Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Hlogo ke Mang?

Hlogo ke Mang?

“Dirang Gore Mokgatlo wa Tšona o Šale o se na Hlogo”

Ka July 13, 1957, Molaodi Colón o ile a ngwalela mongwaledi wa mmušo lengwalo gomme a re: “Go na le polelwana e nngwe ya kgale yeo e tsebjago kudu ya gore: ‘Ge o nyaka go bolaya noga, o swanetše go e pšhatla hlogo.’ Mogato o mogolo wa gore re fediše sehlotswana sa Dihlatse tša Jehofa nageng ye ke go hwetša mokgwa wa go raka baromiwa ba tšona nageng ye. Mogato woo o tla dira gore mokgatlo wa tšona o šale o se na hlogo, goba moetapele, gomme ge di se na hlogo mošomo wa tšona o tla kgaotša.”

Ka moragonyana ga moo, Mongwaledi wa tša Tšhireletšego Arturo Espaillat o ile a laela baromiwa ba lesome bao ba bego ba šetše nageng ye gore ba tloge. Ka July 21, 1957, Roy Brandt o ile a ngwalela Trujillo lengwalo gomme a mo kgopela gore ba kopane gore a mo hlalosetše boemo bja rena. Karolo ya lengwalo leo e be e re: “Tsela yeo batho ba bangwe nageng ye ba hloilego leina la Jehofa Modimo e swana le yeo batho ba bangwe ka go se tsebe ba ilego ba dira ka yona ka baapostola ba Jesu.” Ke moka Ngwanabo rena Brandt o ile a kgothaletša Trujillo gore a bale Ditiro dikgaolo 2 go ya go 6 gomme a hlalosa gore: “Keletšo e kwagalago le e matla yeo  Moahlodi Gamaliele a ilego a e nea mehleng yeo e šoma gabotse le mehleng yeno.” Ke moka Ngwanabo rena Brandt o ile a tsopola Ditiro 5:38, 39 gomme a e ngwala ka ditlhaka tše dikgolo a re: “TLOGELANG BANNA BA KA GOBANE GE E BA MOŠOMO WO BA O DIRAGO O ETŠWA GO MODIMO, KA LETŠATŠI LE LENGWE LE KA HWETŠA GORE LE LWA LE MODIMO.” Eupša kgopelo ya ngwanabo rena yo e ile ya se amogelwe. Ka August 3, 1957, baromiwa ba ile ba išwa boemafofaneng gomme ba bušetšwa gae.

‘Hlogo ke Jesu’

Donald Nowills o ile a šala a okametše mošomo lekaleng a na le nywaga e 20 feela

Go be go tla direga’ng ka bana babo rena le dikgaetšedi ba nageng ye ka ge ga bjale baromiwa ba be ba bušeditšwe magagabo bona? Na ba be ba tla šala ba se na hlogo, go etša ge Molaodi Colón a boletše e sa le pele? Le gatee! Jesu “ke hlogo ya mmele, e lego phuthego.” (Bakol. 1:18) Ka go re’alo, batho ba Jehofa kua Dominican Republic ga se ba ka ba šala ba se na hlogo. Go e na le moo, ba ile ba tšwela pele ba hlokometšwe ke Jehofa le mokgatlo wa gagwe.

 Donald Nowills, yoo a ilego a abelwa go okamela mošomo lekaleng ka morago ga gore baromiwa ba rakwe nageng ye, o be a na le nywaga e 20 feela e bile a na le nywaga e mene feela a kolobeditšwe. Gaešita le ge a be a hlanketše e le molebeledi wa tikologo ka dikgwedi tše sego kae, o be a sa tsebe selo ka mošomo wa lekaleng. Ngwanabo rena Nowills o be a na le ofisi e nyenyane legaeng la gabo, e dirilwe ka mapolanka le masenke, e na le lebato la mmu. E be e le tikologong ya Gualey, e lego karolo e kotsikotsi motseng wa Ciudad Trujillo. Ka thušo ya Félix Marte, Ngwanabo rena Nowills o be a phrinthela naga ka moka dikopi tša Morokami.

Kopi ya Morokami wa 1958

Mary Glass, yoo monna wa gagwe e lego Enrique a bego a golegilwe ka nako yeo, o ile a thušana le Ngwanabo rena Nowills. O re: “Ke be ke tšhaiša mošomong ka iri ya bohlano thapama gomme ke eya ofising ya Ngwanabo rena Nowills go yo thaepa Merokami. Ka morago ga moo, Ngwanabo rena Nowills o be a phrintha dikopi. Ke moka kgaetšedi yo mongwe yo a tšwago Santiago, yo a bego a neilwe leina le le bego le tsebja ke bana babo rena feela la ‘morongwa,’ o be a tšea dikopi tša dimakasine tšeo gomme a di lokela tlasetlase  ka bolekeng bja makhura ao a dirilwego ka merogo. Ka morago ga moo o be a khupetša dikgatišo tšeo ka lešela ke moka a tsenye cassava, ditapola, goba taros. Ke moka a di khupetša ka lesaka. Ka morago ga moo o be a namela senamelwa sa batho bohle a lebe ka leboa la naga a tšama a tlogela kopi e tee phuthegong e nngwe le e nngwe. Malapa a be a šiedišana go bala kopi yeo e le gore phuthego ka moka e tle e ithute yona e le gotee.”

Mary o oketša ka gore: “Re be re swanetše go dula re ntšhitše mahlo dinameng, ka gobane bahlankedi ba mmušo ba be ba dula ba emaema diterateng ba nyaka go tseba gore Merokami yeo e gatišwa kae. Eupša ga se ba ka ba tseba. Ka mehla Jehofa o be a re šireletša.”