Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Modiro wa Boboledi o Tšwela Pele

Modiro wa Boboledi o Tšwela Pele

Baromiwa ba Tšwela Pele ka Modiro ka Sephiring

Go thibelwa ga modiro wa rena e be e le mathomo a nako e thata kudu bakeng sa bana babo rena. Moromiwa yo a bitšwago Alma Parson o hlalositše ka gore: ‘Diholo tša rena tša Mmušo di ile tša tswalelwa gomme modiro wa rena wa thibelwa. Bana babo rena ba rategago ba moo ba ile ba lebeletšana le diteko le ditlaišego tše dintši.’ Ba bangwe ba ile ba  rakwa mešomong le go golegwa. Lega go le bjalo, kgaetšedi yo o gopola ka lethabo gore: ‘Re ile ra bona gabotse tlhahlo le tšhireletšo ya Jehofa ka makga a mantšintši.’ Ka ge bana babo rena ba be ba bota ‘tlhahlo ya Jehofa,’ ba ile ba tšwela pele ka modiro ka sephiring.

Re be re sa dumelelwe go swara diboka tša phuthego. Lennart Johnson o gopola ka gore: ‘Bana babo rena ba ile ba thoma go bokana ka sephiring ka dihlopha tše dinyenyane magaeng a bana babo rena. Dibokeng tšeo re be re ithuta dihlogo tša Morokami tšeo di bego di phrinthilwe motšheneng wa go dira dikopi. Bana babo rena ka moka le dikgaetšedi bao ba botegago ba ile ba tšeela godimo kudu matla ao Jehofa a ilego a tšwela pele a re nea ona dihlopheng tšeo tše dinyenyane tša go ithuta.’

Roy le Juanita Brandt ba bile gare ga bao ba ilego ba dula kabelong ya bona nakong ya thibelo

Ka yona nako yeo, mmušo o ile wa re bea leihlo le go feta gotee le go re tlaiša o šoro. Eupša bana babo rena le dikgaetšedi ga se ba ka ba tšhošwa ke seo. Ka September 15, 1950, Mongwaledi Hungría o ile a ngwalela Mopresidente wa naga yeo gore: “Ke kgale re biletša Morena Lee Roy Brandt le baetapele ba bangwe ba sehlopha sa Dihlatse tša Jehofa ofising ye re ba botša gore ba kgaotše mediro ka moka ya mabapi le mokgatlo wa bona wo o thibetšwego semmušo nageng ye, e lego taelo yeo go lego molaleng gore ga ba e latele. Letšatši le letšatši re hwetša dipego go tšwa dikarolong tše di fapafapanego tša naga tša gore ba tšwela pele ka mediro ya bona ka sephiring, ba nyatša mmušo.” O ile a phetha lengwalo la gagwe ka go šišinya gore bao go thwego ke baetapele ba Dihlatse tša Jehofa ba rakwe nageng ye.

‘Ba a re Matlafatša’

Ngwanabo rena Knorr le Ngwanabo rena Henschel ba ile ba etela naga yeo mafelelong a 1950. Ka morago ga moo, ba  bangwe ba baromiwa bao ba ile ba abelwa go yo hlankela Argentina, Guatemala le Puerto Rico. Ba bangwe ba ile ba nyaka mešomo ya boiphedišo gore ba tšwele pele ba dula nageng yeo. Ka mohlala, Ngwanabo rena Brandt o ile a šomela khamphani ya mohlagase, gomme ba bangwe ba šoma e le barutiši ba Seisemane. Pego e nngwe ka go Yearbook ya 1951 e boletše ka baromiwa bao gore: “Go ba ga bona nageng ye, ba sa tšhabe, go matlafatša balatedi ba botegago ba Morena bao ba ithutilego therešo go bona. Bohle ba thabela go bona sebete seo ba se bontšhago ka go kgomarela kabelong ya bona.”

‘Go ba ga bona nageng ye go matlafaditše bao ba botegago’

Dorothy Lawrence e be e le yo mongwe wa baromiwa bao ba bego ba ruta Seisemane. O be a sa rute batho Seisemane feela, eupša o be a bile a ruta bao ba thabelago Beibele. Ka baka la se, o ile a kgona go thuša batho ba mmalwa go amogela therešo.

Barapedi ba botegago ba Jehofa ba ile ba diriša mekgwa e mengwe go tšwela pele ka tirelo ya tšhemo gaešita le ge ba be ba dula ba beilwe leihlo. Ka dinako tše dingwe ba be ba ntšha matlakala ka dikgatišong tša rena ba a phutha gomme ba a tsenye ka potleng ya hempe goba ka mokotleng wa korosari e le gore ba kgone go ruta ba bangwe Beibele go se na motho yo a ba lemogago. Di S-4 di be di dirilwe gore di swane le lelokelelo la go reka korosari. Go e na le gore dipegong  tša tirelo ya tšhemo ba ngwale gore dipuku, dipukwana, dimakasine, maeto a go boela le diiri, ba be ba ngwala gore diphopho, dinawa, mae, dikhabetšhe le sepenetšhe. Dikopi tša Morokami tšeo di phrinthilwego motšheneng wa go dira dikopi di be di bitšwa yuca, di reetšwe ka semela seo se bitšwago yuca goba cassava, seo se hwetšwago kudu tikologong yeo.

Modiro wa go Dira Barutiwa o Tšwela Pele

Ka June 16, 1954, Rafael Trujillo o ile a dira kwano le Mopapa gore baruti ba kereke ya Roma Katholika ba newe ditokelo tše di kgethegilego kua Dominican Republic. Ka nako yeo, modiro wa rena o be o šetše o thibetšwe ka nywaga e ka bago e mene. Lega go le bjalo, ka 1955 go be go na le bagoeledi ba 478 kua Dominican Republic. Go tlile bjang gore go be le koketšego e bjalo go sa šetšwe maemo a thata? Yearbook ya 1956 e begile gore: “Moya wa Jehofa ke wona o re matlafatšago. . . . Bana babo rena ba ipopile ngatana e tee, ba tiile tumelong e bile ba tšwela pele ka sebete.”

Ka July 1955, Trujillo o ile a hwetša lengwalo la semolao leo le tšwago ntlongkgolo ya lefase ya Dihlatse tša Jehofa. Lengwalo leo le ile la hlalosa ka botlalo gore Dihlatse tša  Jehofa ga di tšee karolo dipolotiking gomme la kgopela gore Trujillo ‘a tloše thibelo yeo a e beetšego Dihlatse tša Jehofa le mokgatlo wa Watch Tower Bible and Tract Society.’ Mafelelo e bile afe?