BAHLANKA ba Jehofa ba Georgia ba ile ba bolela ditaba tše dibotse ka mafolofolo gomme Jehofa o šegofaditše go šoma ga bona ka thata. Ka baka leo, ditaba tše dibotse di fihlile mo e ka bago dikarolong ka moka tša naga yeo.

Bagoeledi ba itokišeletša go nea bohlatse Ushguli, yeo e phagametšego lewatle ka dimithara tše 2 200

Lega go le bjalo, mengwageng e sa tšwago go feta, bagoeledi bao ba fišegago le babulamadibogo ba ile ba šetša kudu dinyakwa tša bao ba dulago ditšhemong tšeo di šongwago ka sewelo. Ditikologong tša dithabeng le metse le metsana yeo e lego kgole, go fihlwa feela ka dikoloi tše dikgolo goba di-cable car.

Bagoeledi ba tikologong ya Svaneti

 Ngwaga le ngwaga ga e sa le go tloga ka 2009, lekala la Georgia le ile la nea diphuthego ka moka lenaneo la ditšhemo tšeo di sa abjago, e le go laletša bagoeledi go thekga modiro wa boboledi mafelong ao. Ba bantši ba ile ba swanelwa ke go dira boikgafo bjo bogolo gore ba tšee karolo modirong woo.

Ana le Temuri Bliadze

Temuri le Ana Bliadze ba be ba sa tšwa go nyalana ge ba be ba ekwa gore go nyakega bagoeledi ba oketšegilego tikologong ya dithabeng ya Ajaria. Ba be ba sa tšwa go reka setsha gore ba age ntlo. Eupša ga bjale ba be ba bulegetšwe ke sebaka sa gore ba hlankele Jehofa ka mo go oketšegilego.

Ba ile ba thoma ka go fetša beke tikologong ya Ajaria. Ge Temuri a hlalosa gore go be go le bjang ge ba sa fihla, o re: “Bagoeledi ba moo ba be ba sepela ka maoto e le gore ba fihle metsaneng. Re be re na le koloi e kgolo gomme di sa tloga, ke ile ka nagana gore e be e ka thuša kudu moo.”

Ana o oketša ka gore: “Go be go se bonolo go huduga ka ge re be re tlwaelane kudu le phuthego ya rena le malapa a gabo rena. Eupša re ile ra kwa gore Jehofa o a re šegofatša.” Temuri le Ana ba šetše ba na le mengwaga ya ka godimo ga e meraro ba thekga sehlopha seo se lego Keda, e lego toropo ya tikologong ya Ajaria.

Babulamadibogo Bao ba Nago le Maano

Ruri thušo ya babulamadibogo ba kgethegilego ba nakwana e bile e kgolo kudu go thekgeng modiro wa boboledi mafelong ao a lego lekatana. Ge dikabelo tša bona di fela, babulamadibogo ba bantši ba ile ba phetha ka gore ba tšwele pele ba dula mafelong ao ba bego ba abetšwe go thuša go ona, e le gore ba tšwele pele ba hlokomela dithuto tša bona tša Beibele.

Dikgaetšedi tše pedi tša babulamadibogo tšeo di bitšwago ka leina la go swana la Khatuna, di be di dula toropong e botse ya Manglisi. Go be go se na Dihlatse toropong yeo, eupša dikgaetšedi tša rena tše pedi di be di atlega kudu tšhemong.  Kgweding ya pele di ile tša swara dithuto tša Beibele tše 9, kgweding e latelago tša swara tše 12, e latelago tše 15, gomme e latelago yeo, tša swara dithuto tše 18! Dikgaetšedi tšeo di ile tša phetha ka gore di se tloge toropong ya Manglisi gore di tšwele pele di hlokometše dithuto tša tšona tša Beibele.

