Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2017

 GEORGIA

Ke Ile ka Kgopela Jehofa Gore a Ntlhahle

Tamazi Biblaia

Ke Ile ka Kgopela Jehofa Gore a Ntlhahle
  • O BELEGWE KA 1954

  • O KOLOBEDITŠWE KA 1982

  • PEGO YA BOPHELO BJA GAGWE O ile a thuša ka go gatiša dikgatišo ka sephiring, e bile o hlanketše e le yo mongwe wa balebeledi ba basepedi ba pele kua Georgia. Ka yona nako yeo o be a godiša bana ba bane.

MMA o ile a galefa kudu ge nna le mosadi wa ka Tsitso re e ba Dihlatse tša Jehofa. Ka letšatši le lengwe o ile a kgoboketša ba leloko ka moka, a holofetše gore ba tla ntlogediša go kopanela le Dihlatse. Ke ile ka botšwa gore ge ke sa tlogele go ba Hlatse, nka se sa ba wa gabo bona.

Ke ile ka dira phetho ya go huduga motseng wa gešo. Ka ge ke be ke šoma ka tšhipi, ke ile ka nagana ka go hudugela toropong ya bobedi ka bogolo kua Georgia e lego Kutaisi, moo ke bego ke tla hwetša mošomo gabonolo. Le gona ke be ke tseba gore go be go nyakega bagoeledi ba oketšegilego toropong yeo, ka gona ke ile ka kgopela Jehofa gore a ntlhahle.

Ka moragonyana ga moo ke ile ka kopana le yo mongwe wa barutwana ba ka ba Beibele, yoo a bego a dula toropong e nyenyane ya Jvari. Ge a ekwa gore ke nyaka go hudugela kua Kutaisi, o ile a nkgopela gore ke hudugele toropong ya gabo. O ile a mpotša gore: “Re na le folete. Nna le mosadi wa ka le bana ba rena re tla diriša phapoši e tee gomme wena le mosadi wa gago le tla diriša phapoši e nngwe.”

 Ka ge ke be ke nyaka thlahlo ya Jehofa, ke ile ka botša morutwana yoo gore ke tla dula le yena ka nakwana ge feela nka hwetša mošomo kapejana le lefelo la go dula Jvari. Ke ile ka makala kudu ge bjona bošegong bjoo a boa a tlo mpontšha mešomo yeo e hwetšagalago.

Matšatši a sego kae ka morago, re ile ra hudugela Jvari. Letšatši la mathomo re le moo, ke ile ka hwetša mošomo woo o lefago tšhelete e ntši. Mongmošomo wa ka o ile a re nea madulo ka ntlong e kgolo ya khamphani. Go se go ye kae, ke ile ka kgopelwa gore ke thuše ka go gatiša dikgatišo tšeo di theilwego Beibeleng ka sephiring. Ka ge ntlo yeo re bego re dula ka go yona e be e le e kgolo, nna le mosadi wa ka re ile ra e dirišetša mošomo woo.

Ka mengwaga e mentši, re ile ra swarela Segopotšo le ditiragalo tše dingwe tša bohlokwa ka ntlong ya rena e kgolo. Batho ba fetago ba 500 ba ile ba kolobetšwa legaeng la rena! Ke thabišwa ke gore ke ile ka bona gore Jehofa o a ntlhahla gomme ka latela thlahlo yeo.