Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

Lengwalo le le Tšwago go Sehlopha se Bušago

Lengwalo le le Tšwago go Sehlopha se Bušago

Bana Babo Rena ba Rategago:

“Ka mehla re leboga Modimo ge re gopola ka lena bohle dithapelong tša rena, gobane re gopola modiro wa lena wa tumelo re sa kgaotše le boitapišo bja lena bjo lerato le kgotlelelo ya lena ka baka la kholofelo ya lena go Morena wa rena Jesu Kriste pele ga Modimo wa rena le Tatago rena.” (1 Bathes. 1:2, 3) A mantšu a mabotse gakaakaang ao a hlalosago kamoo re ikwago ka gona ka lena! Re leboga Jehofa ka lena le ka mošomo o mobotse woo le o dirago. Ka baka la’ng?

Ngwageng o fetilego, le be le swaregile ka ‘modiro wa tumelo’ e bile le ‘itapiša ka lerato’ medirong ya Mmušo. Ba bantši ba lena le nyakile ditsela tša go katološa bodiredi bja lena. Ba bangwe le hudugetše mafelong a itšego goba gaešita le dinageng tšeo go nyakegago bagoeledi ba oketšegilego ba Mmušo. Ba bangwe le katološitše bodiredi bja lena ka go tšea karolo go neeng bohlatse phatlalatša. Ba bantši ba lena le ile la tutueletšega go tšea bobulamadibogo bja go thuša sehleng sa Segopotšo, dikgweding tša ketelo ya molebeledi wa tikologo, goba nakong ya lesolo le le kgethegilego ka August 2014. Gaešita le ge maemo a lena a sa swane, re a bona gore le šomela Jehofa ka moya ka moka, gomme re a le reta ka seo. (Bakol. 3:23, 24) Ruri “modiro wa lena wa tumelo” o re nea lebaka la go leboga Jehofa!

Le gona re leboga kudu “boitapišo bja lena bjo lerato” medirong ya go aga meago e fapafapanego ya pušo ya  Modimo lefaseng ka moka. Re hloka meago yeo kapelapela ka ge palo ya batho ba Jehofa e tšwela pele e oketšega. (Jes. 60:22) Anke o nagane feela, tlhora ya rena ya bagoeledi ngwaga wa go feta e bile 8 201 545, gomme ka kakaretšo kgwedi le kgwedi gwa swarwa dithuto tša Beibele tše 9 499 933. Ka baka la koketšego ye, diofisi tše dingwe tša makala di swanetše go katološwa goba go mpshafatšwa. Go oketša moo, seo se bolela gore go nyakega le Diholo tša Mmušo tše di oketšegilego. Ka nako e swanago, dinageng tše dintši lefaseng ka moka go nyakega diofisi tša bofetoledi e le gore bafetoledi ba rena ba ka dula moo leleme la bona le bolelwago gona le go šomela moo.

Ka baka leo, re ka ipotšiša gore: ‘Nka dira’ng gore ke thekge go agwa ga meago ye?’ Ba bangwe ba rena re ka kgona go ithaopa medirong ye ya go aga. Le gona go sa šetšwe gore re kgona go aga goba aowa, ka moka ga rena re na le tokelo ya go neela ka dilo tša rena tše bohlokwa go thekga mediro ye e bohlokwa. (Die. 3:9, 10) Nakong ya ge go be go agwa taberenakele, Baisiraele ba ile ba neela kudu moo go ilego gwa dirwa tsebišo ya gore ba kgaotše go neela. (Ek. 36:5-7) Ga go pelaelo gore mehlala e bjalo ya Mangwalo e re kgoma dipelo le go re tutueletša go neela. Ruri “modiro wa lena wa tumelo” dibopegong tše tša tirelo e kgethwa ke lebaka le lengwe la gore re leboge Jehofa!

Re na le lebaka le le kgethegilego la go thaba ge re bona bana babo rena ba kgotlelela mathata. Ka mohlala, nagana ka bana babo rena ba rategago kua Korea Borwa. Go tloga ka 1950, bana babo rena ba bafsa nageng yeo ba ahloletšwe go dula kgolegong ka nywaga e sa lekanego  ka baka la go se tšee karolo dipolotiking. Go theoša le nywaga, bana babo rena ba moo ba kgotleletše go swarwa ka tsela ye gomme ba se šišinyege. Ruri mohlala wa bona wa kgotlelelo o matlafatša tumelo ya rena!

Kua Eritrea, bana babo rena ba bararo ba golegilwe ka nywaga ya ka godimo ga e 20. Ba bangwe, go akaretša le dikgaetšedi tša rena le bana ba bona, ba dutše dikgolegong ka nakwana. Go dirilwe maiteko a magolo gore ba lokollwe, eupša go fihla ga bjale ga se gwa hlwa go direga selo. Bana babo rena ba ga se ba hlanogela Jehofa. Ba kgomaretše potego ya bona ka tlase ga maemo ao a sehlogo. Ga re lebale bana babo rena ba bao ba botegago dithapelong tša rena.—Baroma 1:8, 9.

Ke therešo gore ba bantši ba lena ga le dikgolegong ka baka la tumelo ya lena. Eupša ba bantši ba lena le kgotleletše botšofadi, malwetši a šoro, go ganetšwa ke balekane ba lena bao e sego Dihlatse goba ba leloko gotee le mathata a mangwe ao a tsebjago ke lena feela. Lega go le bjalo, le tšwela pele le hlankela Jehofa ka potego! (Jak. 1:12) Re a le reta. Go kgotlelela ga lena ka potego ke lebaka le lengwe la gore re leboge Jehofa.

Ee, modiro wa lena wa tumelo, boitapišo bja lena bjo lerato le kgotlelelo ya lena di re nea mabaka a kwagalago a go ‘leboga Jehofa, gobane ke yo botho.’ (Ps. 106:1) Re le rata kudu ka moka ga lena, le gona re rapela Jehofa gore a le matlafatše, a le thekge e bile a le šegofatše e le gore le mo hlankele ka mo go sa felego.

Bana babo lena,

Sehlopha se Bušago sa Dihlatse tša Jehofa