Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Motho wa Pele wa Sefoa wa go Amogela Therešo

José Pérez

Motho wa Pele wa Sefoa wa go Amogela Therešo
  • O BELEGWE KA 1960

  • O KOLOBEDITŠWE KA 1982

  • PEGO YA BOPHELO BJA GAGWE Ge José e sa le mošemanyana, o ile a gogelwa therešong ke lerato la bana babo rena gaešita le ge phuthego ka moka e be e sa tsebe polelo ya diatla.

KE BILE sefoa ge ke sa le ngwana, gomme ka ithuta polelo ya diatla sekolong sa difoa. Ke thomile go tseba therešo ge ke na le nywaga e 11, ge lapa la Dihlatse tikologong ya gešo le be le ntaletša go ya dibokeng tša phuthego. Le ge ke be ke sa kwe dipolelo, ke ile ka amogelwa ka borutho gomme ka phetha ka gore ke tšwele pele ke eya. Ba bantši ka phuthegong ba be ba ntaletša dijong le medirong e mengwe.

Ke bile mogoeledi ka 1982, gomme ka morago ngwageng woo ka kolobetšwa. Ka 1984, ke ile ka nyalana le Eva, yoo le yena e lego sefoa. Le ge re be re sa kwešiše ditherešo tše dingwe tša Beibele ka botlalo, re ile ra tseba mokgatlo wa Jehofa ka leswao la wona la lerato gomme re be re thabela go ba ka phuthegong.—Joh. 13:35.

Ka 1992 go ile gwa dirwa dithulaganyo tša gore bana babo rena ba bangwe le dikgaetšedi ba ithute Polelo ya Diatla ya  Amerika. Go se go ye kae bagoeledi ba ba ile ba thoma go nyaka difoa gomme ba di nea bohlatse. Ke moka ka 1994, mošomo tšhemong ya polelo ya diatla o ile wa oketšega ka lebelo ge banyalani ba tšwago Puerto Rico ba be ba laletšwa lekaleng gore ba rute bana babo rena le dikgaetšedi ba 25 polelo ya diatla.

Ka moragonyana ngwageng woo, nna le Eva re ile ra thoma go ya dibokeng tša sehlopha se sefsa sa polelo ya diatla. E bile ka morago ga gore re thome go ya dibokeng tša polelo ya diatla moo re ilego ra thoma go kwešiša ka mo go tseneletšego dithuto tša Beibele tše bjalo ka go hlohlwa ga bogoši bja Jehofa bja legohle ke Sathane le karolo yeo e kgathwago ke Mmušo wa Mesia morerong wa Modimo.

Ka December 1, 1995, go ile gwa hlongwa diphuthego tša Polelo ya Diatla ya Amerika kua Santo Domingo le Santiago. Ka August 2014, go be go na le diphuthego tše 26 tša polelo ya diatla le dihlopha tše 18.

Nna le Eva re ile ra ruta bana ba rena ba bararo polelo ya diatla gore e be leleme leo ba le dirišago kudu. Morwa wa rena yo mogolo e lego Éber, o thuša go fetolela polelo ya diatla kua lekaleng la United States. Ke hlankela bjalo ka mohlanka wa bodiredi ka phuthegong, gomme Eva ke mmulamadibogo wa ka mehla.