Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Go Golegwa le go Thibelwa

Go Golegwa le go Thibelwa

Ba Golegwa ka Baka la go Gana go Tsenela Bošole

Enrique Glass le kgolego ya ka moleteng yeo a bego a golegilwe ka go yona ka dibeke tše pedi

Ka June 19, 1949, sehlopha sa batho bao ba kilego ba tšhaba Dominican nakong ya dikgaruru se ile sa boela Dominican Republic go yo leka go menola pušo ya mmušanoši  yo a bitšwago Rafael Trujillo. Gaešita le ge tlhaselo yeo e ile ya folotša kapejana, mmušo wa Trujillo o ile wa golega batho bao ba bego ba sa nyake go tsenela tirelo ya bošole le bohle bao ba bego ba tšewa e le manaba a mmušo. León, Enrique le Rafael Glass gotee le Dihlatse tše dingwe tšeo di bego di šoma le León, ba bile gare ga Dihlatse tša mathomo tšeo di ilego tša golegwa ka baka la go gana go tsenela bošole.

León o hlalositše gore: “[Nna le bao ke bego ke šoma le bona] re ile ra golegwa gomme ra botšološišwa ke balaodi ba tirelo ya bošole ya ka sephiring. Ka morago ga go tšhošetšwa, re ile ra lokollwa, eupša ka morago ga matšatši a  sego kae ra bitšwa gape gore re tsenele bošole ntle le go latela megato ya maleba. Ka ge re ile ra gana, re ile ra išwa kgolegong. Gona moo re ile ra hwetša Dihlatse tše dingwe tše nne, tše pedi tša tšona e be e le bana ba gešo. Ka morago ga gore re lokollwe, re ile ra ahlolelwa go dula kgolegong gape. Se se diragetše ka makga a mararo, gomme nako le nako re lokollwa letšatši letee feela goba a sego kae. Re feditše nywaga e ka bago e šupago kgolegong, gomme lekgeng la mafelelo re be re ahloletšwe nywaga e mehlano.”

‘Gaešita le ge re be re itiwa ka dipatla le dithunya, re ile ra kgona go kgotlelela ka ge Jehofa a be a re nea matla’

Bana babo rena ba be ba lekwa ka mehla kgolegong. Bagolegwa le bahlapetši ba kgolego ba be ba ba kwera bošego le mosegare. Molaodi wa kgolego ya Fort Ozama moo ba bego ba golegilwe gona mathomong o ile a re: “Lena Dihlatse tša Jehofa, ge le ka fetoga dihlatse tša Diabolo le mpotšeng, gore ke kgone go le lokolla.” Lega go le bjalo, baganetši bao ga se ba ka ba kgona go dira gore bana babo rena ba se sa botega. León o hlalositše lebaka la seo ka gore: ‘Ka mehla Jehofa o be a re thuša go kgotlelela le gona re be re bona le dilong tše dinyenyane gore o a re lwela. Gaešita le ge re be re itiwa ka dipatla le dithunya, re ile ra kgona go kgotlelela ka ge Jehofa a be a re nea matla.’

Dihlatse tša Jehofa di a Thibelwa

Dikarolong tše dingwe tša Dominican Republic, manaba a borapedi bja therešo a be a tiiša letsogo go re tlaišeng. Lega go le bjalo, ka May 1950 go be go na le bagoeledi ba 238 nageng ye, go akaretša le baromiwa. Bagoeledi ba 21 ba gona moo e be e le babulamadibogo ba ka mehla.

Kuranta yeo e ilego ya tsebiša ka go golegwa ga bana babo rena bao ba bego ba gana go tsenela bošole

Mo e ka bago ka yona nako yeo, mohlankedi wa ka sephiring wa mmušo o ile a ngwalela Mongwaledi wa Mopresidente  gore: “Ditho tša sehlotswana sa bodumedi sa Dihlatse tša Jehofa di tšwela pele ka mafolofolo ka mediro ya tšona dikarolong ka moka tša motse wo [Ciudad Trujillo].” Le gona o ile a re: “Ke sa buša ke re Dihlatse tša Jehofa di swanetše go bewa leihlo ka ge mediro ya tšona le go bolela ga tšona ka Beibele go aroša setšhaba, kudukudu batho feela.”

Mongwaledi wa Lefapha la Ditirelo tša Setšhaba le Maphodisa, e lego J. Antonio Hungría, o ile a kgopela Ngwanabo rena Brandt gore a tliše lengwalo leo le hlalosago gore Dihlatse di eme kae tabeng ya go tsenela bošole, go dumediša folaga le go lefa makgetho. Ngwanabo rena yo o ile a ngwala lengwalo leo a diriša tsebišo yeo e lego ka pukung ya “Let God Be True.” Lega go le bjalo, ka June 21, 1950, Mongwaledi Hungría o ile a ntšha taelo ya go thibela modiro wa Dihlatse tša Jehofa Dominican Republic. Ngwanabo rena Brandt o ile a biletšwa ofising ya Hungría gore a tle a ikwele taelo yeo ka tša gagwe ditsebe. Ngwanabo rena Brandt o ile a botšiša ge e ba baromiwa ba swanetše go tloga  nageng yeo. Hungría o ile a mo kgonthišetša gore ba ka dula ge feela ba tla kwa taelo yeo gomme ba se boledišane le batho ba bangwe ka bodumedi bja bona. *

^ par. 10 Dibekeng tša pele ga thibelo, baruti ba kereke ya Katholika ba ile ba ngwala dihlogo tše ditelele dikuranteng ba bolela gampe ka Dihlatse tša Jehofa e bile ba re di lwantšha mmušo.