Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

“Nka se Tlogele go ba yo Mongwe wa Dihlatse tša Jehofa”

Ana María (Mary) Glass

“Nka se Tlogele go ba yo Mongwe wa Dihlatse tša Jehofa”
  • O BELEGWE KA 1935

  • O KOLOBEDITŠWE KA 1956

  • PEGO YA BOPHELO BJA GAGWE E be e le mofsa yo a bego a fišega kudu kerekeng ya Katholika yoo ka morago a ilego a ithuta therešo ya Beibele gomme ka sebete a kgotlelela go ganetšwa ke ba lapa, Kereke le Mmušo.

KE BE ke rata kereke kudu e bile ke tšea karolo ka mafolofolo ditirelong tša Kereke ya Katholika. Ke be ke le setho sa khwaere ya kereke gomme ke eya le baruti mafelong a dithapelo, moo ba bego ba keteka selalelo. Ke moka ka 1955, ngwanešo o ile a mpotša gore lefase e tlo ba Paradeise. O ile a mpha Beibele, pukwana ya “This Good News of the Kingdom,” le puku ya “Let God Be True.” Di ile tša nkgahla kudu, gomme ka botšiša moruti wa ka ge e ba nka bala Beibele. O ile a mpotša gore e tlo nkgafiša, eupša ka dira phetho ya go no e bala.

Ka morago ga gore ke hudugele go rakgolo le makgolo kua Boca Chica, moruti o ile a mpotšiša gore ke ka baka la eng ke se sa tla kerekeng. Ke ile ka mo hlalosetša gore ke hweditše gore dilo tše dintši tšeo di rutwago kerekeng ga di gona ka Beibeleng. Moruti yoo o ile a nkgalefela gomme a nkomanya ka gore: “Ngwanenyana towe, theetša mo, o nku yeo e arogilego mohlapeng wa ka.”

 Ke ile ka mo araba ka gore: “Aowa, ke wena o arogilego mohlapeng wa Jehofa, ka gobane dinku tše o bolelago ka tšona ke tša Jehofa, ga se tša motho le ge e le ofe.”

Ga sa nka ka hlwa ke eya kerekeng. Ke ile ka thoma go dula le ngwanešo, gomme ka morago ga dikgwedi tše tshela feela ke hweditše therešo, ka kolobetšwa. Ke ile ka tšea bobulamadibogo bja ka mehla di tloga fase. Ka morago ga ngwaga, ka nyalana le Enrique Glass, yo a bego a hlankela e le molebeledi wa tikologo. Nakong e nngwe ge re be re dira boboledi phakeng motseng wa La Romana, maphodisa a ile a swara Enrique. Ge a sepela le yena, ke ile ka a šala morago gomme ka re: “Le nna ke yo mongwe wa Dihlatse tša Jehofa, le nna ke be ke dira boboledi. Go re’ng nna le ntlogela?” Eupša a ile a gana go ntshwara.

Enrique o be a šetše a kile a dula kgolegong ka makga a mmalwa ao a ka dirago nywaga e šupago le seripa. Mo lekgeng le o ile a ahlolelwa ngwaga le dikgwedi tše seswai. Ke be ke mo etela Sontaga se sengwe le se sengwe. Lebakeng le lengwe ge ke be ke mo etetše, molaodi wa kgolego o ile a mpotšiša gore: “O nyaka’ng mo?”

Ke ile ka hlalosa ka gore: “Monna wa ka o golegetšwe gore ke yo mongwe wa Dihlatse tša Jehofa.”

O ile a araba ka gore: “O sa le yo mofsa, e bile o na le bokamoso bjo bo phadimago. Ke ka baka la’ng o senya nako ya gago le Dihlatse tša Jehofa?”

Ke ile ka araba ka gore: “Le nna ke yo mongwe wa Dihlatse tša Jehofa. Le ge o ka mpolaya ka makga a šupago le go ntsoša bahung ka makga a šupago, nka se tlogele go ba yo mongwe wa Dihlatse tša Jehofa.” Ke ile ka mo tena gomme a re ke sepele.

Ka morago ga gore thibelo e tlošwe nageng ye, Enrique o ile a hlankela le nna ka nywaga e mentši e le molebeledi wa tikologo le wa selete. Enrique o hwile ka March 8, 2008. Nna ke tšwela pele ke hlankela ke le mmulamadibogo wa ka mehla.