Eya go dikagare

Eya go lelokelelo la dikagare

Dihlatse tša Jehofa

Kgetha leleme Sepedi

 DINTLHAKGOLO TŠA NGWAGOLA

Kgašo ya JW ‘e a re Matlafatša le go re Lapološa!’

Kgašo ya JW ‘e a re Matlafatša le go re Lapološa!’

GA E sa le go tloga ge seteišene sa thelebišene sa Inthaneteng seo se bitšwago Kgašo ya JW se e ba gona ka 2014, se dutše se kgothatša le go lapološa moyeng babogedi ba bantši lefaseng ka bophara. Ga bjale seteišene se se hwetšagala ka maleme a fetago a 90. Ka mohlala, ga bjale mananeo a fetolelwa ka maleme a Seewe, se-Ga le Setwi (bjalo ka ge go bontšhitšwe), e lego seo se thabelwago ke bagoeledi ba fetago ba 130 000 kua Benin, Côte d’Ivoire, Ghana le Togo. *

Agatha yo e lego mosadi wa molebeledi wa tikologo kua Ghana o re: “Ge ke theeditše ditho tša Sehlopha se Bušago le bathuši ba tšona ke kwa eka Jehofa o bolela le nna gona ka mo phapošing ya ka. Ka ntle ga sedirišwa se, ngwanenyana wa go swana le nna yo a dulago karolwaneng ye ya lefase o be a  ka ba bjang le tokelo e kgolo gakaakaa? Ruri e dira gore re ikwe re batamelane kudu le bana babo rena le dikgaetšedi ba lefaseng ka moka.”

Pego ya go tšwa Zambia e re: “Gaešita le ge diphuthego tše dintši di diila, fela bagoeledi ba dira maiteko a gore ba holwe ke Kgašo ya JW. Ka mohlala, Phuthego ya Misako e mo e ka bago bokgole bja dikhilomithara tše e ka bago tše 30 go tloga toropong ya kgauswi, e bile e lefelong la tša temo moo ge dipula di ena meetse a elelago gohle.” Simon yo e lego mohlanka wa bodiredi yo a ilego phuthegong yeo go yo thuša ka ge go nyakega bagoeledi ba oketšegilego, o hlalosa gore: “Kgwedi e nngwe le e nngwe go ba le motho yo a tšwago phuthegong yo a sepelago ka maoto mo e ka bago diiri tše pedi go fihla tseleng e kgolo gomme go tloga moo o namela senamelwa sa batho bohle go ya toropong yeo go yona bana babo rena ba kgonago go taonelouta mananeo. Monna wa mengwaga e 70 le barwa ba gagwe ba babedi ba be ba se ba ka ba tla dibokeng tša Dihlatse tša Jehofa, eupša monna yo o ile a kgahlwa ke go kwa gore dibidio di be di tla bontšhwa dibokeng lefelong la magaeng. Mokgalabje yoo o itše: ‘Ye ke tsela ya go ithuta ka Modimo.’”

Lengwalo la ditebogo go tšwa Russia le re: “Ga bjale ke ngwaga re bogela Kgašo ya JW gomme re thabela seo. Ka morago ga kgašo ya pele, gateetee re ile ra ikwa re le ngatana e tee le bana babo rena lefaseng ka bophara! E be e tloga e le selo se se kgahlišago! Re ikwa re le lapa letee le legolo! Re be re thabile kudu go bona bana babo rena ba rategago ba Sehlopha se Bušago. Ba leka ka gohle re nea dijo ka nako e swanetšego gomme ka moka ga rena re kgona go di hwetša. Re fela pelo ya go bogela kgašo e nngwe le e nngwe. E bile re ikgantšha le go feta ka go bitšwa Dihlatse tša Jehofa. Re a leboga bana babo rena ba ba rategago. Re leboga Jehofa le Kriste ka mediro ya bona ka moka e kgahlišago. E a re matlafatša le go re lapološa!”

 Horst le Helga, e lego banyalani ba tšofetšego bao ba babjago ba kua Jeremane, ba ngwadile gore: “Kgašo ya JW e kgahliša kudu. E a re matlafatša. Kudukudu re matlafatšwa ke diphihlelo tša bana babo rena le dikgaetšedi bao ba golofetšego. Mehlala ya bona e re tutuetša gore re dire sohle seo re ka se kgonago go sa šetšwe mathata a rena a tša maphelo. Ge re be re bona ngwanabo rena yo a golofetšego a hlankela e le mogolo, re ile ra ithuta gore yo mongwe le yo mongwe a ka kgona go nea Jehofa selo se itšego se bohlokwa. Ge re bona bana babo rena le dikgaetšedi ba bjalo ba beago mohlala o mobotse, re swanetše go leboga Jehofa gomme re mo kgopele gore a ba šegofatše kudu.”

Kodi wa kua Engelane, o re: “Re a le leboga bakeng sa nako ka moka le maiteko ka moka ao le a dirago go dira Wepesaete ya jw.org, Kgašo ya JW le dibidio tša Kabelo le Selina. Re leboga ge le dirile gore go be bonolo go kwešiša Beibele. Ke kolobeditšwe ke na le mengwaga e seswai. Ge ke godile, ke tlo ithaopela go thuša go aga Diholo tša Mmušo! Gape ke rata go tlo šoma Bethele. Ga bjale ke na le mengwaga e senyane, ka gona ke šaletšwe ke nako e nyenyane feela.”

Arabella yo a nago le mengwaga e seswai wa kua Engelane o ngwadile gore: “Ke leboga dibidio le mešongwana. Ruri di nthuša go tseba Jehofa gakaone. Mešongwana yeo e lego Wepesaeteng ya jw.org e nthuša gore ke ithute ka Jehofa e bile ke ipshina ka seo. Le kgona kudu go dira dikoša tšeo mang le mang a kgonago go di gopola. Dibidio tša Kabelo le Selina le tšona di a nthuša. Ke leboga kudu go šoma ga lena ka thata.”

^ par. 3 O ka bogela Kgašo ya JW ka go ya go tv.jw.org.