Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

Nywaga e Lekgolo e Fetilego—1915

Nywaga e Lekgolo e Fetilego—1915

 Morokami wa March 1, 1915 wa Seisemane o ile wa re: “Ye ke nako ya go lekolwa. Na nakong e fetilego re be re fišega tirelong ya Jehofa feela ka gobane re be re letetše go tlo ya legodimong ka A.D. 1914, goba na re be re fišega ka gobane re rata MORENA le Molaetša wa Gagwe le bana babo rena”? Ka 1915, Barutwana ba bangwe ba Beibele ba ile ba lwantšhana le go nyamišwa ke go se phethagale ga seo ba bego ba se letetše. Eupša lefase lona le be le elwa dintwa tša mohuta o mongwe.

Ntwa e Kgolo, yeo ka morago e ilego ya tsebja e le Ntwa ya Pele ya Lefase, e be e aparela Yuropa. Ntwa ye yeo go yona go bego go dirišwa dibetša tša sebjalebjale e be e sa swane le dintwa tše dingwe, gomme e ile ya kgoma batho ka tsela e kgolo kudu. Ka mohlala, ka 1915, dikepe tše dikgolo tša ntwa tša Jeremane di ile tša thoma go ya godimo le fase go dikologa Great Britain. Ka May 7, 1915, se sengwe sa dikepe tšeo se ile sa nweletša sekepe sa go nametša batho sa Brithania seo se bitšwago Lusitania. Go ile gwa hwa batho ba ka godimo ga ba 1 100.

Taba ya go se Tšee Lehlakore

Barutwana ba Beibele ba be ba sa nyake go tšea karolo ntweng ye. Lega go le bjalo, ka nako yeo ba be ba sa kwešiše ka botlalo taba ya gore Mokriste ga se a swanela go tšea karolo dintweng. Gaešita le ge ba be ba sa tsenele bošole ka go rata, ba bangwe ba bona ba ile ba dumela go tsenela bošole ge ba be ba gapeletšwa eupša ba lwela gore ba newe mešomo yeo e sa akaretšego go lwa. Ge ba be ba ka gapeletšwa go lwa, ba bangwe ba be ba nagana gore go e na le gore ba bolaye manaba a bona, ba tla no “thuntšhetša godimo.”

Morokami wa July 15, 1915, o ile wa gatiša phihlelo ya lešole la kua Hungary leo le ilego la kolobetšwa ge le be le alafiwa dikgobalo gomme ka morago la boela ntweng. Phihlelo yeo e boletše seo se ilego sa direga ka morago ga moo ka gore: “[Mašole a Hungary] a ile a batamela mašole a Russia ka dimithara tše 240, gomme a newa taelo ya gore ‘a thuntšhe!’ Ngwanabo rena  yoo wa Mohungary o be a le mafelelong ka letsogong le letshadi. Yena o be a inyakela go itšhireletša gore a se ke a bolawa, ka go re’alo a lwela feela gore a wišetše fase sethunya sa lešole la Morussia leo a bego a elwa le lona. Ge a dutše a dira bjalo, o ile a lemoga gore lešole leo la Morussia le lona le leka go dira se se swanago . . . Lešole leo la Morussia le ile la lahlela sethunya sa lona fase; gomme la lla gabohloko. Ke moka ngwanabo rena wa Mohungary o ile a lebeledišiša lešole leo re ka rego ke lenaba la gagwe—gomme a bona petšhe ya ‘Sefapano Seo se Nago le Mphapahlogo’ baking ya lona! Lešole leo la Morussia le lona e be e le ngwanabo rena Moreneng!” *

Sehlogo se se rego “Boikarabelo bja Mokriste le Ntwa” ka go Morokami wa September 1, 1915 se ile sa ahlaahla taba ya go se tšee karolo ga Bakriste dintweng. Se itše: “Go ba lešole le go apara yunifomo ya mašole go ra gore o dira mediro ka moka yeo mašole a e dirago le go e amogela. . . . Na ruri motho a ka ipotša gore e sa le Mokriste ge a le maemong a bjalo?” Ge nako e dutše e eya, go ile gwa ba molaleng gore Bakriste ba ka se tšee karolo dintweng.

