Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Kereke ya Katholika le Trujillo

Kereke ya Katholika le Trujillo

TRUJILLO o be a na le segwera sa mohuta mang le Kereke ya Katholika? Setsebi se sengwe sa dipolotiki se itše: “Nakong ya pušo yeo e tšerego nako e telele ya Trujillo, go tloga ka 1930 go ya go 1961, Kereke ya Katholika le mmušo wa Dominican Republic di be di thekgana; Trujillo o be a ema le Kereke, gomme kereke e thekga mmušo wa gagwe.”

Ka 1954, Trujillo o ile a ya Roma gomme a fihla a dira kwano le Mopapa. Germán Ornes, yo e kilego ya ba mogwera yo mogolo wa Trujillo, o ngwadile gore: “Ka ge Kereke ya Dominican e be e tloga e thekga Trujillo, [e] ile ya tiiša pušo ya ‘Moetapele yo o Mogolo’ [Trujillo]. Baruti, bao ba bego ba eteletšwe pele ke Mopišopomogolo Ricardo Pittini le Mopišopomogolo Octavio Beras, ba gare ga bao ba bego ba eteletše pele maaka ao a bego a botšwa mmušo mabapi le Dihlatse.”

Ornes o tšwetše pele go hlalosa gore: “Mopapa o be a diriša sebaka se sengwe le se sengwe go iša ditumedišo tše borutho  go Trujillo. . . . Sebokeng sa 1956 sa Congress of Catholic Culture kua Ciudad Trujillo, seo se bego se thekgwa ke [Trujillo] ka ditšhelete, Mopišopomogolo Francis Spellman yo e bego e le moemedi yo a kgethegilego wa Mopapa o ile a tlišetša Trujillo molaetša o kgethegilego. Mopišopomogolo Spellman o ile a tloga New York gomme a amogelwa ka tsela ya maemo a godimo kudu ke Moetapele [Trujillo] ka boyena. Tsela yeo ba ilego ba gokarelana ka yona e ile ya bontšhwa matlakaleng a ka ntle a dikuranta ka moka tša Dominican letšatšing le le latelago.”

Ka 1960, makasine wa Time o ile wa bega gore: “Go fihla ga bjale, Trujillo o dirišana gabotse le kereke ya Katholika. Mopišopomogolo Ricardo Pittini, e lego Mopišopo yo Mogolo wa Amerika, ga bjale o na le nywaga e 83 e bile ke sefofu, eupša nywageng e mene e fetilego o ile a saena lengwalo leo le bego le ngwaletšwe New York Times le reta Trujillo e bile le bolela gore ‘“mmušanoši” yo o ratwa le go hlompšha ke setšhaba sa gagwe.’”

Lega go le bjalo, ka morago ga nywaga e 30 Kereke ya Katholika e thekga pušo e sehlogo ya Trujillo, e ile ya thoma go se sa mo thekga ge maemo a dipolotiki a fetoga. Setsebi sa dipolotiki se itše: “Ge batho ba bantši ba be ba ganetša mmušo wa Trujillo gomme ba nyaka go ikgethela mmušo wo ba nyakago o ba buša, Kereke yeo e bilego mogwera wa Trujillo ka nywaga e mentši, e ile ya gapeletšega go mo hlanogela.”

Mafelelong, ka 2011 Kereke ya Katholika e ile ya gapeletšega go kgopela tshwarelo go batho ba Dominican. Lengwalo la baruti leo le ilego la tsopolwa kuranteng ya Dominican Today le be le re: ‘Re a dumela gore re dirile diphošo le gore ga se ka mehla re bego re phela ka go dumelelana le tumelo ya rena, modiro wa rena le boikarabelo bja rena. Ka baka leo, re kgopela tshwarelo e bile re re hle setšhaba ka moka sa Dominican, re ineleng matsogo meetseng.’