Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Go Swaragana le Koketšego

Go Swaragana le Koketšego

‘Mehuta Yohle ya Batho e Swanetše go Phološwa’

Thato ya Jehofa ke gore “mehuta yohle ya batho e phološwe gomme e fihle tsebong e nepagetšego ya therešo.” (1 Tim. 2:4) Ka go dumelelana le pono ye ya Modimo, Dihlatse tša Jehofa kua Dominican Republic di ile tša dira maiteko a magolo a go fihlelela batho kae le kae tšhemong yeo, go akaretša le bao ba lego dikgolegong.

Ka 1997, babulamadibogo ba babedi ba kgethegilego ba ile ba kopana le Gloria wa nywaga e 23 wa go tšwa Colombia ge ba be ba dira leeto la bona la beke le beke Kgolegong ya Najayo motseng wa San Cristóbal, yoo a bego a golegetšwe go šwahliša dihlaretagi. O be a fela a boledišana ka Beibele le kgaetšedi yo a bego a golegilwe ka phošo. E le gore ba arabe dipotšišo tša Gloria tša mabapi le Beibele, bana babo rena bao ba ile ba mo tlela le puku ya Go Boledišana ka Mangwalo le dikgatišo tše dingwe. Mafolofolo a gagwe a go nyaka go ithuta therešo a ile a fetela le bagolegwa ba bangwe, ka gona sehlopha seo bana babo rena ba bego ba se etela beke le beke sa tšwela pele se oketšega.

Therešo e ile ya thuša Gloria go dira diphetogo tše dikgolo, gomme ka 1999 a swanelegela go ba mogoeledi yo a sa kolobetšwago. Kgwedi e nngwe le e nngwe o be a fetša diiri  tša ka godimo ga tše 70 a dira boboledi gona moo kgolegong, e bile a na le dithuto tša Beibele tše tshelelago tšeo di gatelago pele. Ke moka ka 2000, o ile a dira kgopelo ya gore a lokollwe kgolegong go mopresidente gomme a dumelelwa ka baka la boitshwaro bja gagwe bjo bobotse. O ile a lokollwa gomme a bušetšwa Colombia. Ka 2001, ka moragonyana ga gore a fihle nageng ya gabo, o ile a kolobetšwa, gaešita le ge ba gabo ba be ba mo ganetša o šoro.

Gloria Cardona o ithutile therešo kgolegong. Gona bjale yena le monna wa gagwe ke babulamadibogo

Ka morago ga gore Gloria a kolobetšwe, o ile a tšea bobulamadibogo. O ile a nyalana le ngwanabo rena yo e lego mogolo, gomme bobedi bja bona ke babulamadibogo ba ka mehla. Ga bjale ba hlankela kua Colombia tikologong yeo go nyakegago bagoeledi ba oketšegilego ba Mmušo. Gloria o badišitše batho ba mmalwa go fihlela ba ineela le go kolobetšwa. O re o ikwa a kolota Jehofa, le gore tsela e kaonekaone ya go mo lefa ke gore a direle ba bangwe seo le yena ba bangwe ba mo diretšego sona, e lego go ba thuša go tseba therešo.

Go etša ge phihlelo ya Gloria e bontšha, kgolego ga e kgone go thibela bagolegwa go ithuta therešo yeo e phološago maphelo. Baemedi bao ba tšwago ofising ya lekala nageng yeo ba ile ba ya go balaodi ba Lefapha la Dikgolego gomme ba kgopela gore bana babo rena ba dumelelwe go bolela ka molaetša wa Beibele dikgolegong tše di oketšegilego le go swarela bagolegwa dithuto tša Beibele. Ka baka leo, bana babo rena ba 43 le dikgaetšedi tše 6 ba dumeletšwe go tsena dikgolegong tše 13 gore ba rute bagolegwa ka Beibele.

“Katološa Tente ya Gago”

Mafelelong a 1999, kua Dominican Republic go be go na le bagoeledi ba 21 684 diphuthegong tše 342 gomme ba swara dithuto tša Beibele tše 34 380. Bao ba bilego gona Segopotšong e bile ba 72 679. Ka baka la kgolo ye, batho ba Jehofa ba arabetše ka go akgofa mantšung a Jesaya ao a rego: “Katološa tente ya gago. Anke o ahlamiše diseila tša tente tša taberenakele ya gago e kgolo. O se ke wa tšhaba. Dira  dithapo tša ditente tša gago e be tše ditelele gomme o tseme dimapolo tšeo tša tente ya gago ka go tia.”—Jes. 54:2.

Bothata bjo bongwe e be e le go hwetša Holo ya Kopano yeo e ka lekanago bagoeledi ba bao ba dulago ba oketšega. Ka 1996, Holo ya Kopano yeo e bego e agwa kgauswi le lekala la Santo Domingo e ile ya fetšwa, gomme bagoeledi ba motsengmošate wo le metseng ya kgauswi ba swarela dikopano go yona. Lega go le bjalo, Holo ya Kopano ya kua Villa González, yeo e bego e dirišwa ke Dihlatse ka moka tša nageng yeo, e be e tloga e nyaka go lokišwa goba go agwa lefsa.

Ka 2001, Sehlopha se Bušago se ile sa dumelela bana babo rena gore ba age Holo ya Kopano yeo e lekanago batho ba 2 500 lefelong le lengwe kua Villa González. Le gona bana babo rena ba ile ba thaba kudu ge ba be ba ekwa gore go tlo agwa le moago o mongwe woo o tlago go dirišetšwa go swarela Sekolo sa Tlwaetšo ya Bodiredi (seo ga bjale se tšeetšwego legato ke Sekolo sa Baebangedi ba Mmušo). Moago woo o be o tlo agwa kgauswi le Holo ya Kopano gomme wa ba le  diphapoši tša bodulo, klase, bokgobapuku, khitšhi le lefelo la go jela. Ka 2004, Theodore Jaracz wa Sehlopha se Bušago o ile a nea polelo ya go neela meago yeo e mefsa. Ga e sa le go tloga ka nako yeo, go alogile diklase tše 15 sekolong seo.