Eya go dikagare

Eya go menyu wa bobedi

Eya go lelokelelo la dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DINTLHAKGOLO TŠA NGWAGOLA

Pego ya Dikgorong tša Tsheko

Pego ya Dikgorong tša Tsheko

ARMENIA E Hloma Lenaneo la Gore Motho a ka Šoma Mešomo e Mengwe ya Setšhaba Yeo e Hlomphago Boemagare bja Gagwe bja Bokriste

Armenia: Mmušo o nea ba bangwe ba bana babo rena mešomo yeo e sego ya bošole dikarolong tša kgole tša nageng yeo. Ge ba le gona moo, ba tšwela pele ka mafolofolo modirong wa boboledi

Ka 2013, mmušo wa Armenia o ile wa hloma lenaneo la gore motho a ka šoma mešomo e mengwe ya setšhaba ge e ba letswalo le sa mo dumelele go tsenela bošole, wa dumelela Dihlatse tša Jehofa tša kua Armenia go ikgethela go dira mešomo e mengwe ya setšhaba go e na le gore di dule kgolegong ka gobane di gana go tsenela tirelo ya bošole. Ka January 2014, lekala la moo le ile la bega gore bana babo rena ba 71 ba ile ba thoma go šoma mešomo  yeo e tlilego le phetogo ye. Ka mohlala, bana babo rena ba bangwe ba abetšwe go šoma dikhitšhing goba e le bathuši ba baoki dipetleleng tša nageng yeo. Baokamedi ba lenaneo le ba retile tsela e botse yeo bana babo rena ba šomago ka yona le boemo bja bona bja kgopolo, gaešita le ge gantši mešomo yeo ba e newago e le thata. Bana babo rena ba thabela gore ba diretšwe ditokišetšo tše tša go šoma mešomo e mengwe ya setšhaba e le gore ba ka tšwela pele ba kgomaretše letswalo le le hlwekilego e le Bakriste. * Ngwanabo rena yo mongwe o itše: “Re leboga Jehofa gore re ka dira mešomo e mengwe yeo e sego ya bošole, e lego seo se re thušago go se tšee karolo dintweng gomme ka nako e swanago ra ba le tokologo ya go mo hlankela.”

DOMINICAN REPUBLIC E Dumelela Dihlatse Semmušo Gore di Inyadišetše Ditho tša Tšona

Ka 1954, mmušo wa Dominican Republic o ile wa saena tumelelano le Mopapa, wa nea Kereke ya Katholika e nnoši tshwanelo ya go nyadiša batho nageng yeo. Ge banyalani ba be ba sa nyadišwe ke Kereke ya Katholika, mohlankedi yo mongwe wa Mmušo o be a ba nyadiša. Lega go le bjalo, ka 2010, mmušo o ile wa thea molaotheo o mofsa woo o ilego wa nea baemedi ba swanelegago ba madumedi a mangwe tshwanelo yeo ya go nyadiša batho. Mmušo o ile wa hloma klase ya go tlwaetša bao ba bego ba nyaka mangwalo a semolao a go ba banyadiši. Ofisi ya lekala kua Dominican Republic e ile ya kgetha bagolo ba 30 gore ba ye klaseng yeo, gomme bathong ba ka godimo ga ba 2 000 bao ba ilego ba ingwadiša, ke feela ba 32 bao ba ilego ba newa mangwalo ao. Lega go le bjalo, bana babo rena ka moka ba 30 ba ile ba newa mangwalo ao gore ba nyadiše Dihlatse.

 INDIA Ba Ikemišeditše go Dira Boboledi ka Sebete

Sundeep le Deepalakshmi Muniswamy

Ka January 27, 2014, Kgoro ya Mmušo wa Karnataka ya Ditshwanelo tša Batho e ile ya ahlola gore Mookamedimogolo wa Maphodisa wa Seteišeneng sa Maphodisa sa Old Hubli kua Karnataka o gataketše ditshwanelo tša Ngwanabo rena Sundeep Muniswamy ka go se mo šireletše ge a be a hlaselwa ke sehlopha sa bahlolampherefere ka June 28, 2011. Kgoro yeo e ile ya bona mookamedimogolo yoo molato wa go gatakela ditshwanelo tša batho gomme  ya se laele feela gore mmušo wa Karnataka o mo kgalemele, eupša ya laela le gore Ngwanabo rena Muniswamy a newe R3 600 ya ditshenyagalelo. Kgoro yeo e ile ya laela mmušo gore o ngwathe tšhelete yeo mogolong wa mookamedi yoo wa maphodisa.

