Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2017

 DINTLHAKGOLO TŠA NGWAGOLA

“Le Baagišani ba Babotse Kudu”

“Le Baagišani ba Babotse Kudu”

KA DI-7 le di-8 tša May 2016, go be go na le lešata la batho bao ba bego ba fagahlile bogorogelong bja baeng ntlongkgolo ya lefase ka bophara kua 25 Columbia Heights, Brooklyn, New York. Gaešita le ge bogorogelo bja baeng le mafelo ao a bogwago moagong woo a be a sa bulwe mafelobekeng, eupša lebakeng le, baagišani bao ba dulago kgauswi le Bethele ba be ba laleditšwe go tlo bona pontšho ya rena ya histori ya Dibeibele.

Lesolo la go laletša batho le neile bohlatse bjo bobotse kudu lefelong leo gomme bao ba tšerego karolo go lona ba ile ba lapologa moyeng. Go be go tloga go kgothatša kudu go kwa dilo tše dibotse tšeo di bego di bolelwa ke baagišani ba rena ba kgale.

 Monna yo mongwe o itše: “Ke dutše dintlong tše di fapafapanego [kgauswi le Bethele] go tloga ka bo-1960, gomme le bile baagišani ba babotse kudu. Re tlo le gopola kudu, e bile re duma eka nkabe le sa sepele.”

Mosadi yo mongwe yena o itše: “Tikologo ya rena nkabe e sa hlabologa ka tsela ye ka ntle le lena. Re leboga kudu gore le bile baagišani ba rena mengwageng ye ka moka.”

Babulamadibogo ba bantši bao ba šomago tšhemo yeo ba be ba thabišitšwe ke go bona kamoo batho ba tikologong yeo ba bego ba na le bogwera ka gona e bile ba amogela molaetša. Monna yo mongwe wa tikologong yeo o lebogile mokgatlo wa rena kudu gomme a bolela gore ka manyami o tla be a se gona nakong yeo batho ba laleditšwego.

Tiragalo ye e bile le mafelelo a kgothatšago kudu. Ka matšatši a mabedi feela, go tlile baeng ba 48 bao e sego di Dihlatse go tlo bona pontšho ya Dibeibele. Nakong ya ge go bonwa meago, go be go na le ditho tša lapa la Bethele tše dintši bogorogelong bja baeng go tlo amogela le go boledišana le baagišani bao ba tlilego.

Sally, kgarebe yeo e lego mengwageng ya mafelelo ya bo-20, o feditše moo e ka bago seripa sa iri a lebeletše pontšho ya Dibeibele. Ge a fihla, babulamadibogo bao ba mo laleditšego ba be ba eme bogorogelong bja baeng. Sally o ile a re o be a sa tsebe gore go be go na le pontšho ya Dibeibele. Babulamadibogo ba ile ba mmotša gore go a kgahliša go kopana le motho yo a rutegilego yo a tšeelago Beibele godimo. Sally o ile a fetola ka gore: “Beibele e bohlokwa kudu. Ke yona feela yeo e ka re botšago molaetša wa Modimo. Ke puku ya bohlokwa kudu maphelong a rena.”

Sally o boletše gore tsela yeo a ikwago ka yona ka Beibele e mo tutueleditše go ithuta Selatine le Segerika le gore o  be a na le kgahlego e kgolo bofetoleding. O be a dumela gore go bohlokwa gore Beibele e fetolelwe ka mo go nepagetšego e le gore e se ke ya latela dipono tša batho. Ge babulamadibogo ba be ba botša Sally gore Wepesaete ya rena ya jw.org e na le dikgatišo tšeo di theilwego Beibeleng tšeo di fetoletšwego ka maleme a fetago a 800, o be a maketše kudu e bile a thabile. Ge dikgaetšedi tša rena di be di mo hlalosetša seo bafetoledi ba Beibele ba se dirilego ka leina la Jehofa, o ile a makala kudu gomme a botšiša gore: “Ke ka baka la’ng leina la Jehofa le ntšhitšwe ka Beibeleng?” Ge a tloga, Sally o ile a re: “Ga go na lefelo le lengwe leo ke ilego ka dula go lona ge e se tikologong ye gomme le baagišani ba babotse kudu.”

Mošupologong wa ka morago ga go bonwa ga meago, moruti yo mongwe o ile a tla go John yo e lego setho sa lapa la Bethele yo a bego a nea bohlatse ka teroli ya dikgatišo kgauswi le Bethele. O ile a botša John gore o thabetše kudu go etela Bethele le gore ke mo gobotse gore re latela Beibele. Lega go le bjalo, ka morago ga gore ba boledišane ka nakwana, gateetee monna yoo o ile a re: “Ke galefetše Dihlatse tša Jehofa!” John o be a gakanegile gomme a mmotšiša lebaka la seo. Monna yoo o ile a re: “Ka baka la gore le a huduga! DULANG MO! Rekang meago e megolo goba agang seo le se nyakago, eupša le se ke la sepela. Ke lena le dirago gore go be le bophelo tikologong ye. Go a nnyamiša go le bona le hudugela ka leboa.”

Ka kakaretšo, lesolo la go laletša batho le go tlo bona ga batho pontšho ya Dibeibele go neile bohlatse bjo bobotse kudu tikologong ya kgauswi gomme leina la Modimo le ile la bolelelwa kudu go baagišani ba rena go feta le ge e le neng pele.