba gore Jehofa o be a ka mo thuša. Jehofa o be a kile a bontšha Eliya matla a gagwe. Lebakeng le lengwe, Jehofa o kile a araba thapelo ya Eliya ka go romela mollo o tšwago legodimong. Ka gona ga go na pelaelo gore Jehofa o be a ka thuša Eliya le mo lebakeng le!

Jehofa o ile a thuša Eliya bjang?

Ge Eliya a be a le ka leweng, Jehofa o ile a bolela le yena a mmotšiša gore: ‘O nyaka eng mo?’ Eliya o ile a araba a re: ‘Go šetše nna feela yo a sa go hlankelago. Ke nnoši e bile ke boifa gore ke tla bolawa.’ Eliya o be a nagana gore barapedi ka moka ba Jehofa ba be ba bolailwe. Eupša Jehofa o ile a re go Eliya: ‘Aowa, ga go bjalo. Go sa na le batho ba 7 000 bao ba sa ntlhankelago. Eba le sebete. Go sa na le mošomo o montši wo ke nyakago o o dira!’ Na o nagana gore Eliya o ile a thabela go kwa seo?—

O ka ithuta eng go seo se diragaletšego Eliya?— O ka ithuta gore ga se wa swanela go ikwa o lewa ke bodutu le go boifa. O na le bagwera bao ba ratago Jehofa le bao ba go ratago. Le gona Jehofa o na le matla a magolo gomme o tla dula a go thuša! Na ga o thabele go tseba gore ga o nnoši?—

BALA KA BEIBELENG YA GAGO