Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Tlhaselo e Šoro

Tlhaselo e Šoro

“Di tla ba di Fedišitšwe”

Borbonio Aybar o kolobeditšwe ka January 19, 1955, ge modiro o be o sa thibetšwe. Ka morago ga gore a kolobetšwe, o ile a swara dithuto tše dintši tša Beibele kua Monte Adentro le Santiago. Ge thibelo e be e tlošwa ka 1956, ba bangwe ba barutwana ba gagwe ba ile ba kolobetšwa, go akaretša le mosadi wa gagwe.

Magareng ga July 1957, bahlankedi ba mmušo ba ile ba bokana kua Salcedo go tlo logela Dihlatse maanomabe. Ngwanabo rena Aybar o hlalosa ka gore: “Francisco Prats-Ramírez e be e le yena seboledi se segolo. Prats-Ramírez o itše: ‘Ka morago ga matšatši a sego kae feela, di tla ba di fedišitšwe.’” Matšatšing a sego kae feela ka morago ga moo ka July 19, 1957, maphodisa a ile a swara Dihlatse tša Jehofa ka moka kua Blanco Arriba, El Jobo, Los Cacaos le Monte Adentro.

Ngwanabo rena Aybar o re: “Ke be ke le gare ga bao ba ilego ba swarwa. Re ile ra išwa ntlongkgolo ya mašole kua Salcedo. Gateetee ge re fihla moo, molaodi wa mašole yo a bitšwago Saladín o ile a mpetha. Sefahlego sa gagwe se be se tuka bogale ge a be a re tšhošetša. Ke moka re ile ra emišwa dilaene tše pedi, e nngwe e le ya banna gomme e nngwe e le ya basadi. Mašole a moo a ile a thoma go raga banna le go ba itia le go itia basadi ka dipatla gomme yo mongwe le yo mongwe wa ona a le gare a re: ‘Ke Mokatholika nna, e bile ke a bolaya.’”

Ngwanabo rena Aybar o ile a lefišwa tšhelete a ba a ahlolelwa go dula dikgwedi tše tharo kgolegong. O tšwetše pele ka gore: “Ge re be re golegilwe, re ile ra etelwa ke molaodi wa mašole e lego Santos Mélido Marte. O ile a re go rena: ‘Ke badile Beibele, e bile ke a tseba gore Jehofa ke Modimo. Ga le na molato, eupša nka se kgone go le thuša ka selo ka gobane batho bao ba dirilego gore le golegwe ke baruti ba  Katholika. Batho feela bao ba ka dirago gore le lokollwe ke bona baruti bao goba moetapele Trujillo.’”

“Ke Wena Moetapele wa Gona?”

Morwedi wa Fidelia Jiménez le barwedi ba ngwanabo ba be ba le gare ga batho bao ba ilego ba swarwa, gomme ka moka ga bona ba be ba ithutile Beibele le yena. Gaešita le ge Fidelia a ile a se golegwe di tloga fase, o ile a ikiša go bahlankedi ba mmušo gore a golegwe e le gore a tle a kgone go kgothatša bao ba bego ba šetše ba golegilwe. Ka nako yeo, molaodi yo a phagamego wa mašole yo a bego a tumile gampe e lego Ludovino Fernández, yo a bego a tsebja ka go ba le boikgantšho le bošoro, o ile a etela kgolegong yeo. O ile a laela gore Fidelia a bitšwe ke moka a mmotšiša gore: “Ke wena moetapele wa gona?”

Fidelia o ile a araba ka gore: “Aowa, baetapele ke lena ka moka.”

Fernández a re: “Gona go ra gore o moruti.”

Fidelia yena a re: “Aowa, moruti ke Jesu.”

Fernández o ile a mmotšiša gore: “Na ga se wena o dirilego gore batho ba ka moka ba golegwe? Na ga se wena o ba rutilego Beibele?”

Fidelia a re: “Aowa, Beibele ke yona e dirilego gore batho ba ba golegwe. Ba diriša seo ba ithutilego sona ka Beibeleng.”

Ka yona nako yeo, bana babo rena ba babedi bao le bona ba bego ba golegilwe e lego Pedro Germán le Negro Jiménez, yoo a bego a tswalana le Fidelia, ba ile ba feta moo phasetšing. Ba be ba tlošwa ka diseleng tšeo ba bego ba dula ba nnoši gomme ba išwa ka diseleng tša batho bohle. Hempe ya Negro e be e tletše madi a omeletšego, gomme leihlo la Pedro le rurugile wa go šiiša. Ge Fidelia a lemoga gore ba be ba iteilwe o šoro, o ile a botšiša molaodi yoo wa kgolego gore: “Na ye ke tsela yeo le swarago batho ba go loka, ba go botega le bao ba boifago Modimo?” Ge Fernández a lemoga  gore Fidelia ga a mo tšhabe, o ile a laela gore a bušetšwe ka seleng ya gagwe.

Ruri bahlanka ba botegago ba Jehofa ba ile ba swanelwa ke go bontšha sebete ge ba be ba lebeletšane le kganetšo e bjalo e šoro—gomme ba ile ba dira sona seo! Gaešita le bahlankedi ba mmušo ba ile ba kgona go bona seo. Ka mohlala, ka July 31, 1957, Luis Arzeno Colón, yo mošomo wa gagwe e bego e le go kgonthišetša gore melao ya mopresidente e a latelwa, o ile a ngwalela mongwaledi wa mmušo a lla ka gore: “Gaešita le ge molao wo o sa tšwago go bewa ke National Congress o tsebaditše gore mediro ya sehlotswana sa Dihlatse tša Jehofa ga e molaong, ba bantši sehlopheng se ga ba o latele.”

“Ke badile Beibele, e bile ke a tseba gore Jehofa ke Modimo”