Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 GEORGIA

Ke Iponetše ka Mahlo a ka Seo Beibele e se Bolelago!

Pepo Devidze

Ke Iponetše ka Mahlo a ka Seo Beibele e se Bolelago!
  • O BELEGWE KA 1976

  • O KOLOBEDITŠWE KA 1993

  • PEGO YA BOPHELO BJA GAGWE O godišitšwe a tsena Kereke ya Orthodox kua Georgia, gomme o be a latela meetlo ya yona kudu. Ka morago ga go ithuta therešo ya Beibele, o ile a šoma Bethele le monna wa gagwe. Ga bjale ba hlankela e le babulamadibogo ba kgethegilego.

KE THOMILE go kwa ka Dihlatse nakong ya ge ke sa le moithuti kholetšheng yeo e lego motseng wa Kutaisi. Moagišani wa ka o ile a mpotša gore Dihlatse ga di diriše diswantšho borapeding bja tšona, e bile ga di dumele gore Jesu ke Modimo Ramatlaohle. Se se be se thulana le ditumelo tšeo ke bego ke di tšeela godimo ka ge ke be ke le Mokriste wa Kereke ya Orthodox.

Ge ke boela motsaneng wa gešo wa Tsageri ka selemo sa 1992, ke hweditše Dihlatse di le gona. Mma o be a kwele dilo tše dintši tše dibotse ka Dihlatse. Ka ge ke be ke sa na le pono e fošagetšego ka tšona, mma o ile a mpotša gore: “Sepela o yo iponela ka bowena seo di se rutago.”

Bana babo rena ba babedi ba babulamadibogo e lego Pavle le Paata, ba be ba fela ba etela lapa le lengwe motsaneng wa gešo. Baagišani ba rena ba bantši ba be ba ba theetša le go ba botšiša  dipotšišo. Ke ile ka phetha ka go yo theetša dipoledišano tšeo. Nako le nako ge ke be ke botšiša potšišo, bana babo rena ba be ba bula Beibele gomme ba nkgopela gore ke e bale. Seo se ile sa nkgahla kudu ka ge ke iponetše ka mahlo a ka seo Beibele e se bolelago!

Go se go ye kae, ke ile ka ba sehlopheng seo bana babo rena ba bego ba ithuta Beibele le sona. Selemong se se latelago, batho ba lesome sehlopheng seo, go akaretša le nna, ba ile ba kolobetšwa. Ka morago mma le yena o ile a ba Hlatse ya Jehofa.

Ke leboga gore bana babo rena ba ile ba araba dipotšišo tša ka ka moka ka go ntumelela gore ke ipalele dikarabo ka Beibeleng. Se se nthušitše gore ke lokiše bothata bjoo ke bego ke na le bjona ka seo ke bego ke se dumela. Ge ke gopola kamoo go bula Beibele ka tsela ye go nthušitšego ka gona, le nna ke diriša mokgwa wo go thuša ba bangwe gore ba amogele therešo ya Beibele!