Ngwanabo rena Muniswamy o ile a bolela gore yena le lapa la gagwe ba leboga Jehofa kudu bakeng sa phetho ye e kgahlišago e bile ba ikemišeditše go tšwela pele ba bolela ditaba tše dibotse ka sebete. Phetho ya kgoro yeo e matlafaditše tumelo ya bana babo rena le go ba kgodiša gore Jehofa o kgona go šireletša batho ba gagwe. Phetho yeo e bile e butše bahlankedi ba mmušo mahlo gore ba šireletše ditshwanelo tša Dihlatse tša Jehofa kua Karnataka. Molato o mongwe wa mabapi le Ngwanabo rena Muniswamy le ngwanabo rena yo mongwe, woo o sepedišanago le tiragalo yona ye, o sa fegilwe dikgorong tša tsheko.

KYRGYZSTAN Komitikgolo ya Kgorokgolo ya Tsheko e Thekga Bao ba Ganago go Dira Dilo tše Itšego ka Baka la Letswalo

November 19, 2013, e be e le letšatši le le kgahlišago go bao ba bego ba gana go tsenela tirelo ya bošole ka baka la letswalo la bona. Komitikgolo ya Kgorokgolo ya Tsheko e ile ya fihlelela phetho melatong yeo e akaretšago Dihlatse tša Jehofa tše 11 gomme ya re lenaneo la Kyrgyzstan la gore motho a ka ikgethela go dira mediro e mengwe yeo e sego ya bošole ga le dumelelane le molaotheo. Molao wa nageng yeo o be o nyaka gore bao ba dirago mediro yeo e sa akaretšego tša bošole ba ntšhe tšhelete yeo e bego e thekga mediro ya sešole. Le gona molao o be o nyaka gore bao ba ganago go tsenela bošole ka baka la letswalo ba ingwadiše go tlo tsenela sešole ge nako yeo ba e beetšwego go phetha mediro yeo e sego ya bošole e fedile. Komitikgolo yeo e ile ya phetha ka gore go gapeletša batho go hlankela ka tlase ga maemo ao ke go gatakela tshwanelo ya bona ya go hlankela Modimo ka bolokologi. Ka moragonyana ga moo, dikgweding tše sego kae tša mathomo tša 2014, Kgorokgolo ya Tsheko ya Kyrgyzstan e ile ya latela phetho yeo e fihleletšwego ke Komitikgolo ya Kgorokgolo gomme ya phumola melato ya Dihlatse tša Jehofa tše 14 tšeo di bego di bonwe molato ka tlase ga molao wa peleng. Dikahlolo tše di fedišitše  ntwa ya nywaga e šupago yeo go yona re bego re lwela go newa tshwanelo ya go hlankela Modimo ka bolokologi re sa tšee karolo tirelong ya bošole. Sebete sa masogana a a go loka se godiša leina la Jehofa e bile se re thuša go mo hlankela ka bolokologi kua Repabliking ya Kyrgyz.

Kyrgyzstan: Dihlatse tšeo melato ya tšona e ilego ya išwa kgorongkgolo ya Kyrgyzstan

NIGERIA “Jehofa o Mputsitše”

Seleteng sa Nigeria sa Abia, gantši Dihlatse tša Jehofa di a tšhošetšwa le go kgethollwa ka gobane di gana go tsenela mekgatlo e itšego ya dithaka *—yeo gantši e tumilego ka bošoro le go dirišana le meoya. Mesong e mengwe ka November 2005, ditho tša mokgatlo wo motsaneng wa Asaga Ohafia di ile tša šwahlela legaeng la Ngwanabo rena Emmanuel Ogwo le mosadi wa gagwe gomme tša tšea dithoto tša bona ka moka ntle le molao di bolela gore ba kolota motšhelo wa go ba maloko a mokgatlo woo. Ba ile ba šala feela  ka diaparo tšeo ba bego ba di apere. Ka 2006, batho ba motsaneng woo ba ile ba raka Ngwanabo rena Ogwo legaeng la gagwe le motsaneng woo. Ngwanabo rena le Kgaetšedi Ogwo ba ile ba tšhabela legaeng la ngwanabo rena yo a itšego motsaneng o mongwe, moo ba ilego ba hlokomelwa gabotse. Gaešita le ge Ngwanabo rena Ogwo a ile a boela legaeng la gagwe ngwageng o latetšego, o ile a tšwela pele a gapeletšwa go tsenela mokgatlo woo, gomme a se bušetšwe dithoto tša gagwe.

