Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Di Rata Bana Babo Tšona

Di Rata Bana Babo Tšona

Sekolo se Sefsa se tla ka Tharollo

Jehofa o ile a šegofatša maiteko a magolo a bahlanka ba gagwe kua Dominican Republic. Ka 1994 go be go na le palomoka ya bagoeledi ba Mmušo ba 16 354 diphuthegong tše 259. Ka baka la koketšego yeo e kgahlišago, go be go na le  tlhokagalo e kgolo ya bagolo le bahlanka ba bodiredi. Wona ngwageng woo, Sehlopha se Bušago se ile sa dumela gore kua Dominican Republic go swarwe Sekolo sa Tlwaetšo ya Bodiredi, seo ga bjale se tšeetšwego legato ke Sekolo sa Baebangedi ba Mmušo.

Ka October 2011, go be go šetše go alogile barutwana ba e ka bago ba 600 diklaseng tše 25 tšeo di bego di swaretšwe nageng yeo. Ka se sebaka, dialoga tša ka godimo ga seripagare di hlankela dikabelong tše di fapafapanego tša tirelo ya nako e tletšego, tše 71 di hlankela e le babulamadibogo ba kgethegilego, gomme tše 5 ke balebeledi ba tikologo. Diklase tša mathomo tše lesome tša sekolo se di ile tša swarelwa ofising ya lekala, eupša go thoma ka klase ya lesometee, sa swarelwa lefelong la sona kua Villa González.

“Dihlatse tša Jehofa di a Hlokomelana”

Ka September 22, 1998, Ledimo le Matla leo le bitšwago Georges le ile la hlasela Dominican Republic ka diphefo tše  matla tšeo di bego di kitima dikhilomithara tše 190 ka iri, la senya o šoro. Batho ba dikete ba ile ba šala ba se na magae, gomme ba ka godimo ga ba 300 ba hwa. Komiti ya Tlhakodišo e ile ya hloma lefelo la tlhakodišo Holong ya Mmušo kua La Romana e thušana le Komiti ya tša Meago ya Tikologo. Mo e ka bago baithaopi ba 300 ba ile ba thuša modirong wo wa tlhakodišo, go akaretša le Dihlatse tšeo di tšwago dinageng tše 16.

Ka kakaretšo, Diholo tša Mmušo tše 23 le dintlo tša ka godimo ga tše 800 tša bana babo rena le dikgaetšedi di ile tša swanelwa ke go lokišwa goba go agwa lefsa. Ka mohlala, Carmen, e lego mmulamadibogo wa motšofadi, o ile a šala a hlakahlakane ka morago ga gore ledimo le fete ka ntlo ya gagwe yeo a dutšego go yona nywaga e 38. Lega go le bjalo, o ile a thaba kudu ge bana babo rena ba 15 ba fihla gomme ba mo agela ntlo e mpsha. Carmen o re: “Jehofa a ka se tsoge a re lebetše, e bile o a re hlokomela. Anke o fo bona ntlo e botse yeo bana bešo ba nkagelago yona. Baagišani ba ka ba ile ba re: ‘Dihlatse tša Jehofa di a hlokomelana; ruri di a ratana.’” Mantšu a swanago a ile a kwewa nageng ka moka ge bašomi ba tlhakodišo ba dutše ba thuša bana babo rena le dikgaetšedi bao ba lego tlalelong.

Gaešita le ge Ledimo la Georges le ile la baka tshenyo e kgolo, thušo e lerato yeo batho ba Jehofa ba ilego ba e nea bana babo rena bao ba bego ba le tlalelong e ile ya ba homotša maikwelong le moyeng. Sa bohlokwa le go feta, maiteko a go hloka boithati a baithaopi bao a ile a tliša theto go Jehofa, yena mothopo wa khomotšo.

Diholo tša Mmušo di Agwa ka Lebelo

Ka ge batho ba be ba etla ka bontši ka phuthegong, go be go nyakega Diholo tša Mmušo tše di oketšegilego. Ka baka leo, ka November 2000, bana babo rena ba kua Dominican Republic ba ile ba thoma go aga Diholo tša Mmušo ba thušwa ke lenaneo la go aga Diholo dinageng tše di diilago. Ka  baka la lenaneo leo, phuthego e kgona go aga Holo ya Mmušo e botse ka dibeke tše e ka bago tše seswai. Ka September 2011 ke ge dihlopha tše pedi tša go aga di šetše di agile goba go mpshafatša Diholo tša Mmušo tše e ka bago tše 145.

Diholo tšeo le bao ba bego ba thuša ka go aga ba neile bohlatse bjo bobotse kudu. Ka mohlala, torotswaneng e nngwe ka leboabodikela bja naga ye, bana babo rena ba ile ba hwetša lefelo leo ba ka agago Holo e mpsha ya Mmušo. Mmulamadibogo yo a kgethegilego o ile a botšiša mong wa lefelo leo ge e ba a ka rata go ba rekišetša lona. Monna yoo o ile a re: “O se ke wa itshenyetša nako, nka se ke ka le rekišetša lefelo le, kudukudu ge e ba le nyaka go aga kereke go lona.”

Ka moragonyana ga poledišano yeo, mong wa lefelo leo o ile a etela ngwanabo kua Puerto Plata yo e lego yo mongwe wa Dihlatse tša Jehofa. Ge a fihla moo, o ile a hwetša lapa le lengwe la Dihlatse le tšere ngwanabo yo a bego a babja gomme le dula le yena gore le mo hlokomele. Lapa leo le be le mo iša ngakeng, le eya le yena dibokeng gotee le tšhemong. Monna yoo o ile a botšiša ngwanabo gore o lefa lapa leo bokae bakeng sa tlhokomelo yeo le mo neago yona. O ile a re: “Ga ke ntšhe le sente. Batho ba ke bana bešo.”

“Ga sa nka ka bona batho ba go swana le ba bao ba šomago ka botee le ka botho”

Monna yoo o ile a kgongwa kudu ke botho bja Dihlatse moo a ilego a founela mmulamadibogo yo a kgethegilego yo a boledišanego le yena pejana ke moka a mmotša gore o fetošitše monagano gomme o tla ba rekišetša lefelo lela. Bana babo rena ba ile ba reka lefelo leo gomme ba thoma go aga holo. Pejana ga moo, mosadi wa mong wa lefelo leo o be a sa kwane le Dihlatse tša Jehofa. Eupša ge a be a bona bana babo rena ba šoma ka botee nakong ya go aga, o ile a re: “Ga sa nka ka bona batho ba go swana le ba bao ba šomago ka botee le ka botho.”