GE LEFASE la Sathane le tšwela pele le lebeletšana le masetlapelo ka go latelelana, barapedi ba Jehofa ba therešo ba tšwela pele ‘ka mehla ba na le mo gontši mo ba go dirago modirong wa Morena.’ (1 Bakor. 15:58) Dipego tše di latelago di bontšha kamoo Dihlatse tša Jehofa lefaseng ka bophara di katanelago go bontšha gore di ‘bota Jehofa, di dira tše dibotse le go dira tša potego.’—Ps. 37:3.

Go Hudušwa ga Ntlokgolo ya Lefase ka Bophara le Ofisi ya Lekala

Go katološwa ga meago ya Wallkill, New York, go fedile ka di-1 tša February 2016. Seo se ile sa nea Komiti ya Lekala la United States, Lefapha la Tirelo gotee le mafapha a mangwe a lekala la United States sebaka sa go hudugela moo. Ka ge modiro wa go aga o fela ntlongkgolo e mpsha ya lefase ka bophara yeo e lego Warwick, lapa la Bethele Brooklyn le thomile modiro o mogolo wa go tloga New York City le hudugela nagamagaeng.

 Go tloga ka Mošupologo wa di-3 tša April 2017, batho ba ka thoma go etela meago ya ntlokgolo ya lefase ka bophara kua Warwick. Ge ba le moo ba tla bona mafelo a mararo ao go sa hlokegego gore ba sepele le mohlahli mola mafelong a mangwe ba tla sepedišwa ke mohlahli.

  1. “Beibele le Leina la Modimo.” Karolo ye e bontšha Dibeibele tšeo di sa hwetšagalego gabonolo lefaseng le go gatelela ntlha ya gore leina la Modimo le swanetše go ngwalwa ka Beibeleng.

  2. “Batho Bao ba Bitšwago ka Leina la Jehofa.” Karolo ye e bontšha diswantšho tša histori ya bohwa bja moya ya Dihlatse tša Jehofa, gomme e bontšha le kamoo Jehofa a bego a dutše a hlahla, a ruta le go rulaganya batho ba gagwe go dira thato ya gagwe.

  3. “Ntlokgolo ya Lefase ka Bophara—Go Bontšha Tumelo ka Mediro.” Karolong ye go bogelwa dibidio tšeo di hlalosago seo se dirwago ke dikomiti tša Sehlopha se Bušago go thuša batho ba Jehofa go bokana gotee, go dira barutiwa, go hwetša dijo tša moya le go bontšhana lerato.

Batho ba ka kgona go sepela mafelong ao a mararo ao go sa hlokegego gore ba sepele le mohlahli go tloga ka Mošupologo go fihla ka Labohlano go thoma ka 8:00 mesong go fihla ka 4:00 thapama. Baeng ba tla thabela gape le go bona meago ba sepedišwa ke mohlahli ka metsotso e 20 moo ba tlago go bona Moago wa Diofisi gotee le mabala a Bethele. Ba ka thabela seo go tloga ka Mošupologo go fihla ka Labohlano go thoma ka 8:00 mesong go fihla ka 11:00 mesong le go thoma ka 1:00 thapama go fihla ka 4:00 thapama.

Pele o rulaganya go etela meago ye, hle eya Wepesaeteng ya jw.org gomme o lebelele ka tlase ga MABAPI LE RENA > GO BONA DIOFISI LE MEAGO > United States.