Dipeakanyo tša go bula

Kgetha leleme

Eya go menyu wa bobedi

Eya go lelokelelo la dikagare

Eya go dikagare

Dihlatse tša Jehofa

Sepedi

Puku ya Ngwaga ya Dihlatse tša Jehofa ya 2015

 DINTLHAKGOLO TŠA NGWAGOLA

Dipego—Ditaba tše di Tšwago Lefaseng ka Bophara

Dipego—Ditaba tše di Tšwago Lefaseng ka Bophara

Ba Abelana le ba Bangwe Seo ba se Taoneloutago

Gaešita le ge e se batho ba bantši ba nago le Inthanete kua Cuba, ga bjale go a kgonega gore batho ba tsene go yona mabenkeleng ao a butšwego ke dikhamphani tša difouno. Lega go le bjalo, ba lefišwa tšhelete e ntši kudu. Ka go re’alo, e le go thuša bana babo rena ba moo gore ba holwe ke jw.org, lekala le ile la kgothaletša phuthego e nngwe le e nngwe gore e kgethe mogoeledi o tee yo a tlago go taonelouta dikgatišo, mananeo a go theetšwa le dibidio Wepesaeteng ye gomme a di abele Dihlatse tša phuthegong ya gabo. Thulaganyo ye e šoma gabotse kudu.

 Ba Ile ba Bona Holo ya Mmušo e le Bohlokwa go Feta Selefouno

Teona wa nywaga e 10, le ngwanabo wa nywaga e seswai e lego Tamuna, ba dula Repabliking ya Georgia. Banenyana ba ba be ba nyaka selefouno. E le go ba thuša go e reka, makgolo wa bona o be a ba holofeditše gore kgwedi le kgwedi o tla ba nea disentenyana go tšwa tšheleteng ya gagwe ya phenšene. Ka maswabi, makgolo wa bona o ile a hwa go sa letelwa. Lega go le bjalo, ditho tša lapa di ile tša tšea phenšene ya mafelelo ya mokgekolo gomme tša e nea banenyana bao gore ba reke selefouno yeo ba bego ba e nyaka. Ge banenyana ba ba naganišišitše gabotse ka taba ye, ba ile ba ngwalela phuthego lengwalo gomme ba re: “Re a tseba gore ka morago ga dibeke tše pedi re tlo agelwa Holo ya Mmušo motsaneng wa rena wa T’erjola. Makgolo wa rena o be a ratile go tlo thuša modirong woo, bjale bobedi bja rena re phethile ka gore re tšee phenšene ya gagwe ya mafelelo gomme re e nee phuthego go e na le gore re reke selefouno. Hle, le re ageleng Holo e botse!”

Mangwalo a Segerika ka Setetum

Ka January 17, 2014, motseng wa Dili, kua Timor-Leste, setho sa Sehlopha se Bušago e lego Geoffrey Jackson o ile a lokolla Phetolelo ya Lefase le Lefsa ya Mangwalo a Bakriste a Segerika ka Setetum, e lego leleme leo le bolelwago ke batho ba bantši kudu nageng yeo. Nakong e fetilego, dikopi tša Mangwalo a Segerika ka Setetum di be di gatišwa le go phatlalatšwa ke Kereke ya Katholika feela, gomme e gana go di rekišetša Dihlatse tša Jehofa goba batho bao e bego e gononela gore ba ithuta Beibele le Dihlatse. Lega go le bjalo, phetolelo yeo ya Katholika e be e tletše ka diphošo, e ntšhitše mantšu a itšego, e diriša mantšu a kgale e bile e se  ya gatišega gabotse. Go fapana le seo, Darren, yo e lego moromiwa kua Timor-Leste, o boletše ka Phetolelo ya Lefase le Lefsa gore: “Batho ba bantši ba Timor-Leste bao ba balago Phetolelo ya Lefase le Lefsa ba kgahlwa kudu ke go nepagala ga yona, gomme ba kgopela dikopi tša yona le semeetseng. Ba hwetša go le bonolo go e bala, e bile ba leboga kudu gore e ngwadilwe ka ditlhaka tše dikgolo, kudukudu ka ge ba bantši ba se na mabone a go tšea gabotse magaeng a bona. Ga bjale ba bantši ba bao ba hweditšego dikopi tša yona ba swarelwa dithuto tša Beibele.”

‘Jehofa o Mpona ke le Bohlokwa’

Matsedonia: Bagoeledi ba nea bohlatse ba diriša dikgatišo tša Seromany

Ka January 2014, modiro wa go fetolela lelemeng la Seromany, seo se bolelwago kua Matsedonia, o bile le diphetogo tše di kgahlišago. Go hlomilwe sehlopha seo se ikemetšego sa bafetoledi, gomme se dumeletšwe go fetolela dikgatišo ka leleme le, e sego ka mongwalo wa Seroma feela eupša le ka mongwalo wa se-Cyrillic. Se se tla hola kudu batho bao ba bolelago Seromany, bao ba tlwaetšego  kudu mongwalo wa se-Cyrillic, e lego mongwalo wa semmušo wa kua Matsedonia.

Batho ba bantši bao ba bolelago Seromany ba kgomilwe dipelo ke taba ya gore mokgatlo wa Jehofa o tšweletša dikgatišo ka segagabo bona. Kgaetšedi yo mongwe o itše: “Ka ge le nna ke bolela Seromany, gantši ke lemogile gore batho ba merafo e mengwe ba ntšeela fase, ka gona ke leboga Jehofa kudu gore o mpona ke le bohlokwa gore le nna ke hwetše dikgatišo ka segagešo. Se se mpatametša kgauswi le yena le go feta.”

“Ke leboga Jehofa kudu gore o mpona ke le bohlokwa gore le nna ke hwetše dikgatišo ka segagešo”

Bookamedi bjo Bofsa

Go thoma ka February 1, 2014, ofisi ya lekala ya United States e ile ya thoma go okamela tšhemo le diphuthego tša kua Jamaica le Dihlakahlakeng tša Cayman. A botee bjo bo kgahlišago gakaakaang gare ga bagoeledi ba ka godimo ga ba 1,2 milione bao ba lego tšhemong yeo e okametšwego ke lekala la United States! Ditšhemo tše di akaretša dilete tše 50 tša U.S., dihlakahlaka tša Bahamas, Bermuda, dihlakahlaka tša Brithania le tša U.S. Virgin, Puerto Rico le dihlakahlaka tša Turks le Caicos.

Babulamadibogo ba Kua Japane

Bana babo rena le dikgaetšedi kua Japane ba kgomaretše moya o mobotse wa bobulamadibogo, e bile naga ye yeo e lego sehlakahlakeng e maemong a bone lefaseng ka moka ka palo e kgolo ya babulamadibogo ba ka mehla. Mathomong a ngwaga wa tirelo wa 2014, bagoeledi ba bangwe ba 2 646 ba tsenetše bobulamadibogo, gomme ba oketša palo ya babulamadibogo gore e be 65 668. Ka March 2014, mo e ka bago seripagare sa bagoeledi ka moka nageng yeo ba tšere karolo sebopegong se itšego sa tirelo ya bobulamadibogo.