Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2017

Macao

 MODIRO WA BOBOLEDI LE WA GO RUTA LEFASENG KA BOPHARA

Asia le Bohlabela bja Magareng

Asia le Bohlabela bja Magareng
  • DINAGA 49

  • BAAGI 4 464 374 770

  • BAGOELEDI 728 989

  • DITHUTO TŠA BEIBELE 771 272

Ka go Kopana le Motho o Tee, ba Bantši ba Ile ba Arabela

Kua Philippines, Jonathan o be a letetše go bona ngaka. Ge mosadi yo a šomago tafoleng ya go amogela baeng a bona a apere gabotse, o ile a mmotšiša ge e ba a šoma khamphaning ya inšorense. Jonathan o ile a hlalosa gore ke yena Hlatse ya Jehofa le gore o be a tlile moo go tlo thuša molwetši yo mongwe wa Hlatse ka ditaba tše dingwe tša kalafo. A kgahlegile, Laila yo a šomago e le moamogelabaeng, o ile a botša Jonathan gore tatagwe yo e sego kgale a hlokofetše o be a dula a bala  Morokami. Jonathan o ile a bala le yena lengwalo la Johane 5:28, 29 ke moka a mo nea kopi ya pampišana ya Kholofelo ke Efe ka Baratiwa Bao ba Hwilego?

Philippines: Jonathan o ile a nea bohlatse go moamogelabaeng

Ge Jonathan a etela sepetlele gape, o ile a tlela Laila dikgatišo tše oketšegilego gomme a mo tsebiša kgaetšedi yo a ilego a thoma go ithuta Beibele le yena. Go se go ye kae, ke ge monna wa Laila, moratho wa gagwe le mmagwe, bao ka moka ba dulago le yena, ba thoma go ithuta Beibele.

Rose yo e lego moagišani wa Laila, o ile a ya go Laila a mmotšiša lebaka leo ka lona a bago le baeng ba bantši. Laila  o ile a mo hlalosetša gore o be a ithuta Beibele le Dihlatse tša Jehofa. Ka baka leo, Rose le yena o ile a thoma go ithuta Beibele. Ge Rose a be a etetše moratho wa gagwe profenseng ya gabo, o ile a mmotša a thabile ka seo a bego a ithuta sona. Moratho wa gagwe e lego Abigail, le yena o ile a nyaka go tseba ka dilo tšeo a di kwelego, ka gona o ile a kgopela thuto ya Beibele. Mmago Rose le yena o ile a amogela thuto ya Beibele.

Laila o kolobeditšwe kopanong ya selete yeo e sa tšwago go feta. Mmagwe le yena ga bjale o kolobeditšwe. Moagišani wa gagwe, e lego Rose gotee le moratho wa Rose ba kolobeditšwe ngwageng wa go feta. Ga bjale mmago Rose o ya dibokeng ka mehla gomme ba bangwe ba lapa la gabo Laila ba tšwela pele ba ithuta Beibele. Tše ka moka di diregile ka go kopana le motho o tee sepetlele!

Go Fihlelela Difoa ka go Diriša Thekinolotši

Tšhemo ya polelo ya diatla ga bjale e a gola kua Sri Lanka. Ka 2015, Dihlatse di be di na le diaterese tša ka tlase ga tše 80 tša batho ba difoa, gomme di be di ngwadilwe dipampišaneng. Ga e sa le go tloga ka nako yeo, go ile gwa hlongwa phuthego ya mathomo ya Polelo ya Diatla ya Sri Lanka gomme gwa dirwa faele khomphutheng yeo e bego e na le maina a batho ba 420 gotee le diaterese tšeo di nago le kgokagano ya GPS. Bana babo rena ba ile ba ikgokaganya le mo e ka bago 80 lekgolong ya batho bao, e ka ba ka go ya go bona goba ka go boledišana ka go bonana bidiong goba ka go ngwalelana le bona melaetša. Banyalani bao e lego baromiwa ba re: “Ga bjale re kgona go nea bagoeledi bao e lego difoa tšhemo yeo ba ka šomago go yona. Pele ga moo, bagoeledi ba be ba etela feela batho ba difoa bao ba ba tsebago.”

Ditebogo go tšwa go Mohlankedi wa Mmušo

Bana babo rena ba kua Mongolia ba tšea karolo ka mafolofolo modirong o kgethegilego wa go nea bohlatse phatlalatša ka diteroli ditoropong tše dikgolo le ge dithempheretšha  di theogile go fihla go -30°C. Yo mongwe wa bahlankedi ba mmušo o ile a tšea dikgatišo teroling gomme a ngwala lengwalo la go leboga. O be a ngwadile gore: “Ke Mobuddha, eupša ke ile ka lebelela dikarolong tše dintši tša bophelo, ka gobane ke ema le molao wa motheo wo o rego ga se ra swanela go latela tsela e tee feela eupša re ithute le tše dingwe. Ka morago ga go bala tše dingwe tša dikgatišo tšeo le di neago batho, ke ile ka kgetha go le ngwalela lengwalo e le gore ke hlalose maikwelo a ka. Ke kgona go bona gabotse gore le diriša nako e ntši le matla go nea tsebišo yeo e šomago le yeo e thušago. Selo sa bohlokwa seo ke ithutilego sona dikgatišong tša lena ke gore Beibele ke puku yeo motho a swanetšego go e bala. Puku ye e ruta therešo. Beibele e nea tlhahlo ya kgonthe bakeng sa maphelo a rena. Ke leboga ka moka bao ba dirago maiteko a magolo go fetoleleng dikgatišo ka Semongolia. Gape ke rata go leboga ka moka bao go sa šetšwe gore go fiša kudu goba go tonya kudu, ba neago batho dikgatišo gore di ba thuše.”

Mongolia: Go nea bohlatse phatlalatša mo go tonyago

Thapelo ya Lona e Ile ya Kwewa

Kua Hong Kong, ngwanabo rena wa mmulamadibogo yo a bitšwago Brett o ile a kopana le lesogana leo le lego mengwageng ya lona ya bo-20, ke moka a le fa pampišana ya Ke’ng Seo se Dirago Gore Bophelo bja Lapa bo Thabiše? Ge lesogana leo le bona pampišana yeo le ile la lla. Le ile la hlalosa gore le godišeditšwe therešong, eupša ge le be le na le mengwaga e 16, la tšhaba gae. Mengwageng e latetšego e mehlano lesogana leo le ile la dula seterateng gomme la lemalela dihlaretagi go fihlela le ka hwetšwa le go thušwa ke mokgatlo wa go thuša batho.

Lesogana leo le ile la hlalosa gore mesong yeo le kopanego le ngwanabo rena yoo, le be le ile la rapela ka gore: “Ge e ba bodumedi bja bofseng bja ka e le bjona bja therešo,  hle mpontšhe leswao lehono.” Le ile la bona gore thapelo ya lona e be e arabilwe. Bobedi bja bona ba ile ba ya lebenkeleng la kgauswi la go rekiša kofi, moo ba ilego ba ahlaahla poroutšha ya Boela go Jehofa. Ka ge lesogana leo le be le swanetše go boela Fora bošegong bjoo, ba ile ba fana boitsebišo bjo ba ka ikgokaganyago ka bjona. Ka morago, lesogana leo le ile la ngwalela Brett la re: “Ngwanešo yo a rategago, Jehofa o arabile thapelo ya ka. Ke tla ya holong ya kgauswi ka Sontaga.” O ile a ikgokaganya le Dihlatse tša naganeng ya Fora gomme a thoma go ithuta Beibele le go ya dibokeng.