Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Go Ipea Kotsing ya go Golegwa

Go Ipea Kotsing ya go Golegwa

‘Go ba Šedi Bjalo ka Dinoga, Fela e le ba se Nago Molato Bjalo ka Maeba’

Go be go le bohlokwa kudu gore bahlanka ba botegago ba Jehofa ba tšwele pele ba hwetša dijo tša moya nakong ya thibelo, eupša ka nako yeo barapedi ba therešo ba Jehofa ba be ba le kotsing nageng ye. Mehleng yeo, bana babo rena ba bantši ba be ba swarwa gomme ba ahlolelwa nywaga e mentši kgolegong.

Kgaetšedi Juanita Borges o hlalosa ka gore: “Ge ke be ke amogela therešo ka 1953, ke be ke tseba gabotse gore ka go ba yo mongwe wa Dihlatse tša Jehofa, ke ipea kotsing ya go golegwa. Go ile gwa direga sona seo. Ka November 1958, ge ke be ke etetše Kgaetšedi Eneida Suárez, maphodisa a ka sephiring a ile a tla gomme a re latofatša ka gore re swere seboka. Re ile ra ahlolelwa dikgwedi tše tharo kgolegong, gomme yo mongwe le yo mongwe wa rena o be a swanetše go lefa dipeso tše 100—tšeo ka nako yeo di bego di lekana le ditolara tše 100 (U.S.).”

Maphodisa a ka sephiring a ile a dula a na le lelokelelo la maina a bana babo rena le dikgaetšedi.

Mmušo o ile wa leka ka gohle go thibela Dihlatse go swara diboka, eupša bana babo rena ga se ba ka ba kgaotša. Lega go le bjalo, ba ile ba swanelwa ke go ba “šedi bjalo ka dinoga,  fela [e] le ba se nago molato bjalo ka maeba.” (Mat. 10:16) Kgaetšedi Andrea Almánzar o gopola ka gore: “Re be re swanetše go fihla dibokeng ka dinako tše di sa swanego. Ke moka gantši re be re tloga dibokeng bošego kudu ka gobane re be re swanetše go tloga moo go le bjalo ka ge eka go be go sa direge selo e le gore go se be le motho yo a re belaelago.”

Jeremías Glass, yoo a belegwego ge tatagwe e lego León a be a le kgolegong, o ile a ba mogoeledi ka 1957 a na le nywaga e šupago. O sa gopola diboka tšeo di bego di swarelwa ka sephiring ga gabo le seo ba bego ba se dira gore ba se tanywe. Jeremías o hlalosa ka gore: “Yo mongwe le yo mongwe yo a bego a etla dibokeng tšeo o be a newa pampišana yeo e ngwadilwego nomoro go bontšha tatelano yeo ba bego ba tlo tšwa ka yona. Ge diboka di fela, tate o be a nkemiša mojakong gore ke lebelele dinomoro tšeo le go botša bao ba tšwago gore ba sepele ka babedi ka babedi le ka diterata tše di sa swanego.”

Selo se sengwe seo re bego re se dira e be e le go rulaganya diboka ka dinako tšeo di sego kotsi kudu. Ka mohlala, Kgaetšedi Mercedes García o ithutile therešo go malome wa gagwe Pablo González. Ge a be a na le nywaga e šupago feela, mmagwe o ile a hwa ge tatagwe a be a le kgolegong, gomme a tlogela yena le bana babo ba senyane ba nnoši. Mercedes o ile a kolobetšwa ka 1959 a na le nywaga e senyane. E le gore ba se ke ba bonwa, bana babo rena ba ile ba nea polelo ya kolobetšo ka masa ka 3:30. Polelo yeo e ile ya newa legaeng la ngwanabo rena yo a itšego, gomme batho ba kolobeletšwa Nokeng ya Ozama, yeo e elelago go phatša motsengmošate. Mercedes o re: “Ge batho ba be ba tsoga ka bo–5:30 mesong, ke ge rena re boela magae.”