Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Bokamoso bjo bo Kgahlišago

Bokamoso bjo bo Kgahlišago

Botumo bjo Bobotse

Dihlatse tša Jehofa di šetše di na le nywaga e ka bago e 70 di le gona Dominican Republic. Nakong yeo ka moka, di itiretše leina le lebotse kudu. Gantši batho ba ya go bagoeledi ge ba le bodireding gomme ba ba kgopela dikgatišo, le gona go tlwaelegile go kwa batho tšhemong ba bolela mantšu a go swana le gore: “Bodumedi bjo ke a bo rata” goba “Lena le tloga le phela ka go dumelelana le Beibele.”

Ka mohlala, ela hloko seo se ilego sa direga ge go be go agiwa Holo ya Mmušo setsheng seo se bego se neetšwe ke ngwanabo rena. Ge ngwanabo rena yo a be a eya go ngwadiša setsha seo, o ile a hwetša gore go na le motho yo a itšego yo a iphilego sona ka boradia, gomme motho yoo o ile a latofatša ngwanabo rena yo ka gore o leka go mo amoga sona. Taba yeo e ile ya išwa kgorong ya tsheko. E be e le molato wo o gakantšhago ka gobane motho yoo o be a na le dipampiri tše di bontšhago gore setsha seo ke sa gagwe.

Ka nako e nngwe, moahlodi o ile a kgopela ramolao wa ngwanabo rena yo gore a hlalose gabotse gore o be a emela mang. Ka morago ga gore ramolao yo a hlalose gore o emela mokgatlo wo o dirišwago ke Dihlatse tša Jehofa, moahlodi yoo o ile a araba ka gore: “Ge e ba go le bjalo, gona ke a dumela gore setsha seo ke sa Hlatsegotee le wena. Dihlatse tša Jehofa ke a di tseba, e bile ke tseba gabotse gore di a botega. Di ka se tsoge di lekile go radia motho gomme tša tšea dilo tšeo e sego tša tšona.”

Ge bohlatse bo be bo rolwa pele ga kgoro ya tsheko, go ile gwa ba molaleng gore molatofatši yoo o be a dirišitše dipampiri tša boradia, ka gona moahlodi o ile a ema le Dihlatse molatong woo. Ramolao yo yo e lego Hlatse o itše: “Se ga se thome go direga. Dikgorong tša tsheko nageng ka bophara, nako le nako ge go bolelwa ka Dihlatse tša Jehofa, gantši di hlompšha kudu.”

 Go Lebelela Bokamosong

Ge nako e dutše e eya, re tla bona gore ke batho ba bakae bao ba lokilego bao ba tlago go ithuta therešo ya Beibele gomme ya ba barapedi ba Modimo wa therešo. Ka se sebaka, go dirwa sohle go fihlelela batho ba bjalo. Ka mohlala, ka 2013 Dihlatse tša Jehofa kua Dominican Republic di feditše diiri tša ka godimo ga dimilione tše 11 di ruta batho Beibele, gomme tša swara dithuto tša Beibele tše 71 922. Le gona e bile mo go kgothatšago kudu go bona gore bagoeledi ba 9 776 ba ile ba tšea karolo mohuteng o itšego wa tirelo ya bobulamadibogo. Ka August wona ngwageng woo, bagoeledi ba 35 331 ba ile ba tšea karolo ka mafolofolo bodireding. Go oketša moo, go bonagala go sa tlo ba le koketšego e kgolo ka gobane batho ba 127 716 ba bile gona Segopotšong.

Modiro wa boboledi le wa go dira barutiwa kua Dominican Republic o tšwa kgole ga e sa le go tloga ka Sontaga sa April 1945, ge Lennart le Virginia Johnson ba be ba fihla mo gomme ba thoma go bolela ditaba tše dibotse tša Mmušo. Dihlatse tša Jehofa Dominican Republic di tšeela godimo bohwa bja tšona bja moya. Di leboga sebete le boikgafo bjo bo ilego bja dirwa ke bao e bilego ba mathomo ba go amogela therešo nageng ye. Eupša go feta moo, di tšeela godimo kudu tokelo yeo di nago le yona gona bjale ya “go nea bohlatse bjo bo tletšego mabapi le mmušo wa Modimo.” (Dit. 28:23) Di lebeletše pele letšatšing leo ka lona bohle sehlakahlakeng se gotee le barapedigotee le tšona lefaseng ka moka di tlago go opela gotee ka gore: “Jehofa bjale ke kgoši! Anke lefase le thabe. Anke dihlakahlaka tše dintši di hlalale.”—Ps. 97:1.