SEBOKENG sa ngwaga le ngwaga sa Watch Tower Bible and Tract Society of Pennsylvania seo se bego se swerwe ka di-3 tša October 2015, Ngwanabo rena Anthony Morris wa Sehlopha se Bušago o ile a tsebiša gore Sekolo sa Bodiredi sa Pušo ya Modimo, Seboka sa Tirelo le Thuto ya Beibele ya Phuthego di tlo tšeelwa legato ke seboka se sefsa seo se bitšwago Bophelo bja Rena le Bodiredi bja Bokriste. Ngwanabo rena Morris o ile a hlalosa gape gore Tirelo ya Rena ya Mmušo e tlo tšeelwa legato ke kgatišo e mpsha ya kgwedi le kgwedi ya mebalabala ya matlakala a seswai. Kgatišo yeo e na le sehlogo se se rego, Pukwana ya Seboka sa Bophelo bja Rena le Bodiredi bja Bokriste. Kgatišo yeo e bontšha lenaneo la seboka sa beke le beke e bile e na le diswantšho tšeo di hlametšwego go dira gore thuto ya Beibele ya motho ka noši e hole kutšwanyana.

 Seboka se se sefsa se na le dikarolo tše tharo tše dikgolo:

  1. Mahumo ao a Lego ka Lentšung la Modimo. Karolo ya mathomo ka tlase ga sehlogo se ke polelo ya metsotso e lesome yeo e theilwego mmalong wa Beibele wa beke le beke gotee le diswantšhong tšeo di lego pukwaneng ya seboka. Karolo ya bobedi e nago le sehlogo se se rego, “Go Epa Matlotlo a Moya,” ke poledišano ya metsotso e seswai ya dipotšišo le dikarabo tšeo di theilwego mmalong wa Beibele wa beke le beke gomme e latelwa ke mmalo wa Beibele wa metsotso e mene.

  2. Dira Sohle Bodireding. Ka kakaretšo karolong ye, barutwana ba bararo ba re bontšha tsela yeo re ka rutago ka yona leetong la pele, leetong la go boela le thutong ya Beibele.

  3. Bophelo bja Bokriste. Karolo ye e ahlaahla tsela yeo re ka dirišago melao ya motheo ya Beibele bophelong bja rena bja letšatši le letšatši. Sebopego sa bohlokwa karolong ye ke poledišano ya dipotšišo le dikarabo Thutong ya Beibele ya Phuthego.

Bagoeledi lefaseng ka moka ba lebogile kudu tlwaetšo e holago yeo ba e hwetšago sebokeng se se sefsa. Ngwanabo rena go tšwa Australia o ngwadile gore: “Seboka sa Bophelo bja Rena le Bodiredi se a kgahliša! Tsebišo ya sona e sepedišana le tsela yeo re phelago ka yona mehleng yeno, gomme dithero tša mohlala di bonolo. Go bonala eka mantšiboa ao a feta ka lebelo, ka ge dikarolo tša seboka e le tše dikopana, di opa kgomo lenaka e bile di tanya kgahlego, kudukudu dibidio gotee le go akaretšwa ga bana.”

Sehlopha sa bagolo sa kua Italy se ngwadile gore: “Re lemogile gore seboka se se sefsa se bile le tutuetšo go rena ka moka gore re lokišetše diboka ka mo go tseneletšego gomme seo se kaonefatša mokgwa wa rena wa go ruta. Seboka se se sefsa sa gare ga beke ke tsela e kgahlišago le yeo e kaonefetšego yeo Jehofa a e dirišago go ruta batho ba gagwe. Mogoeledi wa  mengwaga e 15 o itše: ‘Mathomong, go be go le thata gore ke fetše seboka ka moka ke tsepamišitše kgopolo. Eupša seboka se se sefsa se nthušitše go tsepamiša kgopolo le go lokišetša gabotse ke sa le gae.’”

Lapa le lengwe la kua Austria le ngwadile gore: “E be e le tlhohlo go dira mmalo wa rena wa Beibele wa beke le beke le morwedi wa rena wa mengwaga e lesome. Eupša karolo e rego, ‘Mahumo ao a Lego ka Lentšung la Modimo’ e re tutueleditše go nea dikarabo ka bolokologi. Ga bjale, boraro bja rena re thabela go lokišetša mmalo wa Beibele wa beke le beke. Go feta moo, re kgona go bona tšwelopele ya morwedi wa rena ya moya.”

Ines wa kua Jeremane o hlalosa gore: “Ke kwa ke tutueletšega go lokišetša diboka le go nagana ka tšona ka mo go tseneletšego. Ke thoma go dira nyakišišo e ntši ka mokgwa wo. Ga bjale, ke thabela tswalano ya kgauswi le Jehofa. Lefase la Sathane le dira gore ke ikwe ke lapile e bile ke sa nyake selo, eupša diboka di a ntapološa le go nthuša gore ke kgotlelele.”

Diphuthego tša Dihlakahlakeng tša Solomon di tloga di thabela seboka se se sefsa sa gare ga beke gomme di dira maiteko ohle go holwa ke seboka se ka mo go feletšego. Diphuthego tše dintši di mafelong ao a lego lekatana ao a se nago mohlagase goba Inthanete gomme bana babo rena ba moo ba phela bophelo bjo bonolo kudu. Diphuthego tšeo di kgona bjang go hwetša didirišwa tša go bapala bidio gotee le dibidio tšeo di bapalwago dibokeng kgwedi e nngwe le e nngwe? Bagoeledi ba phuthego e nngwe sehlakahlakeng sa Malaita ba phethile ka go šoma mmogo go rekiša di-coconut tše di omišitšwego. Ba ile ba neela ka tšhelete yeo phuthegong e le gore go ka rekwa sedirišwa se bonolo sa go bapala dibidio seo se tlatšwago ke matla a letšatši. E le gore ba hwetše dibidio tša kgwedi le kgwedi, bana babo rena ba ya lefelong la kgauswi  leo le nago le Inthanete e le gore ba taoneloute dibidio, ke moka ba abelana dibidio tšeo le bana babo bona.

Ngwanabo rena wa kua United States o ngwadile gore: “Ke motho yo a ithutago ka go lebelela diswantšho le dibidio. Ke katane le se ka nywaga e fetago e 40. Ke swanetše go bala selo gantši pele ke hwetša ntlha yeo ke tlago go e hlalosetša motho yo mongwe. Ka go re’alo, ke rata go leboga Sehlopha se Bušago ka didirišwa ka moka tša go ithuta tša dibidio le diswantšho tšeo re di hweditšego. Dibidio tša matseno a dipuku tša Beibele di a kgahliša, le diswantšho tšeo di lego ka pukwaneng ya rena ya seboka ke dilo tšeo ke tlogago ke di hloka! Go molaleng gore Jehofa o tloga a šegofaditše maiteko a lena a go dira se bakeng sa batho ba gagwe. Re leboga kudu.”

Malawi