GO TLOGA mafelelong a bo-1990 go ya pele, Dihlatse tša Jehofa kua Georgia di ile tša thabela koketšego ya bagoeledi le ya bao ba thabelago. Ka 1998, batho ba 32 409 ba bile gona Segopotšong sa lehu la Kriste.

Lega go le bjalo, bagoeledi ba bantši go akaretša le bagolo ba diphuthego, e be e se kgale ba kopanela gomme ba se na phihlelo. Bontši bja bona bo be bo swanetše go tlwaetšwa dikarolong tše di fapafapanego tše bjalo ka thulaganyo ya mokgatlo le go dira boboledi. Eupša tlwaetšo yeo e be e tla fiwa bjang?

Mokgatlo wa Jehofa o Nea Thekgo e Oketšegilego

Arno le Sonja Tüngler, bao ba alogilego Sekolong sa Katološo sa Gilead kua Jeremane, ba ile ba romelwa Georgia ka March 1998. Ka wona ngwaga woo, Sehlopha se Bušago se ile sa dumelela gore go bulwe ofisi nageng ya Georgia. Ofisi yeo e be e hlokometšwe ke lekala la Russia.

Ka ntle le go senya nako, Komiti ya Naga e ile ya okamela modiro wa boboledi. Ka morago ga gore modiro wa rena o ngwadišwe semolao, dikgatišo tšeo di lego mabapi le Beibele di ile tša romelwa Georgia go tšwa lekaleng la Jeremane (leo ga bjale le bitšwago lekala la Bogareng bja Yuropa). Go ngwadišwa semolao ga modiro wa rena go re buletše tsela ya go reka mafelo a go aga Diholo tša Mmušo le meago ya makala.

Nako ya go Tlwaeletšwa Dilo tša Moya

Nakong ya ge mmušo wa Soviet o thibetše modiro wa Dihlatse, bagoeledi ba bantši ba be ba sa kgone go ya ka ntlo le ntlo go yo boledišana le batho ka Beibele ka bolokologi. Arno Tüngler o gopola ka gore: “Bagoeledi ba bantši ba be ba  dira modiro wa seterateng kudu, eupša ga se bohle bao ba bego ba tlwaetše go ya ka ntlo le ntlo le go boloka pego ya bao ba bontšhitšego kgahlego.”

Arno le Sonja Tüngler

Davit Devidze, yo a ilego a thoma go hlankela ofising yeo e bego e sa tšwa go hlongwa nageng ya Georgia ka May 1999, o hlalosa gore: “Go be go na le mošomo o montši tšhemong le Bethele. Go be go na le dilo tšeo re bego re badile ka tšona eupša re sa tsebe gore di dirwa bjang. Ka baka leo, re ile ra lebelela le go ithuta go bana babo rena bao ba nago le phihlelo bao ba bego ba rometšwe ke Sehlopha se Bušago.”

Bana babo rena ba Georgia ba ile ba newa tlwaetšo e tseneletšego. Eupša go swana le ge go direga ka bao ba hudugelago moo go na go le tlhokagalo, tlwaetšo ga e hole feela bao ba e newago. (Die. 27:17) Therešo ke gore bao ba bego ba tlile go tlwaetša ba bangwe ba ile ba ithuta mo gontši go bana babo le rena le dikgaetšedi ba Georgia.

Dihlatse tša Lefelong Leo di Bontšha Dika tše Dibotse

Arno le Sonja ba gopola tsela e borutho yeo ba amogetšwego ka yona matšatši ka morago ga go goroga Georgia. Bana babo rena le dikgaetšedi ba Georgia ba ile ba dira sohle seo  ba ka se kgonago go thuša Arno le Sonja go tlwaelana le kabelo ya bona e mpsha.

Sonja o gopola tsela ya batho ba moo ya go nea ka seatla se se bulegilego. O hlalosa gore: “Banyalani bao ba dulago kgauswi le rena ba be ba dula ba re tlišetša dijo tše bose. Kgaetšedi yo mongwe o be a sepela le rena tšhemong, a re tsebiša batho ba phuthego ya rena e mpsha le go re botša dilo tše dintši ka setšo sa Georgia. Kgaetšedi yo mongwe o ile a re ruta Segeorgia a sa re felele pelo.”

Warren le Leslie Shewfelt, bao ba rometšwego Georgia ka 1999 go tšwa Canada, ba boletše gore: “Re ile ra kgahlwa kudu le go kgongwa ke lerato leo bana babo rena le dikgaetšedi ba Georgia ba re bontšhitšego lona. Ka moka ga bona, go akaretša le ba banyenyane, ba be ba swarana ka borutho le ka lerato.”

Bana babo rena ba Georgia ba hlanketše le baromiwa bao ba nago le phihlelo ofising ya lefelong leo

Bao ba bego ba rometšwe Georgia go tšwa dinageng tše dingwe ba be ba šetša dika tše dibotse tša batho ba moo, go e na le go šetša mathata ao ba bego ba lebeletšana le ona. Ka  baka leo, go dira dilo ka boikokobetšo le ka lerato ga baromiwa go ile gwa dira gore ba ratwe ke bana babo rena ba Georgia.

