Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2017

Sierra Leone: Crystal o a thušwa

 MODIRO WA BOBOLEDI LE WA GO RUTA LEFASENG KA BOPHARA

Afrika

Afrika
  • DINAGA 58

  • BAAGI 1 109 511 431

  • BAGOELEDI 1 538 897

  • DITHUTO TŠA BEIBELE 4 089 110

O Ile a Rapelela Gore a Hwetše Difoa

Kua Sierra Leone, Crystal yo e lego moromiwa yo a hlankelago tšhemong ya polelo ya diatla, o ile a thoma letšatši ka go rapelela gore a hwetše difoa tšhemong yeo. Mesong yeo, ge a be a boela go motho yo a thabelago, o ile a sepela ka tsela yeo a bego a sa tlwaela go tla ka yona. O ile a botšiša baagišani ge e ba ba tseba motho yo e lego sefoa tikologong yeo gomme ba ile ba mo romela ntlong e nngwe. Ge a fihla moo o ile a kopana le kgarebe yeo e  nago le bogwera yeo e ilego ya amogela molaetša gomme ya bontšha gore e ka thabela go ya dibokeng tša polelo ya diatla. Ke moka batho ba motsaneng woo ba ile a ba botšiša Crystal ge e ba a ka rata go kopana le sefoa se sengwe. Ka gona, o ile a hwetša motho yo mongwe yo a ikokobeditšego yo a bego a tsoma therešo. Le ge a be a šomile setarateng seo ka makga a mmalwa, o be a se a ka a kopana le difoa tšeo a bego a kopane le tšona mesong yeo. Crystal o kgodišegile gore nkabe a se a ka a hwetša batho ba bao ba thabelago ka ntle le go thušwa ke Jehofa.

“Ruri Polelo Yeo e be e Bolela le Nna!”

Emmanuel, yo a dulago Liberia, o be a sepela ka koloi a eya Holong ya Mmušo dibokeng tša mafelobekeng. Kgauswi le tsela go be go eme lesogana leo le aperego gabotse leo le bego le bonagala le gateletšegile kudu. A kgomilwe ke ponagalo ya lona, Emmanuel o ile a emiša koloi go bona ge e ba a be a ka thuša ka tsela e itšego. Leina la lesogana leo ke Moses. Lesogana leo le be le utsweditšwe tšhelete ka moka bošegong bjo bo fetilego, gomme ga bjale le be le nagana go ipolaya. Emmanuel o ile a theetša seo Moses a bego a mo hlalosetša sona gomme ka botho a re go yena: “Hle eya le nna Holong ya Mmušo.” Bobedi bja bona ba ile ba ya holong. Moses o ile a llišwa ke seo a ilego a se kwa moo. Ka morago ga gore a kwe polelo ya phatlalatša, Moses o ile a re: “Ruri polelo yeo e be e bolela le nna! Dihlatse tša Jehofa ke batho ba moswananoši.” Bofelong bja seboka, Moses o ile a dumela go ithuta Beibele gomme ga bjale o ya dibokeng tša phuthego ka mehla.

 “Ga ke Moheitene”

Aminata ke morutwana wa mengwaga e 15 wa kua Guinea-Bissau. Ge a be a na le mengwaga e 13, morutiši wa gagwe o ile a kgopela klase gore e thale diširadifahlego (di-mask) le dilo tše dingwe tšeo di sepedišanago le menyanya ya boithabišo ya carnival. Go e na le gore Aminata a thale diswantšho tšeo, o ile a thala seswantšho sa diphoofolo le dimela ke moka a ngwala gore “Paradeise” seswantšhong sa gagwe. Ge morutiši a kgobokanya diswantšho tšeo di thadilwego, o ile a botša Aminata gore seswantšho sa gagwe se be se tšwile tabeng ke moka a mo fa lefeela dimarakeng tša gagwe. Ka morago ga klase, Aminata o ile a ya go morutiši gomme a mmotšiša gore: “Menyanya ya boithabišo ya carnival ke ya bomang?”

Morutiši o ile a araba ka gore: “Ke ya baheitene.”