Diphetogo Ntlongkgolo

Ka 1915, ditho tša lapa la Bethele tše 70 kua New York di ile tša botšwa gore ka ge ditšhelete di be di hlaela, di tla swanelwa ke go tloga Bethele gomme di tšwele pele ka tirelo tšhemong. Di ile tša botšwa gore: “Ga se ra swanela go itsenya dikolotong goba go bea modiro wa rena kotsing; ke ka baka leo go dirilwego phetho ye ya go fokotša ditshenyagalelo gohle.”

Clayton J. Woodworth le bana babo rena ba bangwe ba babedi ba ile ba saena lengwalo leo le bego le ngwadilwe ke bana babo rena ba 70 bao ba bego ba kgopetšwe go tloga Bethele. Lengwalo leo le ile la gatišwa ka go Morokami wa May 1, 1915. Bao ba bego ba kgopetšwe go tloga ba boletše gore ba dira seo  “ba thabile e bile ba leboga ditšhegofatšo tše dintši le ditokelo” tšeo ba di thabetšego “ge e be e le ditho tša ‘Lapa la Bethele.’”

Gaešita le ge go kgopelwa go tloga Bethele go be go le thata, go ile gwa nea bana babo rena ba sebaka sa go bontšha gore ge e le gabotse ba be ba botegela mang. Na ba be ba tla dula ba botegela Modimo goba na ba be ba tla galefa? Ngwanabo rena Woodworth o ile a tšwela pele ka boboledi, ka moragonyana a tla a boela Bethele, gomme ka 1919 a ba morulaganyi wa mathomo wa The Golden Age, e lego makasine woo lehono o tsebjago e le Phafoga! O ile a ba morulaganyi wa makasine wo go fihlela ka 1946.

Dibaka tša go Dira Boboledi

Ngwageng woo o thata, Morokami o ile wa kgothaletša bana babo rena gore ba tšwele pele ka modiro wa boboledi. Batho bao ba bego ba bontšhitše kgahlego ba be ba newa tlhokomelo e kgethegilego. Tokollo ya December 15, 1915, e itše: “Re na le lelokelelo la go tšwa nageng ka bophara la batho bao ba rometšego dikarata tša bona ba kgopela dikgatišo. Re šišinya gore batho ba ba etelwe . . . e le gore go bonwe ge e ba ba sa na le kgahlego.” Morero wa go ba etela e be e le go kgohletša kgahlego ya bona “gore e tuke—ba fišegele Modimo le Therešo.”

Go etša ge go le bjalo lehono, ka nako yeo go be go le bohlokwa gore Bakriste ba dule ba tsepamišeditše menagano dikgahlegong tša Mmušo. Morokami wa February 15, 1915 o itše: “Rena bao re phafogilego re swanetše go ba mafolofolo le go fišega kudu tirelong ya Modimo.” Bahlanka ba Modimo ba be ba swanetše go dula ba phakgame. Morokami woo o tšwetše pele ka gore: “Re swanetše go phakgama. Re phakgamele’ng? Selo se segologolo seo re swanetšego go se šetša ke rena ka noši, e le gore re se wele melabeng ya mehleng yeno.”

Temana ya ngwaga ya 1916 e ile ya kgothaletša bana babo rena go dula “ba tiile tumelong,” gomme e theilwe go Baroma 4:20 phetolelong ya King James Version. Lengwalo le le be le tla kgothatša babotegi ngwageng woo, e lego ngwaga wo o ilego wa tla le diteko tša wona.

^ ser. 6 Barutwana ba Beibele ba ile ba hloma petšhe ya sefapano seo se nago le mphapahlogo ka nywaga e mentši e le leswao leo le ba hlaolago. Leswao leo le ile la tšwelela letlakaleng la ka ntle la Morokami ka nywaga e mentši. Mathomong a bo-1930, Dihlatse tša Jehofa di be di šetše di tlogetše go diriša leswao leo.