Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Go Nyakega Bagoeledi ba Oketšegilego

Go Nyakega Bagoeledi ba Oketšegilego

Ditaba tše Dibotse di Fihla Metseng Yeo e Lego Thoko

Ge nako e dutše e eya, baromiwa ba oketšegilego ba ile ba fihla nageng ye, go akaretša Pete Paschal, Amos le Barbara Parker, Richard le Belva Stoddard, bao ba kilego ba hlankela kua Bolivia, gotee le Jesse le Lynn Cantwell bao ba tšwago Colombia. Baromiwa ba ile ba dira gore modiro wa boboledi o atlege le go feta. Ka 1973, mošomo o mogolo wa go ruta batho Beibele o be o kgatlampana ditoropong le metseng ya Dominican Republic, eupša ditaba tše dibotse di be di se tša hlwa di fihla bathong bao ba dulago metseng yeo e lego thoko. Ka go re’alo, go ile gwa dirwa dithulaganyo tša gore batho ba ditikologong tšeo le bona ba išetšwe molaetša wo. Ge bagoeledi ba be ba kgopelwa gore ba ithaopele go dira boboledi ditikologong tšeo tša magaeng ka dikgwedi tše pedi, babulamadibogo ba ka mehla ba 19 ba ile ba ithaopa. Magareng ga December 1973 le January 1977, dihlopha tša babulamadibogo di ile tša abelwa go ya ditikologong tšeo di sa šongwego kudu goba tšeo re sa kago ra fihla go tšona.

“Re be re ba nea dikgatišo ke moka bona ba re nea dikgogo, mae le dienywa”

Mmulamadibogo yo mongwe yo a kilego a tšea karolo modirong woo o kgethegilego o itše: “Ka morago ga go botša batho ba ditikologong tšeo molaetša wa Beibele le go ba nea dikgatišo, re be re fetša letšatši la bobedi re dira maeto a go boela go bao ba thabetšego. Ka ge batho ba metsemagaeng ba be ba se na tšhelete, re be re ba nea dikgatišo ke moka bona ba re nea dikgogo, mae le dienywa. Ka baka la thušo ya Jehofa, ga sa nka ra robala ka tlala.” Ba bantši e be e le la mathomothomo  ba ekwa Beibele e balwa. Go ile gwa hwetšagala gore baruti ba moo ba be ba boditše batho gore Jehofa ke Diabolo. Ba ile ba makala kudu ge ba be ba bala Mangwalo a go swana le Psalme 83:18 yeo e rego: “Wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka”! Metseng e mengwe batho ba be ba thabela kudu moo go ilego gwa swarwa le diboka.

Baromiwa ba Oketšegilego le Lekala le Lefsa

Ka September 1979, Abigail Pérez le mosadi wa gagwe Georgina, ba ile ba fihla nageng ye e le baromiwa. Ba ile ba abelwa go hlankela e le balebeledi ba tikologo. Ka morago, ka 1987, dialoga tša Gilead e lego Tom le Shirley Dean ba ile ba tla gomme ba matlafatša bana babo rena modirong wa boboledi. Le gona tšhemo e ile ya thekgwa kudu ke bana babo rena bao ba lego tirelong e kgethegilego ya nako e tletšego bao ba ilego ba tla ka bontši ba etšwa Puerto Rico. Ka August 1988, Reiner le Jeanne Thompson ba ile ba abelwa Dominican Republic, e le kabelo ya bona ya bohlano ya boromiwa.

Ka 1989, palo ya bagoeledi e be e oketšegile go fihla go 11 081, e bile go bonagala go tla ba le koketšego ka ge go be go begwa dithuto tša Beibele tše 20 494. Koketšego ye e ile ya baka mathata. Ka mohlala, lekala leo le bego le dutše le šoma le be le kgathile tema ya lona, eupša mafelelong a bo-1980, gwa bonagala e le le lenyenyane kudu. Reiner Thompson o re: “E be e le le lenyenyane kudu moo go ilego gwa nyakega gore go hwetšwe mafelo a oketšegilego a bodulo gomme go dirišwe mafelo a mangwe dikarolong tša motse woo e le bobolokelo.”

