Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

“Re tlo ba Hwetša”

“Re tlo ba Hwetša”

“Ka Letšatši le Lengwe re tlo ba Hwetša”

Mo e ka bago ka 1935, tikologong yeo e bitšwago Cibao Valley yona nageng ye, Pablo González o ile a thoma go bala Beibele. O ile a kopanela ka nakwana le sehlopha sa Maprotestanta, eupša a tloga ge a be a bona gore boitshwaro bja ona ga bo dumelelane le seo a se balago ka Mangwalong. Eupša o ile a tšwela pele a ithuta Lentšu la Modimo ka boyena gomme a thoma go botša ba bangwe seo a bego a ithuta sona—a thoma ka lapa la gabo le baagišani ke moka a fetela bathong ba metseng e mengwe. O ile a rekiša polase ya gagwe le dikgomo gomme a diriša tšhelete yeo go lefelela maeto a gagwe a go tšama a ruta batho Beibele.

Ka 1942, Pablo o be a šetše a etetše bonyenyane malapa a 200 metseng ya kgauswi gomme a swara diboka ka mehla, gaešita le ge a be a se a ka a kopana le Dihlatse tša Jehofa bophelong bja gagwe. O ile a kgothaletša batho go ithuta Beibele le go phela ka go dumelelana le yona. Ba bantši ba ile ba mo theetša gomme ba tlogela go kgoga, e bile banna ba tlogela go nyala basadi ba bantši.

Yo mongwe wa batho bao ba ilego ba theetša molaetša wa Pablo wa mabapi le Beibele ke Celeste Rosario. O gopola ka  gore: “Ge ke be ke na le nywaga e 17, motswala wa ka e lego Negro Jiménez, o be a kopanela le sehlopha seo se bego se hlokometšwe ke Pablo González. O ile a etela lapa la gešo ke moka a re balela mangwalo a itšego go tšwa Beibeleng, gomme mangwalo ao a nkgodiša gore ke swanetše go tlogela Kereke ya Katholika. Re be re balelwa Beibele ka Selatine kerekeng, gomme re sa kwe selo. Go se go ye kae, Pablo González o ile a re etela gomme a re kgothatša. O ile a re: ‘Ga re karolo ya dikereke tše dintši tšeo re di tsebago, eupša re na le bana babo rena lefaseng ka moka. Gona bjale ga re ba tsebe e bile ga re tsebe gore ba bitšwa ka leina lefe, eupša ka letšatši le lengwe re tlo ba hwetša.’”

Pablo o ile a thoma dihlopha tša barutwana ba Beibele kua Los Cacaos Salcedo, Monte Adentro, Salcedo le Villa Tenares. Ka 1948, ge a be a fihla Santiago gore a namele pese e nngwe, o ile a bona Dihlatse tše dingwe di nea bohlatse seterateng, gomme tša mo nea Morokami. Ge Pablo a be a le leetong le lengwe, kgaetšedi yo mongwe o ile a mo sepedišetša dipuku tše pedi gomme a mo laletša Segopotšong sa lehu la Kriste kua Santiago. Gona moo Segopotšong, o ile a kgahlwa kudu ke seo a se kwelego gomme a fetša le pelo gore  mafelelong o hweditše therešo le gore bao ba bego ba le gona sebokeng seo e be e le batho bao a bego a ipoditše gore ka letšatši le lengwe o tla ba hwetša.

Baromiwa ba ile ba etela batho bao Pablo a bego a ithuta le bona Beibele. Lefelong le lengwe leo Pablo a bego a swara diboka, ba ile ba hwetša batho ba bagolo ba 27 ba ba emetše ka lethabo. Ba bangwe ba batho bao ba be ba sepetše dikhilomithara tše 25 ka maoto; ba bangwe ba sepetše dikhilomithara tše 50 ka dipere! Lefelong le lengwe la seboka, go be go na le batho ba 78, gomme go le lengwe gape go na le ba 69.

Pablo o ile a nea baromiwa maina a batho ba e ka bago ba 150 bao ba bego ba thabela. Batho ba bao ba ikokobeditšego le ba go rata dilo tša moya ba be ba šetše ba ithuta Beibele le go phela ka go dumelelana le seo e se rutago. Seo ba bego ba se hloka e be e le go rulaganywa gabotse le tlhahlo. Celeste o gopola ka gore: “Baromiwa bao ba ile ba re etela gomme ra ba le seboka. Go ile gwa dirwa dithulaganyo tša gore re kolobetšwe. Ke bile wa mathomo lapeng lešo wa go kolobetšwa. Ka morago gwa kolobetšwa mma e lego Fidelia Jiménez le kgaetšedi ya ka Carmen.”

Kopano ya mathomo ya tikologo kua Dominican Republic, yeo e bego e swaretšwe Santiago ka September 23-25, 1949, e ile ya thuša bana babo rena go ba mafolofolo modirong wa boboledi. Go ile gwa tla le batho ba bantši bao ba bego ba nyaka go bona seo se diregago, gomme palo ya bao ba bilego gona polelong ya phatlalatša ka Sontaga ya oketšega go fihla go 260. Go ile gwa kolobetšwa batho ba 28. Kopano ye ya matšatši a mararo e ile ya kgodiša batho ba bantši bao ba bego ba sa tšwa go thoma go kopanela gore wo ke mokgatlo woo Modimo a o dirišago go phetha thato ya gagwe.