Guinea-Bissau: Aminata o thala seswantšho sa “Paradeise”

Aminata o ile a araba ka gore: “Ga ke moheitene. Ka gona ga ke tšee karolo menyanyeng ya mohuta woo. Ke dumela gore kgauswinyane Modimo o tlo fetoša lefase gore e be paradeise, gomme ke seo ke se thadilego.” Morutiši o ile a bolela gore o tla fetoša molekwana woo gomme a ba ngwalela dipotšišo. Mafelelo e bile afe? Aminata o ile a hwetša dimaraka tše 18 go tše 20.

Go Ile gwa tla ba Bantši Kudu

Sehlopha seo se lego lekatana motsaneng o monyenyane kua Malawi se na le bagoeledi ba šupago. Se kopanela moo go agilwego ka dikota, bjang le magogwa. Ka baka la go tutuetšwa ke ketelo ya molebeledi wa tikologo, bana babo rena ba be fišega kudu ge ba be ba laletša batho gore ba tle Segopotšong sa lehu la Kriste. Seboledi se ile sa nea polelo ya  Segopotšo se bonegetšwe ke mabone a makhura ao a lekeleditšwego godimo. Eupša se be se sa kgone le go šutha ka gobane se be se dikologilwe ke batho ba bantši kudu bao ba thabelago. Akanya kamoo bagoeledi ba 7 ba ilego ba thaba ka gona ge ba ekwa gore go be go tlile batho ba 120!

Malawi: Bao ba bilego gona e be e le ba 120

Poroutšha e Thušitše Lenyalo la Gagwe

Masolo a kgethegilego a go nea bohlatse mafelong a batho bohle ditoropong gantši a feleletša ka ditšhegofatšo tšeo di sa bonagalego le semeetseng. Kua Lomé, e lego motsemošate wa Togo, mosadi o ile a ya teroling ya dikgatišo ka go dikadika gomme a tšea poroutšha e rego Lapa la Gago le ka Thaba. Go ile gwa latela poledišano e kopana mabapi le lengwalo la Baefeso 5:3. Mosadi yoo le Dihlatse ba ile ba fana dinomoro tša mogala. Ka morago ga dibeke tše pedi, mosadi yoo o ile a letša gomme a re: “Ke be ke tloga ke sa rate Dihlatse tša Jehofa. Lega go le bjalo, ke badile poroutšha yela gomme e kgahliša kudu. E šetše e nthušitše go rarolla a mangwe a mathata a ka a lenyalo, e bile ke šetše ke thušitše le batho ba bangwe ba bane bao ba lego lenyalong. Ke be ke na le pono e fošagetšego ka Dihlatse tša Jehofa. Ke kgopela gore le tle le nthute Beibele.” Go ile gwa thongwa thuto le mosadi yoo gotee le ba bangwe ba banyalani bao a ilego a ba thuša.

O Fetoletše Poroutšha

Ankasie ke torotswana ya kua Ghana. Barekiši ba mmalwa ba bea dilo tšeo ba di rekišago kgauswi le tsela e kgolo. Lega go le bjalo, Mošupologo o mongwe le o mongwe, go bewa teroli ya go nea bohlatse mafelong a batho bohle. Ka morago ga gore Enoch a newe bohlatse ke ngwanabo rena yo a bitšwago Samuel, o ile a amogela poroutšha ya Listen to God gomme a botšiša Samuel ge e ba a na le dikgatišo le ge e le dife ka leleme la Sekusaal.

Ghana: O fetoletše poroutšha ka Sekusaal

 Samuel o ile a araba ka gore: “Ka maswabi ga re na tšona. Eupša re na le diporoutšha ka leleme leo le sepedišanago le lona la Sefrafra.” Ka morago, pele Enoch a ka tšea leeto la go ya ga gabo ka leboa, o ile a kgopela dikgatišo tše dingwe gore a yo di fa ba leloko.

Ge a boa Ankasie, o ile a nea Samuel sengwalwa. Enoch o be a fetoletše poroutšha ya Listen to God ka Sekusaal. O tšwela pele a eya dibokeng le go ithuta Beibele ka mehla.