Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 GEORGIA

Lerato la Kgonthe la Bokriste ga le Fele

Lerato la Kgonthe la Bokriste ga le Fele

Igor: Bobedi bja rena re be re le ditho tša sehlopha sa Dihlatse seo se bego se le toropong ya Tkvarcheli, yeo e lego Abkhazia. Ka ge phuthego yeo sehlopha sa rena e bego e le karolo ya yona e be e le kgole le motse wa Jvari ka dikhilomithara tše e ka bago tše 85, ke be ke tšea leeto la go ya Jvari kgwedi le kgwedi, ke yo tšea dikgatišo tša sehlopha seo se lego lekatana. Ka 1992, ka morago ga gore mmušo wa Soviet Union o phuhlame, karolo yeo e ipušago ya Abkhazia e ile ya leka go ikarola. Go ile gwa tsoga ntwa magareng ga mašole a Georgia le sehlopha sa bao ba ikarolago, e lego seo se ilego sa baka mathata a mantši.

Gizo Narmania le Igor Ochigava

Bana ba babo rena ba babedi ba ile ba šoma mmogo go thušeng badumedigotee le bona nakong ya ntwa kua Abkhazia.

Gizo: Ke kolobeditšwe ke na le mengwaga e 21, e lego ngwaga pele ntwa e ka thoma. Ge ntwa e be e thoma, bana babo rena ba ile ba tšhoga le go se tsebe gore ba dire bjang modiro wa boboledi. Eupša Igor, yoo ka mehla e bego e le modiši yo botse, o ile a re kgothatša a re: “Ye ke nako yeo ka yona batho ba tlogago ba nyaka kgothatšo. Tsela feela yeo ka yona re ka dulago re na le tswalano e tiilego  le Jehofa e tla ba ge re tšwela pele ka boboledi.” Letšatši le letšatši re ile ra tšwela pele re boledišana le baagišani ba rena ka molaetša o kgothatšago go tšwa Lentšung la Modimo, re dira seo ka šedi.

Igor: Ka baka la ntwa, re be re sa kgone go sepela ka tsela yeo e tlwaelegilego ge re eya le ge re boa Jvari go yo tšea dikgatišo tša rena. Ka ge ke goletše lefelong le, ke ile ka kgona go hwetša tsejana yeo e bolokegilego yeo e bego e phatša mašemong a teye le dithabeng. Lega go le bjalo, kotsi e nngwe e be e ka ba go kopana le sehlopha sa banna bao ba itlhamilego goba go gata sethuthupi seo se epetšwego. Le gona, ka ge ke be ke sa nyake go bea maphelo a bana bešo kotsing, ke be ke tšea leeto ke nnoši gatee ka kgwedi. Ka thušo ya Jehofa, ke be ke kgona go hwetša dikgatišo tšeo di lego nakong tšeo di re thušitšego go dula re tiile tumelong.

Le ge go be go se na ntwa Tkvarcheli, go ile gwa thoma go ba le dithibelo toropong ya rena. Ka baka la seo, re ile ra thoma go lebeletšana le mathata ao a tlišwago ke ntwa. Ge marega a dutše a batamela, dijo di ile tša thoma go fela gomme ka moka re be re tshwenyegile ka gore re tlo phela bjang. Re ile ra thaba kudu ge re ekwa gore bana babo rena ba Jvari ba be ba rulagantše lesolo la tlhakodišo gore ba tle ba re thuše!

Gizo: Ka letšatši le lengwe, Igor o ile a botšiša lapa lešo ge e ba ntlo ya gešo e ka dirišetšwa go bea le go aba dijo tšeo di lokišeditšwego ke bana babo rena. O be a rulaganya go yo lata dijo Jvari. Re be re tshwenyegile ka polokego ya gagwe ka ge re be re tseba gore o swanetše go feta mafelong a mmalwa ao go phuruphutšwago go wona. Le gona, o be a ka kopana le banna bao ba itlhamilego le mahodu.—Johane 15:13.

Ka morago ga matšatši a mmalwa, re ile ra thaba kudu ge re bona Igor a boa a bolokegile. O be a otlela koloi yeo e tletšego dijo tše di lekanego go ka re fepa dikgweding tše di latelago tša marega! Dinakong tšeo tše boima, re ile ra iponela gore lerato la kgonthe la Bokriste ga le fele.—1 Bakor. 13:8.