Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2017

 GEORGIA

“Go Modimo Dilo Tšohle di a Kgonega”

Natela Grigoriadis

“Go Modimo Dilo Tšohle di a Kgonega”
  • O BELEGWE KA 1960

  • O KOLOBEDITŠWE KA 1987

  • PEGO YA BOPHELO BJA GAGWE Kapejana ka morago ga gore a kolobetšwe, Natela yo e bego e le molaodi wa khamphani e itšego o ile a diriša phihlelo yeo a e hweditšego mošomong wa gagwe le batho bao a ba tsebago go dira gore mošomo wa go gatiša ka sephiring o tšwele pele.

MAFELELONG a bo-1980, moswari wa Thuto ya Morokami e be e le yena feela yo a nago le kopi ya makasine woo ge re le dibokeng, gomme gantši kopi yeo e be e ngwadilwe ka letsogo. Ke ile ka boledišana le ngwanabo rena Genadi Gudadze, e lego yo mongwe wa bagolo ba phuthegong ya gešo, gomme ka šišinya gore re gatiše dimakasine tša rena.

Pele ga moo, bana babo rena ba be ba diriša motšhene wa go dira dikopi wo o bitšwago mimeograph woo ba itiretšego wona gomme ba gatiša dikgatišo tše sego kae. E le gore ba kgone go tšweletša dimakasine ka mehla, go be go nyakega motšhene wo o šomago gabotse, motho yo a kgonago go thaepa, motšhene wa go thaepa le dipampiri tša go gatiša. Lega go le bjalo, didirišwa ka moka tša go gatiša, gaešita le dipampiri, di be di ngwadišwa le go laolwa ke mmušo.

Ke ile ka hwetša motšhene wa go thaepa go motho yo ke bego ke mo tseba yo a bego a tseba moo nka hwetšago metšhene yeo e lahlilwego yeo e bego e se sa laolwa ke mmušo. Moratho wa ka o be a kgona go thaepa gomme o be a tla re thuša. Bana babo rena ba ile ba dira motšhene o mofsa wa go dira dikopi gomme ba hwetša lefelo  leo ba ka rekago dipampiri tša go gatiša. Dilo ka moka di ile tša sepela gabotse, go se go ye kae ke ge re na le Morokami wa mathomothomo ka Segeorgia.

Eupša go ile gwa tšwelela bothata bjo bongwe. Ka letšatši le lengwe, Genadi o ile a mpotša gore: “Re swanetše go hwetša lefelo le lengwe la go reka dipampiri tša go gatiša.” O be a bone mekgobo ya dipampiri tša go gatiša ofising ya mmušo eupša a ka se kgone go di reka ka gore balaodi ba mmušo ba be ba mo lebeletše. Re be re tla di hwetša bjang? Ke ile ka bolela gantši gore: “Re ka se di hwetše!” Genadi o ile a araba a tiišitše a re: “O se ke wa re, ‘Re ka se di hwetše.’ ‘Go Modimo dilo tšohle di a kgonega’!”—Mat. 19:26.

Ke ile ka nagana ka taba yeo ka go se kgaotše, gomme letšatšing le le latelago ka ya diofising tša mmušo ke tšhogile. Jehofa o ile a dira gore ke kopane le mosadi yo mongwe yo a nago le bogwera yo a šomago ka go thaepa yo a bego a ikemišeditše go romela kgopelo ya ka go molaodi yo mogolo. Molaodi yoo e be e le monna wa gagwe! Go se go ye kae, ke ge ka mehla ke reka dipampiri tša go gatiša ofising yeo, gomme ka morago ga se ra ka ra ba le bothata bja go hwetša dipampiri tša go gatiša.