Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DOMINICAN REPUBLIC

Batho ba Masomepedi-pedi ba Ile ba Tlogela Kereke

Batho ba Masomepedi-pedi ba Ile ba Tlogela Kereke

GERMAN GOMERA e be e le ngwana wa bo-10 yo monyenyane go bana ba 11. Ka morago ga gore tatagwe le dikgaetšedi tša gagwe tše pedi di hlokofale, mmagwe e lego Luisa, o ile a hudušetša lapa toropong. Ge ba le moo, ba ile ba tsena Kereke ya Mamenno, yeo dikgaetšedi tša Luisa le malapa a tšona di bego di e tsena.

German o re: “Ka 1962, banyalani bao e bego e le babulamadibogo ba kgethegilego ba ile ba fihla toropong ya gabo rena. Go be go thwe ba aroša batho ba motse ka ‘dithuto tše mpe.’ Lega go le bjalo, ge banyalani bao ba etela legaeng la ga Piña, ba ile ba amogelwa. Lapa la ga Piña e be e le le legolo. Ka ge le be le makaditšwe ke botho le bogwera bja babulamadibogo bao, le ile la theetša thero ya bona ka kelohloko. Ka baka la ketelo yeo, lapa la ga Piña le dikgaetšedi tša ka tše tharo ba ile ba thoma go ithuta.”

German o tšwela pele ka gore: “Ka letšatši le lengwe ge babulamadibogo ba be ba etetše lapa la ga Piña, mma le yena o ile a laletšwa. Di ile tša bala ditemana tša Beibele tšeo di bego di bolela ka kholofelo ya go phela ka mo go sa felego lefaseng. Mma o ile a botšiša gore, ‘Bjale ke ka baka la’ng kerekeng ya ka ba re re ya legodimong?’ Ka morago ga gore ngwanabo rena a arabe a diriša Beibele le go hlalosa seo Mangwalo a se  bolelago ka tsogo ya lefaseng, mma o ile a rata ditaba tšeo gomme a thoma go botša ba bangwe ka seo a ithutilego sona.

“Ge baruti ba Kereke ya Mamenno ba ekwa gore ditho tše dingwe tša kereke ya bona di be di ithuta le Dihlatse tša Jehofa, ba ile ba di kgothaletša gore di kgaotše go ithuta. Eupša ba ile ba dira bjalo ka go di gapeletša le go di tšhošetša. Mma Piña, e lego Maximina o ile a ba botša gore, ‘Bonang mo! Ke motho yo mogolo, ke tseba go itirela diphetho.’”

German o re: “Mafelelong, batho ba 22 ba ile ba tlogela Kereke ya Mamenno gomme ba thoma go ya dibokeng tša phuthego lefelong leo le hirilwego. Mma o kolobeditšwe ka 1965, gomme nna ka kolobetšwa ka 1969 e lego nywaga e mene ka morago, ke na le nywaga e 13.”

German a na le dikgaetšedi tša gagwe lehono. Ka moka ba hlankela Jehofa ka potego