Reiner o tšwela pele ka gore: “Go ile gwa ba thata go hwetša lefelo le lebotse leo go lona re bego re ka aga lekala le  lefsa. Ke moka rakgwebo yo mongwe yo a ilego a kwa gore re nyakana le lefelo a re founela. O ile a re botša gore o nyaka go rekiša lefelo la gagwe le lebotse kudu, eupša a re o nyaka go le rekišetša Dihlatse tša Jehofa feela. O be a kile a ba le kgwebo e kgolo ya go roka, gomme mongwaledi wa gagwe le bašomi ba gagwe ba mmalwa e le Dihlatse tša Jehofa. O be a bone ka nywaga e mentši gore Dihlatse tšeo di a botega le gore di itshwara gabotse gomme a kgahlwa ke seo. Ka ge a be a hlompha Dihlatse tša Jehofa kudu, o ile a re rekišetša lefelo leo ka theko ya tlase kudu.” Re ile ra reka lefelo leo ka December 1988, gomme mafelo a mangwe a mararo kgauswi le moo a tla a rekwa ka moragonyana. Ka kakaretšo, ofisi ya lekala le Holo ya Kopano tšeo di agilwego lefelong letee di tlala jarata ya diheketara tše senyane.

Baithaopi ba makgolo ba nageng ye le bao ba tšwago dinageng dišele ba ile ba tla go thuša go aga lekala leo le lefsa le Holo ya Kopano. Meago yeo e ile ya neelwa ka November 1996 ge ditho tša Sehlopha se Bušago e lego Carey Barber, Theodore Jaracz le Gerrit Lösch ba be ba tlile gomme ba nea dipolelo lenaneong leo ka Mokibelo. Letšatšing le le latelago go ile gwa swarwa mananeo a kgethegilego mapatlelong a mabedi a magolo a nageng yeo, gomme baeng ba ka godimo ga ba 10 000 ba tla go bona meago e mefsa ya lekala.

‘Go Tshelela Matsedonia’

Re tla ba re se ra fetša ge re ka bolela ka histori ya batho ba Jehofa Dominican Republic eupša ra lebala go bolela ka Dihlatse tše dintši tšeo di hudugetšego moo go yo hlankela mo go nyakegago bagoeledi ba oketšegilego ba Mmušo. Ba kgothaditšwe ke dipego tša gore tšhemo ya nageng ye e nonne le gore motho a ka swara dithuto tše dintši tša Beibele, ba bantši ba ile ba thoma go hudugela moo mafelelong a bo-1980, gwa ba bjalo ka ge eka ba “tshelela Matsedonia.” (Dit. 16:9) Baithaopi ba ba ile ba anegela ba bangwe mabose ao ba  a kwago modirong wa puno kua Dominican Republic. Seo se ile sa feleletša ka gore bagoeledi ba bantši ba hudugele moo ka bo-1990.

Ka mohlala, Stevan le Miriam Norager bao ba tšwago Denmark, ba hlanketše Dominican Republic ga e sa le go tloga ka 2001. Pele ga moo, Miriam o be a kile a hlankela yona nageng ye ngwaga le seripa a na le ngwanabo. Ke’ng seo se tutueditšego banyalani ba go hudugela nageng ya kgole yeo e nago le setšo sa go se swane le sa bona le leleme? Miriam o re: “Bobedi bja rena re tšwa malapeng ao a tiilego moyeng gomme batswadi ba rena e be e le babulamadibogo ba kgethegilego ge ba sa gola, ke moka ba tšwela pele ba hlankela e le babulamadibogo ba ka mehla ka morago ga gore ba be le bana. Ka mehla batswadi ba rena ba be ba re kgothaletša go direla Jehofa sohle se re ka se kgonago tirelong ya nako e tletšego.”

Stevan le Miriam e bile babulamadibogo ba kgethegilego  ga e sa le go tloga ka 2006 gomme ba thušitše batho ba bantši go ithuta therešo. Stevan o re: “Ditšhegofatšo ga di kaakaa. Ditlhohlo le ge e le dife goba mathata a tša maphelo ga se selo ge re di bapetša le diphihlelo tše di kgahlišago tšeo re bilego le tšona le lethabo leo le tlišwago ke go thuša batho ba dipelo tše dibotse go tseba Jehofa le go mo rata. Le gona re šegofaditšwe ka lapa le legolo kudu la bagwera ba lerato. Go hlankela Dominican Republic go re rutile go ikokobetša le go se fele pelo, e bile go phela bophelo bjo bonolo go re thušitše go ba le tumelo e tiilego go Jehofa le go mmota.”