Mafelelong, ka April 15, 2014, Kgoro e Phagamego ya Seleteng sa Abia e ile ya ema le Ngwanabo rena Ogwo, ya thekga taba ya gore o na le tshwanelo ya go ikgethela mokgatlo le bodumedi. Ngwanabo rena Ogwo o ile a bušetšwa dithoto tša gagwe, e bile gona bjale Dihlatse ga di sa kgethollwa kudu ke batho ba moo go swana le peleng, gomme bana babo rena kua Asaga Ohafia ga bjale ba dira boboledi ka bolokologi gona moo.

Ge kgoro e be e tsebiša phetho ya yona, Ngwanabo rena Ogwo o itše: “Ke ile ka tshelela godimo ke thabile. Ke be ke thabile kudukudu. Ke ile ka bona e le Jehofa yo a fentšego molatong woo le gore barongwa ba be ba nthekga. Jehofa o mputsitše.”

RUSSIA Kgoro ya Tsheko e Ema le Wepesaete ya Rena ya jw.org

Mathata a mantši a tša semolao ao bana babo rena kua Russia ba lebeletšanego le wona ge e le gabotse a “feleleditše ka go tšwetšwa pele ga ditaba tše dibotse” nageng yeo. (Bafil. 1:12) Gaešita le ge bahlankedi ba bangwe ba mmušo le baetapele ba bodumedi ba ganetša borapedi bja rena o šoro, bana babo rena kua Russia ba kgomaretše potego ya bona, e bile Jehofa o šegofatša maiteko a bona.

Bohlatse bjo bongwe bja se ke phenyo ya semolao yeo re bilego le yona motseng wa Tver’. Ka 2013, ramolao yo mongwe kua Tver’ o ile a iša lengwalo la go ipelaetša kgorong ya tikologong yeo a bolela gore Wepesaete ya rena ya jw.org e thibelwe nageng ka moka ya Russia. Kgoro yeo e ile ya ema le ramolao yoo ka ntle le go tsebiša baemedi ba Dihlatse tša Jehofa ka taba yeo. Bana babo rena ba ile ba kwa ka phetho yeo e tšerwego ke kgoro ya tsheko gomme  ba dira boipiletšo. Ka January 22, 2014, Kgoro ya Selete ya Tver’ e ile ya gomiša phetho ya kgoro yeo ya tikologo gomme ya re ahlolela gabotse. Ka baka la Jehofa le dithapelo tša lena bana babo rena, ga bjale bana babo rena ba bantši kua Russia ba ka thabela dijo tša moya tšeo di lego go jw.org.

TURKEY E sa Lwa le Bao ba Ganago go Tsenela Tirelo ya Bošole ka Baka la Letswalo

Bariş Görmez, e lego yo mongwe wa Dihlatse tša Jehofa kua Turkey, o feditše nywaga ya ka godimo ga e mene kgolegong ka baka la go gana go tsenela tirelo ya bošole. Ge a le moo kgolegong, o ile a kgotlelela go swarwa ka sehlogo ke mašole ao a bego a mo raga le go mmetha ka melamo. O ile a tlaišwa gape ka seleng yeo a bego a dula ka go yona. Ka ge Ngwanabo rena Görmez e le yo motelele kudu, o be a sa lekane mpeteng wa ka moo seleng, ka gona a gapeletšega go kopanya mepete e mebedi gomme a robala gabohloko. Mafelelong, balaodi ba kgolego ba ile ba mo dumelela go ba le mpete o mogolwanyane, woo a o reketšwego ke phuthego ya lefelong leo.