Batho bao ba Boifago Modimo ba Arabela Ditabeng tše Dibotse

Mengwageng ka moka ya bo 1990, batho ba bantši ba dipelo tše di botegago ba ile ba arabela therešong. Ka ngwaga wa 1998 feela, go kolobeditšwe batho ba 1 724. Ke eng seo se dirilego gore batho ba bantši ba Georgia ba kgahlegele therešo?

Tamazi Biblaia, yo a hlanketšego mengwaga e mentši e le molebeledi wa tikologo, o hlalosa gore: “Go rata Modimo ke o mongwe wa moetlo wo batho ba moo ba o rutwago. Ka gona, ge re boledišana le bona ka molaetša wa Beibele, ba arabela gabotse.”

Davit Samkharadze, yo e lego mohlahli Sekolong sa Baebangedi ba Mmušo, o hlalosa gore: “Ge motho a thoma go ithuta Beibele, gantši ba leloko le baagišani ba leka go mo šitiša. Ge ba le gare ba leka go šitiša morutwana go ithuta Beibele, ba bantši ba bona ba feleletša ba ithuta Beibele!”

Ge molaetša wa Mmušo wa Modimo o le gare o phatlalala, o ile wa fetoša maphelo a batho ba bantši. Go ile gwa fihlelelwa tlhora e mpsha ya batho ba 36 669 bao ba bilego gona segopotšong ka April 1999.

“Go na le Baganetši ba Bantši”

Ge moapostola Paulo a ngwala mabapi le modiro wa gagwe wa boboledi kua Efeso o itše: “Ke bulegetšwe ke mojako o mogolo o išago modirong, eupša go na le baganetši ba bantši.” (1 Bakor. 16:9) Mantšu a gagwe a hlalosa gabotse boemo bjo Dihlatse tša kua Georgia di ilego tša lebeletšana le bjona dikgwedi tše sego kae ka morago ga Segopotšo seo se sa lebalegego sa ngwaga wa 1999.

 Ka August ya wona ngwaga woo, sehlopha sa Kereke ya Orthodox sa bao ba fišegelago bodumedi ka mo go feteletšego seo se bego se eteletšwe pele ke Vasili Mkalavishvili, yo e kilego ya ba moruti, se ile sa rulaganya seboka kua Tbilisi gomme sa fiša dikgatišo tša rena phatlalatša. Se se ile sa dira gore go be le tlaišo yeo e tšerego mengwaga e mene.

Go thoma ka 1999, Dihlatse tša Jehofa tša Georgia di ile tša hlaselwa le go tlaišwa gomme gwa fišwa dipuku tša tšona

Ka di-17 tša October 1999, batho ba sego kae bao ba fišegelago bodumedi ka mo go feteletšego ba ile ba kgobokanya batho bao e ka bago ba 200 gomme ba šitiša diboka tša Phuthegong ya Gldani kua Tbilisi. Ba ile ba betha bao ba bego ba le dibokeng ka dithoka goba melamo le difapano tša tšhipi gomme ba gobatša Dihlatse tše dingwe moo di ilego tša amogelwa bookelong.

Sa go nyamiša ke gore bahlasedi bao ga se ba ka ba swarwa, gomme ba ile ba tšwela pele ba hlasela Dihlatse. Bahlankedi ba bangwe ba mmušo go akaretša le Mopresitente Shevardnadze, ba be ba tloga ba le kgahlanong le ditlhaselo tšeo tše šoro, eupša ga go na seo ba ilego ba se dira. Ge e le gabotse, gantši maphodisa a be a fihla ka morago ga nako e telele tlhaselo e šetše e fetile.

Mo e nyakilego go ba ka nako e swanago, Guram Sharadze yo e lego setho sa palamente ya Georgia, o ile a tla ka ditsejana tšeo di bego di le kgahlanong le Dihlatse. O ile a latofatša Dihlatse ka gore di kotsi. Go be go bonagala go se sa na “dinako tše di loketšego” tša go bolela ditaba tše dibotse.

Mokgatlo wa Jehofa o Arabela Kganetšong

Mokgatlo wa Jehofa o ile wa arabela ka pela dinyakweng tša Dihlatse tša kua Georgia. Bana babo rena ba ile ba hwetša tlhahlo e lerato ya gore ba arabele bjang ge ba hlaselwa. Ba ile ba gopotšwa mabaka ao ka ona Bakriste ba therešo ba be go ba hlomarwa ka dinako tše dingwe.—2 Tim. 3:12.

 Go oketša moo, mokgatlo wa Jehofa o ile wa tšea dikgato tša semolao bakeng sa go emelela bana babo rena kgorong ya tsheko. Ngwanabo rena yo a hlanketšego Lefapheng la tša Molao lekaleng la Georgia, o gopola ka gore: “Mengwageng yeo e mene, re ile ra kgoboketša melato yeo e fetago 800 kgahlanong le sehlopha sa Vasili Mkalavishvili. Re ile ra kgopela bahlankedi ba mmušo le mekgatlo ya ditshwanelo tša batho gore ba re thuše. Ntlokgolo ya lefase ya Dihlatse tša Jehofa e ile ya rulaganya lesolo le legolo la go tsebiša ka ditlhaselo tšeo, eupša ditlhaselo ga se tša ka tša kgaotša.” *

^ par. 30 Bakeng sa tsebišo e oketšegilego mabapi le ntwa ya semolao ya go amogelwa ga ditokelo tša rena, bona Phafoga! (ya Seisemane) ya January 22, 2002, matlakala 18-24.