Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 GEORGIA

Monna wa ka o be a sa Kgaotše go Bala!

Marina Kopaliani

Monna wa ka o be a sa Kgaotše go Bala!
  • O BELEGWE KA 1957

  • O KOLOBEDITŠWE KA 1990

  • PEGO YA BOPHELO BJA GAGWE Marina le monna wa gagwe Badri, e bile bagoeledi ba mafolofolo ge ba dutše ba godiša barwa ba bona ba babedi. Ka morago Badri o ile a hlankela Komiting ya Naga gomme a dula a botega go fihlela a hlokofala ka 2010.

KA 1989, nna le monna wa ka re ile ra kopana le Dihlatse tša Jehofa ka lapeng la moagišani wa rena. Ngwanabo rena Givi Barnadze, yo a bego a ithuta Beibele le moagišani wa rena, o be a se na kopi ya gagwe ya Beibele. Mehleng yeo go be go se bonolo go hwetša Dibeibele Georgia.

Re ile ra thabišwa ke seo re se kwelego gomme ra duma go ba le Beibele. Ge monna wa ka a kopana le buti wa gagwe, o ile a mmotša gore o nyaka Beibele. O ile a makala ge buti wa gagwe a re o sa tšwa go reka phetolelo e mpsha ya Beibele ya Segeorgia le gore a ka thabela go mo nea yona e le mpho.

Ge Badri a boa gae, o ile a dula tafoleng a bala Beibele yeo go fihla bošego. Ge a tsoga letšatšing le le latelago, o ile a tšwela pele ka go bala. Ge ke boa mošomong, ke mo  hweditše a dutše tafoleng a sa bala Beibele. O be a sa kgaotše go bala! Ka gona, ke ile ka šišinya gore a kgopele matšatši a sego kae mošomong gore a feleletše go bala. Go se go ye kae, ke ge a feditše go bala Beibele ka moka.

Ge ka morago re thoma go ithuta puku ya Therešo ye Išago Bophelong bjo bo sa Felego le Ngwanabo rena Barnadze, re be re thabišitšwe kudu ke go ba le Beibele ya rena. Seo se ile sa šoma gabotse ka gore re be re se na kopi ya puku ya Therešo gomme morutiši wa rena a se na Beibele! Nna le Badri re ile ra kolobetšwa mo e ka bago ka morago ga ngwaga.