Dikgaetšedi tšeo di ile tša swanelwa ke go loga maano a go itlhokomela ka tša boiphedišo. Batho ba bantši bao ba etelago Manglisi ba kgahlwa ke dilo tša moo tše dibotse—dilo tša go kgabiša tšeo di dirilwego ka dikhouni tša mophaene, tšeo di tsebjago ka go thuša tabeng ya tša maphelo. Ka gona, mathomong dikgaetšedi di be di kgoboketša dikhouni tša mophaene tšeo e sa lego tše ditala bakeng sa go itirela dilo tšeo di kgahlišago, tšeo di bego di di rekiša mmarakeng. Eupša dikgaetšedi tšeo di ile tša hwetša mokgwa o mongwe wa go iphediša woo di bego di sa o letela.

Ka letšatši le lengwe morutwana wa Beibele o ile a ba tlela matswianyana a mmalwa. Morutwana yoo o ile a hlalosa  gore e nngwe ya dikgogo tša gagwe e be e beela mae moo go iphihlilego gomme e tlile le matswianyana. Ka gona mosadi yo o be a nyaka go fa barutiši ba gagwe ba Beibele matswianyana ao a bego a se a a letela. Yo mongwe wa dikgaetšedi o be a kgona go rua dikgogo, ka gona dikgaetšedi tšeo di ile tša phetha ka go iphediša ka go rekiša dikgogo.

Yo mongwe wa dikgaetšedi tšeo o re: “Ka thušo ya Jehofa le bana babo rena le barutwana ba Beibele, re ile ra kgona go fetša mengwaga e mehlano re dula Manglisi.” Ga bjale go na le sehlopha sa bana babo rena le dikgaetšedi ba mafolofolo moo.

Khatuna Kharebashvili le Khatuna Tsulaia kua Manglisi

Go Bula Madibogo Tšhemong ya Leleme le Šele

Mengwageng e sa tšwago go feta, nageng ya Georgia go be go etla batho ba bantši bao ba tšwago dinageng tše dingwe. Babulamadibogo ba bantši ba ile ba lemoga gore go be go bulega mokgwa o mofsa wa go nea bohlatse. Ka gona ba ile ba thoma go ithuta maleme a bjalo ka Searaba, Seazerbaijan, se-China, Seisemane, Seperesia le Seturkey.

Le ge babulamadibogo ba bantši ba ile ba thuša dihlopheng le diphuthegong tša maleme a šele, ba bangwe ba ile ba hudugela mafelong ao go tlogago go nyakega bagoeledi ba oketšegilego. Giorgi le Gela ba be ba le mengwageng ya bona ya bo-20 ge ba be ba hudugela nageng ya kgauswi. Georgi o re: “Re be re tloga re nyaka go nea Jehofa sohle seo re ka se kgonago, gomme go hudugela moo go re neile sebaka se sebotse sa go dira bjalo.”

Ge Gela a hlalosa ka nako yeo a bilego moo o re: “Go hlankela ke le mogolo tšhemong e bjalo go nthutile mo gontši. Go a thabiša ge Jehofa a go diriša go thuša ‘dinku tša gagwe tše dinyenyane.’”—Joh. 21:17.

Giorgi o oketša ka gore: “Go be go na le ditlhohlo, eupša re ile ra tsepamiša kgopolo tirelong ya rena ntle le go belaela. Re be re ikwa gore re dira seo re bego re swanetšego go se dira.”

 Ngwanabo rena yo mongwe yo le yena leina la gagwe e lego Gela, o ile a hlankela Turkey ka mengwaga e sego kae. O gopola ka gore: “Mathomong ke be ke sa kgone go thaba ka ge ke be ke sa tsebe leleme la moo. Lega go le bjalo, mafelelong ke be ke thabile kudu ge ke be ke kgona go bolela le bana bešo le dikgaetšedi gaešita le batho ba tšhemong.”

Nino, yo e bego e le mmulamadibogo nageng ya Istanbul, Turkey, ka mengwaga ya ka godimo ga e lesome, o hlalosa maikwelo a gagwe ka tsela ye: “Letšatšing la pele ka morago ga go hudugela nageng yeo, ke ile ka bona thekgo ya Jehofa. Go ba mmulamadibogo nageng e šele go go nea sebaka sa gore o thabele diphihlelo tša moswananoši tše di swanago le tša ka Pukung ya Ngwaga mo e nyakilego go ba letšatši le lengwe le le lengwe.”