Ka 2008, Ngwanabo rena Görmez le Dihlatse tše dingwe tše tharo ba ile ba ngwalela Kgoro ya Yuropa ya Ditshwanelo tša Batho lengwalo, ba hlalosa gore mmušo wa Turkey o gataketše tshwanelo ya bona ya go hlankela Modimo ka bolokologi ka ge e paletšwe ke go hlompha tshwanelo ya bona ya go gana go dira dilo tše itšego ka baka la letswalo. Ka June 3, 2014, Kgoro yeo e ile ya ema le Dihlatse tšeo tše nne * gomme ya laela mmušo wa Turkey gore o lefe ditshenyagalelo tša bana babo rena bao. Le ke lekga la boraro Kgoro ya Yuropa e ema le Dihlatse tša Jehofa kgahlanong le mmušo wa Turkey tabeng ye. Gaešita le ge gona bjale go se na Dihlatse tša Jehofa tše di golegilwego kua Turkey, bothata bjo bo ka se rarollege go fihlela ge mmušo wa Turkey o dumela gore motho o na le tshwanelo ya go gana go tsenela tirelo ya bošole ka baka la letswalo.

 Dipego tša Morago Bjale

Azerbaijan: Bana babo rena ba sa hlakišwa ke maphodisa ao a šwahlelago dibokeng tša bona, go thibelwa ga dikgatišo tša rena, go swarwa ke maphodisa ba le tšhemong le go gatakelwa ga ditshwanelo tša bona ka ditsela tše dingwe. E bile mmušo wa moo o sa dutše o gana go ngwadiša lefsa Religious Community of Jehovah’s Witnesses. Bana babo rena ba rometše mangwalo a boipelaetšo a 19 Kgorong ya Yuropa ya Ditshwanelo tša Batho kgahlanong le mmušo wa Azerbaijan ka tšona ditaba tše. Go sa šetšwe mathata a, Jehofa o šegofatša bana babo rena ka ge palo ya bagoeledi e tšwela pele e oketšega. Go lokollwa ga Phetolelo ya Lefase le Lefsa ya Mangwalo a Makgethwa e feletšego ka Seazerbaijani e bile lebaka le lengwe la go thaba.

Eritrea: Bana babo rena nageng ye ba tšwela pele go hlankela Jehofa ka potego le ge ba tlaišwa o šoro. Bana babo rena ba bararo, e lego Paulos Eyassu, Isaac Mogos le Negede Teklemariam, ga bjale ba dutše kgolegong nywaga e 20—ga e sa le ba golegwa ka September 24, 1994. Maphodisa a Eritrea a ile a swara Dihlatse tše e ka bago tše 150 le batho bao ba thabelago nakong ya Segopotšo sa lehu la Kriste ka April 14, 2014. Bao ba ilego ba swarwa ke ba nywaga ya go thoma ka o tee le dikgwedi tše nne go fihla ka ba nywaga ya ka godimo ga e 85. Maphodisa gape a ile a swara Dihlatse tše dingwe tše e ka bago tše 30 le batho bao ba thabelago nakong ya polelo e kgethegilego ka April 27, 2014. Ba bantši ba bona ke kgale ba lokolotšwe.

Kazakhstan: Mokgatlo wa Ditaba tša Bodumedi o ganne gore dikgatišo tša rena tše 14 di tsene nageng yeo goba go phatlalatšwa tšhemong kua Repabliking ya Kazakhstan. Go oketša moo, bana babo rena ga se ba dumelelwa go ruta batho ba bangwe Beibele ka ntle le mafelong a bona a borapedi ao a ngwadišitšwego ka molao, e bile bana babo rena ba e ka bago ba 50 ba pharilwe molato wa gore ke baromiwa bao ba sego molaong. E le gore re lwele tokologo ya rena ya go bolela, re rometše mangwalo a 26 a go ipelaetša Komiting ya Ditshwanelo tša Batho ya Ditšhaba tše di Kopanego.

^ par. 4 Motho yo mongwe le yo mongwe a ka ikgethela ge e ba a nyaka go dira mešomo e mengwe ya setšhaba goba a sa nyake go e dira.

^ par. 13 Mokgatlo wo wa dithaka o bopša ke batho, kudukudu banna, bao ba gotšego gotee motsaneng o tee.

^ par. 21 Buldu le ba Bangwe Kgahlanong le Mmušo wa Turkey, No. 14017/08, June 3, 2014.

Ithute ka mo go oketšegilego

DIPOTŠIŠO TŠEO DI BOTŠIŠWAGO KUDU

Ke ka Baka La’ng Dihlatse tša Jehofa di sa Tšee Lehlakore Dipolotiking?

Na di bea tšhireletšego ya setšhaba kotsing?