Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Tokologo ya go Dira Boboledi

Tokologo ya go Dira Boboledi

 Go Bolawa ga Trujillo

Ka 1960, pušo ya Trujillo ya go gatelela batho e be e solwa lefaseng ka bophara e bile e ganetšwa le ke batho ba mokgatlong wa gagwe. Nakong ya moferefere wo wa dipolotiki, ka January 1961 Milton Henschel yo a tšwago ntlongkgolo o ile a etela naga ye gomme a ba gona kopanong ya matšatši a mararo. Kopanong yeo go bile le batho ba 957 gomme gwa kolobetšwa ba 27. Nakong ya ketelo ya gagwe, Ngwanabo rena Henschel o ile a thuša bana babo rena go rulaganya modiro lefsa le go thala mmapa wa tšhemo.

Balebeledi ba babedi ba tikologo e lego Enrique Glass le Julián López, ba ile ba abelwa go etela diphuthego. Julián o re: “Tikologo yeo ke bego ke abetšwe go yona e be e bopša ke diphuthego tše pedi tša ka bohlabela bja naga le diphuthego ka moka tša ka leboa. Tikologo ya Enrique e be e akaretša diphuthego tše dingwe ka moka tša ka bohlabela le tša ka borwa.” Diketelo tšeo di ile tša dira gore diphuthego di kgone go ikgokaganya le mokgatlo gotee le go thuša go aga bana babo rena moyeng.

Ka godimo: Salvino le Helen Ferrari ba le tseleng ya go ya Dominican Republic, ka 1961

Salvino le Helen Ferrari, e lego dialoga tša klase ya bobedi ya Gilead, ba ile ba fihla ka 1961. Phihlelo ye ba bilego le yona kua Cuba e le baromiwa e ile ya ba thuša kudu modirong o mogolo wa puno nageng ye ya Dominican Republic. Mafelelong Salvino o ile a hlankela e le setho sa Komiti ya Lekala go ba go fihla a ehwa ka 1997, gomme Helen o bile tirelong ya nako e tletšego ka nywaga e 79, yeo e mentši ya yona a e feditšego e le moromiwa.

Nakwana ka morago ga go fihla ga lapa la Ferrari, pušo ya Trujillo ya kgatelelo e ile ya fihla mafelelong ka tsela e sehlogo bošegong bja May 30, 1961, ge babolai ba gagwe ba hlahlamolla koloi ya gagwe ka dikolo. Lega go le bjalo, go  bolawa ga gagwe ga sa nka gwa fediša dikgaruru tša dipolotiki, ka gona naga ye e ile ya tšwela pele e na le dintwa tša selegae le tša dipolotiki ka nywaga e mmalwa.

Modiro wa Boboledi o Tšwela Pele

Ka yona nako yeo, baromiwa ba oketšegilego ba ile ba fihla nageng ye. William Dingman yo a alogilego klaseng ya mathomo ya Gilead le mosadi wa gagwe e lego Estelle, gotee le Thelma Critz le Flossie Coroneos, ba ile ba abelwa Dominican Republic ba etšwa lekaleng la Puerto Rico ka morago ga matšatši a mabedi feela Trujillo a bolailwe. William o re: “Go be go na le dikgaruru tša dipolotiki nageng ye ge re be re fihla e bile go tletše mašole. Go be go naganwa gore go na le batho bao ba nyakago go menola mmušo, gomme mašole a be a phuruphutša motho yo mongwe le yo mongwe ditseleng tše dikgolo. Re ile ra emišwa mafelong a mmalwa gomme merwalo ya rena ya phuruphutšwa. Mašole a be a ntšha selo se sengwe le se sengwe ka mekotleng, gaešita le dilo tše dinyenyane.” E be e tloga e le tlhohlo go dira boboledi nageng ye yeo e tletšego ka dikgaruru tša dipolotiki.

Ka tlase: Thelma Critz, Estelle le William Dingman ba sa hlankela nageng ye ka morago ga nywaga e 67 e le boromiwa ba mafolofolo

William o itše: “Nakong ya pušo ya kgatelelo ya Trujillo, setšhaba se be se boditšwe gore Dihlatse tša Jehofa di lwantšha mmušo le gore di kotsi kudu. . . . Lega go le bjalo, ganyenyane-ganyenyane re ile ra kgona go dira gore batho ba re kwešiše.” Ka ge re be re thomile modiro wa rena lefsa, batho ba bantši bao ba thabelago ba be ba arabela gabotse molaetšeng wa Mmušo. Ge ngwaga wa tirelo wa 1961 o fela, go be go na le babulamadibogo ba kgethegilego ba 33 nageng ye.