Jennifer Joy o hlanketše nageng ye nywaga ya ka godimo ga e 20, a thuša tšhemong ya polelo ya diatla

Jennifer Joy ke yo mongwe wa dikgaetšedi tše dintši tše di sa nyalwago tšeo di tšwago dinageng dišele tšeo di bolelago ditaba tše dibotse Dominican Republic. Ge Jennifer a  be a etetše mmamogolo wa gagwe Edith White ka 1992, yoo e bilego moromiwa ka nywaga e mentši, o ile a bona mafelelo a mabotse a modiro wa boboledi nageng ye. Le gona o ile a kopana le dikgaetšedi tše dingwe tše di tšwago dinageng dišele tšeo di bego di hlankela moo go nago le tlhokagalo nageng ye. Jennifer o re: “Ke be ke na le dihlong e bile ke sa ikholofele. Eupša ke ile ka ipotša gore: ‘Ge e ba di kgonne go tla mo, mohlomongwe le nna nka kgona.’”

Mathomong Jennifer o be a rulagantše go hlankela nageng ye ngwaga feela, eupša mengwaga e ile ya feta a sa le gona moo gomme gona bjale o na le nywaga ya ka godimo ga e 20 a hlankela Dominican Republic. O thušitše batho ba bantši bao a bego a ithuta le bona Beibele gore e be barapedi ba Jehofa. Jennifer o thabetše go tsenya letsogo go thomeng tšhemo ya polelo ya diatla nageng ye, e bile o thušitše le gore go be le diklase tša go ruta batho polelo ya diatla.

Jehofa o ntlhokometše go fihla gona bjale, ka gona ke ka baka la’ng nka belaela gore ngwageng o tlago o tla palelwa ke go ntlhokomela?’

Jennifer o iphediša bjang? O re: “Ngwaga le ngwaga ke boela gae Canada gomme ka šoma ka dikgwedi tše sego kae. Go theoša le nywaga ke šomile mešomo e fapafapanego, go swana le go hlatswiša dinepe, go tšea dinepe, go penta dintlo, go hlwekiša diofisi, go dira mabone le go dira dikhapete. Le gona ke šomile go bontšha batho mafelo, go thuša batho go tšea maeto, go ruta Seisemane le go ba toloki.” Jennifer o swantšha boemo bja gagwe le bja Baisiraele ba bogologolo ge ba be ba le lešokeng. O re: “Ba be ba phela ka mantšu ohle ao a tšwago molomong wa Jehofa. Lentšu la gagwe e be e le gore o tla ba hlokomela, gomme o ile a dira sona seo. Ba be ba sa robale ka tlala, e bile diaparo tša bona le dieta ga se tša ka tša onala. (Doit. 8:3-4) Le rena Jehofa o re holofeditše  gore o tla re hlokomela. (Mat. 6:33) O ntlhokometše go fihla gona bjale, ka gona ke ka baka la’ng nka belaela gore ngwageng o tlago o tla palelwa ke go ntlhokomela?”

Mo e ka bago bagoeledi ba 1 000 bao ba tšwago dinageng tša go swana le Austria, Japane, Poland, Puerto Rico, Russia, Sepania, Sweden, Taiwan le United States ba dirile boikgafo bja go tla nageng ye. Bagoeledi ba bantši kudu bao ba tšwago ditšong tše 30 ba hlankela gotee diphuthegong tša Polelo ya Diatla ya Amerika, se-China, se-Creole sa Haiti, Seisemane, Sepanishi, Serussia le Setaliana. Ba boletše go swana le moapostola Petro gore: “Bona! Re tlogetše dilo ka moka gomme re go latetše.”—Mar. 10:28.

Puno ke e Kgolo.—Mat. 9:37

BAGOELEDI ba e ka bago ba 1 000 go tšwa dinageng tše 30 ba ithaopetše go yo thuša dihlopha tša maleme a fapafapanego kua Dominican Republic. Na o ka thuša e nngwe ya ditšhemo tše?