Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Tšhišinyego ya Lefase Kua Haiti

Tšhišinyego ya Lefase Kua Haiti

Koketšego Tšhemong ya se-China

Ka 2005, ofisi ya lekala e ile ya kgetha Tin Wa Ng, e lego ngwanabo rena yo a bolelago se-China yo e bego e le setho sa lapa la Bethele gore a yo šoma e le mmulamadibogo yo a kgethegilego tšhemong ya batho ba bantši bao ba bolelago se-China nageng ye. O belegetšwe Dominican Republic a ba a golela gona moo. Batswadi ba gagwe ba be ba hudugetše Santo Domingo ba etšwa China.

Ka January 1, 2008, go ile gwa hlongwa phuthego ya se-China sa Mandarin kua Santo Domingo, gomme ka 2011 gwa thongwa sehlopha kua Santiago. Bagoeledi ba 70, go akaretša le babulamadibogo ba ka mehla ba 36 gotee le babulamadibogo ba go thuša ba mmalwa, kgwedi le kgwedi ba swara palomoka ya dithuto tša Beibele tše 76.

 Go Tsoma Barutiwa Bao ba Bolelago Seisemane

Ka 2007, go be go na le bagoeledi ba 27 466 diphuthegong tše 376, gomme ba swara dithuto tša Beibele tše 49 795. Lega go le bjalo, go be go se na phuthego ya Seisemane bakeng sa batho ba bantši bao ba bolelago leleme leo. Ka gona, ka April 2008, ofisi ya lekala e ile ya romela Donald le Jayne Elwell bao e bego e le baromiwa gore ba yo thoma sehlopha sa Seisemane kua Santo Domingo. Sehlopha seo se senyenyane seo se fišegago sa bagoeledi se ile sa thoma pele ka go nyaka moo batho bao ba bolelago Seisemane ba dulago gona. Ke moka sa rulaganya tšhemo gabotse e le gore se nee bohlatse bjo bo tletšego.

Ka baka la maiteko ao, sehlopha sa Seisemane kua Santo Domingo se ile sa tšwela pele go gola, gomme ka July 2009 gwa hlongwa phuthego ya bagoeledi ba 39. Go ile gwa dirwa se se swanago le ditikologong tše dingwe nageng ye. Ka November 2011, go be go na le diphuthego tše šupago tša Seisemane le sehlopha setee nageng ye.

Mosadi yo e Lego Sefoa e Bile e le Sefofu o Amogela Therešo

Mmulamadibogo yo a kgethegilego o boledišana le Lorys a diriša polelo ya diatla ya difofu

Lorys, yo a swerwego ke bolwetši bjo bo dirago gore motho a feleletše e le sefoa goba sefofu (Usher Syndrome), o godile e le tšhiwana. O belegwe e le sefoa gomme a thoma go se sa bona gabotse ge a be a na le nywaga e 16. O kgona go bona ganyenyane ge e le mosegare eupša bošego ga a bone selo. Tsela e nnoši yeo a kgonago go boledišana le batho ge letšatši le sobetše ke ka go diriša polelo ya diatla ya difofu.

Banyalani bao e lego babulamadibogo ba kgethegilego ba ile ba kopana le Lorys ge a be a na le nywaga e 23. Ka nako yeo, o be a dula le monna wa sefoa le morwedi wa bona wa ngwaga o tee yoo a bego a kgona go kwa. Lorys o ile a dumela ge a be a laletšwa dibokeng tša phuthego gomme a kgongwa kudu ke seo a ithutilego sona moo.

Lorys o ile a dira diphetogo kapejana bophelong bja gagwe. Ka mohlala, ge a be a ithuta gore go fošagetše go dula le  lesogana la gagwe ba sa nyalana, o ile a boledišana le lona mabapi le bohlokwa bja go ngwadiša lenyalo la bona semolao gomme a le hlalosetša gore a ka se robe ditekanyetšo tša Beibele tša mabapi le boitshwaro. Le makaditšwe ke tsela yeo Lorys a bego a bolela ka kgodišego ka yona, lesogana leo le ile la dumela go mo nyala.

Ka morago ga gore ba nyalane, Lorys o ile a ba mogoeledi gomme go se go ye kae a kolobetšwa. Ka yona nako yeo, ka baka la go ithuta Beibele le Dihlatse, o ile a ithuta Polelo ya  Diatla ya Amerika. Ga e sa le go tloga ka nako yeo, o be a dutše a thuša morwedi wa gagwe go ithuta Polelo ya Diatla e bile o mo ruta therešo.

Tšhišinyego ya Lefase e Šoro e Hlasela Haiti

Batho ba Dominican le ba Haiti ba ka se tsoge ba lebetše Labobedi la January 12, 2010. Le ke letšatši leo tšhišinyego ya lefase e šoro e ilego ya hlasela Haiti. Gateetee Sehlopha se Bušago sa Dihlatse tša Jehofa se ile sa dumelela lekala la Dominican Republic gore le romele lekala la Haiti tšhelete ya go thuša ka tlhakodišo. Ka ge tšhelete yeo e bego e swanetše go romelwa lekaleng leo e be e le e ntši kudu, ngaka ya Bethele ya botelele bja dimithara tše 1,90 le boima bja dikhilograma tše 127, e lego Evan Batista, e ile ya newa mošomo wa go iša tšhelete yeo.

