Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Go Hwetša Tokologo le go Thibelwa Gape

Go Hwetša Tokologo le go Thibelwa Gape

Tokologo Yeo e Bego e sa Letelwa

Manuel Hierrezuelo o ile a bolawa nakong ya ge a be a botšološišwa ke bahlankedi ba mmušo

Nywageng ka moka e thata ya thibelo, Lennart le Virginia Johnson gotee le Roy le Juanita Brandt ba ile ba dula kabelong ya bona ya boromiwa. Lennart o gopola ka gore: “Nna le Roy Brandt re ile ra biletšwa diofising tša mmušo go yo botšološišwa. Bahlankedi ba mmušo wa Trujillo ba be ba kile ba bitša Ngwanabo rena Manuel Hierrezuelo gore a tlo ba bona.” Ka manyami, Manuel o ile a bolawa nakong yona yeo ya ge a be a botšološišwa, a hwa a botegile go fihla mafelelong. Bjale go ile gwa direga’ng ka Lennart le Roy? Lennart o tšwetše pele ka gore: “Ge re fihla feela, yo mongwe le yo mongwe wa rena o ile a botšološišwa ka thoko, ba rekhota dikarabo tša rena. Ka nako yeo ga se gwa ka gwa direga selo, eupša ka morago ga dikgwedi tše pedi dikuranta di ile tša tsebiša gore mmušo wa Trujillo o nea Dihlatse tša Jehofa tokologo le gore re ka tšwela pele ka mediro ya rena.”

Pele ga ge go ka ba le thibelo ka 1950, go be go na le bagoeledi ba 261 bao ba bego ba dira modiro wa boboledi Dominican Republic. Ge thibelo e be e tlošwa ka August 1956, go be go na le bagoeledi ba 522. Bana babo rena ba ile ba thabela go kwa gore ba tlo dira modiro wa boboledi ka bolokologi le phatlalatša ka morago ga nywaga e tshelelago ya go golegwa, go thibelwa le go dula ba beilwe leihlo.

Batho ba Jehofa ba ile ba arabela bjang phetogong ye yeo ba bego ba sa e letela? Gateetee feela, ba ile ba thoma go rulaganya modiro wa boboledi lefsa! Ba ile ba tsoma mafelo ao ba ka swarelago diboka tša phuthego gomme ba thala mebapa e mefsa ya tšhemo le go dira difaele tše difsa tša phuthego. Bana babo rena ba ile ba thabela gore ba kgona go otara  le go hwetša dikgatišo. Ba ile ba diriša ka botlalo tokologo yeo ba bego ba sa tšwa go e hwetša go dira boboledi. Ka baka leo, ka dikgwedi tše tharo feela, ka November 1956, go be go na le bagoeledi ba 612 bao ba bego ba dira boboledi.

Lesolo la Baruti Bao ba Tletšego Lehloyo

Lengwalo la Toledano la go ipelaetša le ile la bolela ka maano a go thibela dikgatišo tša rena gore di se tsene nageng ye

Lega go le bjalo, gateetee baruti ba Katholika ba ile ba loga maano a go senya Dihlatse leina. Ba thekgwa ke kwano yeo Trujillo a bego a e dirile le Mopapa, baruti bao ba ile ba tiiša letsogo go hlohleletšeng mmušo gore o fediše Dihlatse. Moruti wa Katholika e lego Oscar Robles Toledano o ile a romela lengwalo la go ipelaetša go Mongwaledi wa Mmušo wa Lefapha la Ditirelo tša Setšhaba, e lego Virgilio Álvarez Pina, gomme a kgopela mmušo gore o mo thekge maitekong a gagwe a go “phafoša batho ba Dominican gore ba lemoge gore sehlotswana sa ‘Dihlatse tša Jehofa’ se kotsi kudu.”

Toledano o hlalositše gore morero wa gagwe o mogolo e be e le “go folodiša lesolo la Dihlatse tša Jehofa la go ruta batho ditumelo tša tšona.” Le gona lengwalo la Toledano le ile  la šišinya gore dikgatišo tša rena di se ke tša dumelelwa go tsena nageng yeo, “kudukudu puku ya ‘The Truth Shall Make You Free’ le makasine wa Morokami.”

Go Thibelwa Gape

Baetapele ba bodumedi ba ile ba thušana le bahlankedi ba mmušo wa Trujillo go hlasela Dihlatse. Ka June 1957, Francisco Prats-Ramírez, e lego mopresidente wa Mokgatlo wa Dominican, o ile a ngwalela Trujillo lengwalo la go ipelaetša, a hlalosa gore: “Ke rulaganya diboka tše mmalwa tšeo morero wa tšona e lego go lwantšha Dihlatse tša Jehofa tšeo di lego kotsi setšhabeng le tšeo di sa thekgego naga ye.”

Lesolo le la go bolela maaka ka Dihlatse le ile la atlega kapejana, go etša ge go hlaloswa ka pukung ya Trujillo—Little Caesar of the Caribbean gore: “Dikgweding tša selemo sa 1957 bagatiši ba dikuranta ba Dominican ba ile ba gatiša ditatofatšo tše dintši tša maaka tšeo di boletšwego ke bahlankedi ba phagamego ba Mmušo bao ba bego ba latofatša Dihlatse tša Jehofa ka ‘gore di lwantšha mmušo le gore di kotsi.’ Mathata a ile a thoma ge moruti wa Katholika yo a bitšwago Mariano Vásquez Sanz a be a hlasela Dihlatse seteišeneng sa radio sa Trujillo seo se bitšwago La Voz Dominicana [Lentšu la Dominican], ka go bolela gore di thekga pušo ya Bokomanisi e bile a di bitša ka gore ke ‘lenaba la lerabele, la mahlajana, la senokwane le la moeki.’ Ka baka la seo, lengwalo leo le tšwago go baruti leo le bego le saennwe ke Mopišopomogolo Pittini le Mopišopomogolo Octavio Antonio Beras le ile la laela baruti gore ba šireletše mehlape ya bona go ‘sehlotswana se se kotsi.’”

Leano leo la Kereke le Mmušo le ile la atlega. Ka July, Mokgatlo wa Dominican Republic o ile wa ntšha molao wa go thibela Dihlatse tša Jehofa. Go se go ye kae, maphodisa a ile a thoma go itia bana babo rena le go ba tlaiša. Go ile gwa golegwa bana babo rena ba e ka bago ba 150.