Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 GEORGIA

Ke be ke Nagana Gore ke Atlegile

Madona Kankia

Ke be ke Nagana Gore ke Atlegile
  • O BELEGWE KA 1962

  • O KOLOBEDITŠWE KA 1990

  • PEGO YA BOPHELO BJA GAGWE E be e le setho sa Mokgatlo wa Makomanisi wa Georgia. O ile a thuša batho ba bantši go ithuta therešo. Ka 2015, o ile a aloga klaseng ya mathomo ya Sekolo sa Baebangedi ba Mmušo kua Tbilisi.

GE KE be ke ekwa therešo la mathomo ka 1989, ke be ke le setho seo se tumilego sa Mokgatlo wa Makomanisi wa toropong ya gešo ya Senaki. Ke be ke dula ke le gona Lekgotleng le le Phagamego la Soviet la Georgia, leo le swanago le palamente ya mehleng yeno. Le gona, ke be ke beeleditšwe ke lesogana le lengwe, ka gona ke be ke nagana gore ke atlegile.

Batswadi ba ka ba ile ba nthuta go rata Modimo. Ke ka baka leo ke bego ke dumela go Modimo, gaešita le ge ke be ke le Mokomanisi. Ge ke be ke thoma go ithuta Beibele, ke ile ka hwetša dikarabo tše di kgotsofatšago tša dipotšišo tša ka, ka gona ka phetha ka gore ke neele bophelo bja ka go Jehofa. Eupša ba lapa lešo, bagwera, batho bao ke bego ke šoma le bona le lesogana la ka ba be ba sa dumelelane le phetho ya ka.

 Bodumedi bja ka bjo bofsa bo ile bja dira gore ba leloko ba se sa nnyaka, e bile bo be bo sa sepedišane le mošomo wa ka wa dipolotiki. Ke ile ka phetha ka gore ke tloge gae, ke kgaogane le lesogana la ka, ke tlogele mošomo le go itokolla Mokgatlong wa Makomanisi le Lekgotleng le le Phagamego la Soviet. Ge ke se na go kolobetšwa, ba lapa lešo le bagwera ba ile ba nkgogiša boima kudu. Ka ge ke be ke tsebega kudu toropong ya gešo, ke ile ka hudugela motseng wa Kutaisi, moo ke ilego ka thoma go bula madibogo gateetee.

Ge batho ba mpotšiša gore na ruri go be go nyakega gore ke tlaišege ka tsela yeo ka baka la tumelo ya ka, ke ba araba ntle le go dikadika gore ke tloga ke thabela diphetho tšeo ke di dirilego. Le ge batswadi ba ka ba be ba sa kwešiše diphetho tša ka, ke leboga gore ba ile ba nthuta go rata Modimo le moagišani. Se se nthušitše kudu bophelong.