Phetho ya go nea Ngwanabo rena Batista mošomo woo e bile ya maleba ka gobane ge a fihla mollwaneng, o ile a botšwa  gore go nyakega thušo ya kapejana ya dingaka. Batho ba bantši bao ba gobetšego o šoro tšhišinyegong ya lefase ba be ba tlišwa Holong ya Kopano yeo e bego e le kgauswi le lekala la Haiti gore ba tlo alafiwa. Ge bana babo rena ba Haiti ba be ba lemoga gore motho yo a rometšwego go tliša tšhelete e be e le ngaka yeo e tšwago lekaleng, ba ile ba founela lekala la Dominican Republic gomme ba kgopela gore Ngwanabo rena Batista a dulenyana moo Haiti. Lekala le ile la dumela ke moka gwa thoma modiro o mogolo wa tlhakodišo gore ba thuše bana babo rena le dikgaetšedi ba moya kua Haiti—diiri tše sego kae feela ka morago ga tšhišinyego ya lefase.

Bana babo rena ba ile ba tla go tlo thuša ka morago ga tšhišinyego ya lefase ka 2010 kua Haiti

Gateetee Lefapha la go Reka Dilo lekaleng la Dominican Republic le ile la ikgokaganya le dikhamphani tšeo le tlwaetšego go reka dijo go tšona. Ka baka leo, go ile gwa rekwa reise, dinawa le dijo tše dingwe tša dikhilograma tša ka godimo ga tše 6 800 gomme tša romelwa Haiti ka 2:30 ya masa ka Labone, January 14. E bile go bonagala yeo e be e le thoto ya mathomo ya tlhakodišo go tšwa nageng e šele go fihla mollwaneng woo. Ka morago lona letšatšing leo, dingaka tše dingwe tše tharo tša go tšwa Dominican Republic di ile tša tšea leeto la diiri tše šupago la go ya lekaleng la Haiti. Di ile tša fihla bošego, eupša go e na le gore di ye go robala, di ile tša leba go batho bao ba gobetšego gomme tša šoma go fihlela bošegogare. Letšatšing le le latelago, dingaka tše dingwe tše nne le baoki ba bane ba be ba gorogile Dominican Republic. Go ile gwa dirwa diophareišene ka tlase ga maemo a thata kudu, go dirišwa diphapoši tša motšwa-o-swere tšeo di bego di hlomilwe Holong ya Kopano. Bekeng e latetšego, sehlopha se sa batho ba 12 se ile sa alafa batho ba ka godimo ga 300 bao ba gobetšego.

Letšatši le letšatši, batho bao ba gobetšego kudu ba be ba romelwa Dominican Republic gore ba yo alafiwa gona. Ka dinako tše dingwe, tšona dikoloi tše di bego di tliša dilo tša tlhakodišo Haiti di be di kitimišetša batho bao  ba gobetšego mafelong a fapafapanego a kalafo nageng ka moka ya Dominican Republic. Lekala le ile la rulaganya Dihlopha tša go Etela Balwetši gore di yo kgothatša batho bao ba gobetšego le go kgonthišetša gore ba hwetša kalafo yeo ba e hlokago le dinyakwa tše dingwe. Diphuthego tša mafelong ao di ile tša nea batho bao ba bego ba felegeditše ba malapa a gabo bona bao ba gobetšego dijo le marobalo.

Dihlatse tša Jehofa di ile tša aba dikhilograma tša ka godimo ga tše 450 000 tša dilo tše di neetšwego, go akaretša le go fepa batho ka dijo ka makga a 400 000

Go šoma ka thata le ka go hloka boithati ga batho ba Jehofa ka morago ga tšhišinyego yeo go tloga go bontšha go rereša ga mantšu ao a hwetšwago go Diema 17:17, yeo e rego: “Mogwera wa kgonthe o dula a na le lerato ka dinako tšohle, e bile ke ngwanabo motho yo o ka ithekgago ka yena mohlang wa tlalelo.” Diphihlelo tše dintši di bontšha kamoo Jehofa a dirišago moya wa gagwe le borwarre bja Bokriste go thekga bao ba mmotegelago gaešita le ge ba lebeletšane le lehu. Modiro o mogolo wa tlhakodišo o ile wa tšwela pele ka dikgwedi tše dintši. Dihlatse tša Jehofa di ile tša aba dikhilograma tša ka godimo ga tše 450 000 tša dilo tše di neetšwego, go akaretša le go fepa batho ka dijo ka makga a 400 000. Bana babo rena le dikgaetšedi ba e ka bago ba 78 bao ba šomago ka tša kalafo go tšwa dikarolong tše di fapafapanego tša lefase ba ile ba tla gomme ba neela ka nako ya bona le bokgoni mahala, ba šoma gotee le baithaopi ba bangwe ba bantši. *

^ ser. 19 Ge o nyaka go tseba ditaba ka botlalo mabapi le pego ye, bala Phafoga! ya Seisemane ya December 2010 matlakala 14-19.